Israel unibunën amorreo suntárukama abë 'akanankin abámia bana
10
1-2 Adonisédec kakë uni ax ka Jerusalén ëmanu 'apu 'iakëxa, anuxun ka Josuénën abë 'akanankin Ai kakë ëmanu ikë suntárukama këñukin 'axa kixun ñuiña kuakëxa, Jericónu 'ikë 'apu aín unikama këñunbi 'akësaribi okían këñúkë kuati ka 'itsaira rakuëkankëxa, 'imainun ka gabonita unikamabë ka israel unikamax bërí atubë timë́ax tsotia kixun ñuikania kuakëxa. Usai atux 'ikë kuatira ka 'aisamairai rakuëkankëxa, Gabaón kakë ëma ax ka chaiira 'aish Ai ëmabëtan sënë́nma upíira 'iakëxa, usa 'aish ka anu 'apu 'iisa 'aíshbi a ëmanu 'apu 'aíma 'iakëxa 'imainun ka anu 'ikë suntárukamax 'akánanti 'unánbuira 'iakëxa. 3 Usai 'itsaira rakuë́kin ka Adonisédec Jerusalénnu 'ikë 'apu an ñakáitsinu ikë 'apukama katánun xukin kamia a ka ënëkama 'iakëxa Hoham, Hebrónnu 'ikë 'apu 'imainun Jarmut, kakë ëmanu 'ikë 'apu Piram 'ianan Jafía Laquisnu 'ikë 'imainun Debir Eglón anu 'ikë 'apu akamabi kamiakëxa: 4 “Kamikin ka ësokin katánun kixun kamiakëxa, nukama kamina Gabaón unikamabë 'akanania 'akini uti 'ain, atux ka Josué Israel unibubë 'akananima atubë nuibanani birananxa.” 5 Kamikëx ka mapai achúshi amorreo 'apukama abë Jerusalénnu 'ikë ax biranankëxa, atux ka Hebrón Jarmut, Laquis 'imainun Eglón akamax timëkiani atun suntárubë Gabaónnu 'ikëkama 'akatsikiax kuankëxa.6 Usaia atu 'akatsi kiax timëkiani kuankë, kuakin ka Gabaón ëmanu 'ikë 'apun, Josué Guilgal menu 'ia ësokin kamiakëxa: 'Ën kamikëx kamina kana kuanima kiax kima an mi ñu mëëxunti unikama ënë mix kikësabiokin 'akini min suntárukamabëbi uti 'ain. Aín bashinu tsókë Amorreo unibunën 'apukamax ka aín suntárukamabëbi timë́kuatsini nu 'akatsikiax uaxa. 7 Ësokian Gabaónu 'ikë 'apun kamikëx ka Josué Guilgalnuax axa rakuë́timaishi 'akanankë ain suntárukamabë küancëxa, 8 timë́kë ka Nukën 'Ibun Josué kakëxa: mitsun kamina amorreo unikama rakuëkimaishi, mi kupitanuma 'ati 'ain.
9 Usakian Diosan kakëx ka Josué anua 'ikë Guilgal kakë anuax aín suntárukamabë imë́ kuanëkin ñu sinánkëmabi ratukinshi amorreo unibu 'akëxa. 10 'Aia ka Nukën 'Ibun israel unibunën 'akëxa 'itsaira atumi rakuënun 'imiakëxa, usaía 'ia ka Josuénën suntárukaman anuaxa 'akanankë Gabaón anuxun 'aisamaira amorreo unibunën suntárukama 'akëxa. Usokin 'akëxa anun Bet-horónnu, kuanti bai a bibiani abatiabi ka nuibiankin amorreo suntárukama Azecá 'imainun Maquedá kakë ëma rabë́ ami kikiania Israel suntárukaman kuania mërakin 'akëxa. 11 'Akëbëa amorreo suntáru rairinëxribi abati Bet-horón kakë ëma ratanbiani israel suntárukaman 'akëx abati kuankëbëtanbi ka Nukën 'Ibun matsin tita aín bëru chaiirabu 'ibúkin aín manë xëtokën israel suntárukaman 'akësamaira okin këñunun 'amiakëxa.
12 A nëtë́an Nukën 'Ibun 'amikëxun israel unibunën amorreo unikama 'akë a nëtën ka Josuénën aín suntárukaman kuamainun Nukën 'Ibun ñukákin ësokin kakëxa:
Barix ka Gabaón puntë nirakëti 'ikën;
'imainun ka 'uxëribi Aialón kakë me puntë ami nirakëti 'ikën.
13 Usaia kikëbë ka 'uxë nirakëmainun bariribi nirakëakëxa nirakëkëbëtan ka Israel unibunën axa ami nishkë unikama abë 'akanankin 'akëxa.
Ënë banax ka bëtsi kirikanu kuënëokë 'ikën usaía Israel unibu 'akanamainun ka bari naí nëbëtsi nirakëax achúshi nëtë 'imi kuabuama a bana ñuikin 'akë 'ikën.
14 Uinsaranbi ka achúshi nëtë ënë nëtë́an 'akësaribi okin Nukën 'Ibun achúshi unin kakëxun kuakin ñu 'akë 'aíma 'iakëxa, an ka Israel unibunën rabanan në́kin ami nishkë uni 'anun 'amiakëxa.
15 Usai 'akanankiani ka Josué Israel unibubë anua 'ikë Guilgal kakë anubi kuantëkëankëxa.