6 Usakin katankëxa Dios sënë́an ka Josuénën sacerdote unikama kuënxun kakëxa: Mikaman kamina bunántisa okin 'akë kurin ratakakakë anua Nukën 'Ibun bana kuënëokë 'arukë a buánti 'ain, buámainun ka mapai achúshi 'imainun rabë́ mikamax bunántisa okin 'akë kurin ratakakakë a inui rëkuë́nkiani kuankin a banoti 'akë carnero manchan a buani rëkuë́nkianti 'ain. 7 Usakin katankëxun ka Josuénën a ëmanu 'ikë uni kamarairi kakëxa: Mitsux kamina ëma ratanarati kuainakëti kuanti 'ain. Kuamainun ka axa 'akanantishi suntárukama ax bunántisa okin 'akë kurin ratakakakë a rëkuënmibiani kuanti 'ain.

8 Usokin 'anúan Josuénën kakëxun ka kamaxunbi an kakësabiokin 'akëxa. 'Amainun ka mapai achúshi 'imainun rabë́ sacerdotekama ax anu Diosan bana kuënëokë 'arukë bunántisa okin 'akë a buánkin rëkuë́mibiankin mapai achúshi 'imainun rabë́ atun carnero manchan banoti 'akë a banobiani kuankëxa, kuankëbë ka an bunántisa okin 'akë kurin ratakakakë an buánkë akamaxribi a kati kabiani kuankëxa. 9 Kuamainun ka axa 'akánanti suntárukama ax sacerdotekama rëkuë́mibiani kuankëxa, kuanmainun ka ax tsiankiankë akamaxribi atu kaxú kuamainun, sacerdotekama atúxribi kuankin ënkinmaira carnero manchan banobiani kuankëxa. 10 'Aínbi ka Josuénën ësokin suntárukama kakëxa, unë́kiani kamina ñuitsima rikianti 'ain, 'ën mitsu kuënkëni munuma sharánun kakëx kuni kamina kuëënkëni kushin sharákanti 'ain.

11 Usakian Josuénën 'amikëxun ka achúshi okin ëma ratanarakin bunántisa okin akë Nukën 'Ibunan a buánkëxa. Usakin buanx utëkëntankëx ka anu achúshi imë́ inúmi 'ikankëxa. 12 'Inëti pëkarakëma 'aínshia, Josué nirukëbëtan ka sacerdotekaman bunántisa okin akë kurin ratakakakë anua Nukën 'Ibun ñukama 'arukë 'iakin biruakëxa. 13 Birukëbë rikiani ka mapai achúshi 'imainun rabë́ sacerdotekama ax anunbi bunántisa okin akë kurin ratakakakë a buámainun rëkuë́nkiani kuani aín carnero manchan banoima kuankëxa. Kuankëbë ka axa 'akánanti suntárukama axribi rëkuë́nkiani kuanmainun, aín patsan axribi a kaxú kuankëbë ka. An carnero manchan banókë axribi nirakëtimaira kuankin banoia kuakëxa. 14 Usai 'iónxa pëkaran ka amiribishi rikiantëkëanx ëma 'uri amiribishi mañarakëakëxa. Usai ka mapai achúshi 'imainun achúshi nëtë inúmi 'ikankëxa.

15 Usai 'ikë mapai achúshi 'imainun rabë́ nëtë 'ikë anun ka pëkarakëma 'aínshi tsuakirukianx ëma 'uri mañarakëtëkëankëxa, bëráma 'ikësabi oí, ka a nëtën mapai achúshi 'imainun rabë́ oi ëma uri mañarakëtëkënkankëxa. 16 Usakian sacerdotekaman aín manë banañu banokin mapai achúshi 'imainun rabë́okin 'akëbëtan ka Josuénën unikama kakëxa: ¡Munuma kuënkëni kamina sharati kiti 'ain! Nukën 'Ibun ka ënë ëma 'atima onun nu amia usa 'ain kananuna 'ati 'ain. 17 A ëmax ka anu 'ikë ñukama këñunbi rurapakin 'aisama oti 'ikën, usakin 'anun ka Nukën 'Ibu kiaxa. 'Anan kamina bëtsi bëtsi unibëa 'ikë xanu Rahab kakë a 'imainun aín xubu 'ukëmëu abë timë́kë aín aintsikamaishi uisabi otima 'ain, an ka atun ëma ñachati xukë uni rabë́ a unëaxa. 18 'Aínbi kamina mitsun, a ëmanu atsínkin anu 'ikë ñukama achirabi bitima 'ain, mitsumi anu 'ikë ñukama bikëbëtan ka anu Israel unibu nux 'ikë aribi Nukën 'Ibun 'aisama oti 'ikën. Usakin 'akëbë kananuna nukamax 'aisama okë 'iti 'ain. 19 'Aínbi ka anua 'ikë kuri, manë uxua, 'imainun kamabi ñu manë panshian 'imainun manë kashtá 'akë a ñukamaishi anu ñu kupíira kupíkë Nukën 'Ibunan 'inun nanti 'akë anu nanti biti 'ikën.

20 Usai ki Josué sënë́nkëbëtanshi ka aín carnero mancha banokankëxa. Bana oia kuatishi ka Israel suntárukamax, munuma kuënkëni sharati kikankëxa. Kikëbëshi ka ënën menma buinarakin ëma kënëarakë ax rurukubuakëxa. Usaia 'ikëbë ami kikiani abákiani kuankin ami bëbarukin ëma 'ibuakankëxa. 21 Usokin 'akinshi ka aín manë xëtokën anu ikë unikama, xanu, uni bënábu, këñunbi uni apan akamabi këñukin 'anan atun 'arakakë ñuinakama oveja, burro akamaribi këñukin 'akëxa. 'Akin ka ñuñuma 'itánun kamabi këñuakëxa.

22 Usomainun ka Josuénën an me ñachatia xukë uni rabë́ a kakëxa: “Aín xubunu kuanxun kamina bëtsi bëtsi unían aín nami 'akë xanu a bianan aín xubunu 'ikë aín aintsikama aribi mitsun mi usakin 'akinuxun kakësabiokin biti 'ain.” 23 Kakëx aín xubunu kuanxun ka a uni rabëtan an kakësabiokin Rahab aín xubunua aín papa aín tita aín rarëbakë 'imainun aín xukë́n 'anáka bianan aín aintsi 'ibukamaribi biakëxa, bibiankin ka anua Israel unibu bukukë 'uri anuxuan atun bërúantinubi buánkëxa. 24 Usokin 'atankëxun ka Israel suntárukaman anua ikë ñukama këñunbi a ëma në́ankëxa. Në́anan ka anua kuri 'imainun manë uxua kamabi ñu manë panshian manë kashtá 'akë akama upíirabu 'ashi Nukën 'Ibunan 'iti nankë ñu anu nanti biakëxa. 25 'Aínbi ka Josuénën Rahab 'imainun aín aintsikamainshi, Jericó ëma ñachatanun xukëx kuankë uni rabë́ 'akatsikixun barikaniabi unëkë a kupín uisabi okima biakëxa. Usa 'ain ka Rahabnën rëbúnkikamax israel unikamabë upitax tsóakëxa. 26 Usokin 'atankëx ka Josué ësai kiakëxa: “Nukën 'Ibun ka 'ëx kikë bana ënëx ka asérabi 'ikë kixun 'unánia, uin kara Jericó ëma 'atëkënkin birutëkëntisa tania a unin bëchikë apanëx ka anun ëma bëararakin kënëkë ax ami rurukubukin chakakëx bamakë 'iti 'ikën, 'imainun ka aín bëchikë 'anáka aribi anun ëmanu atsínti xëputi 'akin amibi birukin 'akë a chakamikë 'iti 'ikën” (kiax ka Josué kiakëxa). 27 Usokin Nukën 'Ibun 'akinkëxua Josuénën ñu 'aia ka ax ka kushiira uni 'ikë kixun unin ñuia kamabi menu 'ikë unin kuakëxa.