—Ësokin 'ën mitsu kanun ka Israel unibu nun Dios kiaxa: Bërámaira ka Térah 'imainun aín bakë bëchikë rabë́ Abraham kakë 'imainun Nahor mitsun chaitiokëkama, atux Éufrates kakë baka kuëbí tsókë 'ixun bëtsi dioskama rabiakëxa. 3 Rabia kana Éufrates kakë baka kuëbí anua Abraham, chikínbiankin Canaán kakë mekama oi ninun 'imiakën. 'Imianan kana aín bakë bëchikë Isaac a pain bëchinun 'amiakën, 4 'amikëxun ka aín bakë bëchikë Isaacnën Jacob 'imainun Esaú a rabë́ pain bakë bëchiakëxa. Usoxun kana Esaú Seír kakë me anu tsónun 'inánkën, 'inámainun ka Jacobnëx aín bakë bëchikëkamabë Egipto kakë menu tsóti kuankëxa.

5 Usai 'iá 'ain kana 'itsa baritia inúkëbëtan 'ën mitsun chaitiokë Moisés 'imainun Aarón xuakën, 'imainun kana mitsux chikinuxun Egipto menu 'ikë unikama 'itsaira 'ën tëmëramiakën. 6 A nëtë́an mitsun chaitiokëkama Egipto menuax chikíkë anun ka egipcio suntárukaman anuax 'akanankë caballonën nikinkë 'imainun caballonën kuankiribi parúmpapa xónsa kakë anubi bëbarukin 'akatsikixun nuiakëxa.

7 Usokëxuan atun 'akinun kixun ñukákëxun kana, bëánkibukë chaiiran atu bëaranun 'amianan parúmpapan kuaniabi mapukin egipcio unikama këñunun 'amiakën. Usakin 'aia ka nun chaitiokëman Egipto menuxun isakëxa.

Usai pain 'itankëx ka raírinëx ñumainun 'itsa baritia 'imi anu uni 'ikëma menu niakëxa, 8 nitsiabi kana anua atu amorreo unikaman menu bëakën, ax ka Jordán kakë baka amiaxa bari urukë au 'iakëxa. Anuax mitsubë 'akananiabi kana, 'ën abámikin mi 'anun mitsu 'amiakën, 'amikëxun abámikin 'axun kamina atun me bikankën. 9 Balac, Sipornën bëchikë moabita unibunën 'apu an pain ka mitsubë 'akánanti sinánxun, Balac an Beornën bëchikë Balaam nuisa 'atimokin sinánxuni unun kixun kamiakëxa. 10 'Aínbi kana 'ën Balaamnën usakin 'aisama onun 'amikinma mitsu nuibanun sinánmiakën. Usakin kana mitsu ië́miakën. 11 Usa 'ain kamina mitsux Jordán kakë baka a sikarakë kianx Jericó kakë ëma anu bëbakën. Bëban ka Jericó ëmanu tsókë unikama mitsubë 'akanankëxa, 'akananiabi kana mitsun ira kupitanunma 'anun 'amiakën, 'amitankëxun kana (amorreos, ferezeos, cananeos, hititas, gergeseos, heveos 'imainun jebuseo) a unikamaxribi mitsubë 'akananiabi kana mitsun ira kupitanuma 'anun 'amiakën. 12 Mitsunmi amorreos unibunën 'apu rabë́ aín suntárukëñunbi 'a ax ka 'akánanti 'unan 'ixunmi manë xëtokën 'anan mitsun pian 'ama 'ikën, 'ën kana mitsux kuankë 'aímabia atux irapain abánun 'imiakën. 13 'Ën kana a menu tëa 'ikëmabi mitsun me 'inánan ëmakamaribi mitsun 'a 'ikëmabi 'inánkën. Anu tsókin kamina bërí mitsun 'apá 'ixunmabi uvas 'imainun aceituna akama a menua 'apá 'ikë pikanin.

16 Ësakin kakëxun ka Israel unibunën ribi kakëxa:

—¡Nun kananuna a rabikinma bëtsi bëtsi dios rabia Nukën 'Ibun nu ënti kuëenima! 17 Nukën 'Ibu an ka chikínbëtsinkin nukama 'imainun nun chaitiokëkama Egipto menuxun tëmërakin ñu mëëiabi nu bëakëxa. An ka 'aisamaira ñu 'akin nun ismainunbi 'akëxa, 'imainun ka bëtsi bëtsi ëma inubiani kuania nu bërúankin 'akiankëxa. 18 An ka anun nux uti menu 'ikë ëmakamanu tsóa unikama chikínun 'imiakëxa, usaribi okin ka amorreo axa ënë menu tsóa akamaribi 'akëxa. Usokin akama ñu 'a 'ikë kananuna nunribi a rabiti 'ain ax ka nun Dios 'ikën.

19 Usai kikania kuatankëxun ka Josuénënribi kakëxa:

—Mitsun kuainxunshi rabitisama ka Nukën 'Ibu 'ikën, ax ka Dios upíira 'ianan uisa ñu 'atimabi 'ai ami mitsux 'uchati kuëënima. 20 An ka mitsunmi a ënkin bëtsi dioskama rabia, ka Nukën 'Ibu upíokian mitsu 'akinkë a ënkin 'aisamaira okin tëmëramiti 'ikën. 21 Usakian kakëxunbi ka Israel unikaman Josué katëkëankëxa:

—Usai 'ikima kananuna nukaman axa Nukën 'Ibu 'ikë ashi rabiti 'ain. 22 Usai kikania ka Josuénën katëkëankëxa:

—Mitsuxbi kamina Nukën 'Ibu ismina rabinuxun 'ai kiax kikanin. Kakëxun ka —atúnribi nukamanbi kananuna a 'ai —kixun kakankëxa. 23 Kiabi ka Josuénën kakëxa:

—Asabi ka, usa 'ain kamina mitsun dios isa kixun, 'arakakë ñukama bitankëxun puti 'ain, putankëxun kamina Israelkama mitsun nuitunënbi Dios amishi sinánkin rabiti 'ain. 24 Ësokin kakëxunbi ka Israelkaman amiribishi Josué kakëxa:

—Nukaman kananuna Nukën 'Ibu Dios rabiti 'ain, 'imainun kananuna uisai 'inun kara ax kia usaibi 'iti 'ain.

25 A nëtënbi ka Siquemnuxun, Josuénën kamabi unibëtan achúshi ñu 'anan Moisésnën usai 'iti banakama kuënëo a 'inánkëxa, 26 a bana ka Josuénën anua a tanti Diosan bana 'ikë anubi kuënëokëxa. Kuënëotankëxun ka mapara pará bixun xubusa okin chupa 'akë anuxun Nukën 'Ibu rabiti a 'urama 'ikë i pëñanakëkë tëmú anu nitsíankëxa, 27 usokin 'atankëxun ka Josuénën Israel unikama kakëxa:

—Ënë mapara chaiira 'ën nitsinkin nankë ënëx ka, uisakin karanuna nun Nukën 'Ibun 'amikëxun ñu 'akën kixunmi mitsun ñuiti 'inuxun 'aia. Ënëx ka a isia bëtsi unikamax mitsux ismina usai 'iakën kikë ax këmëkësa 'itima kupín kamina upiti Diosmi sinánkanti 'ain. 28 Usokin pain katankëxun ka Josuénën aín menubia kuantëkëntanun an 'akintia buánkë unikama a xutëkëankëxa.

29 Usokin pain ñu 'atankëx ka Josué Nunnën bëchikë Nukën 'Ibun uni ax, ciento diez baritiañu 'aish ñuakëxa. 30 Ñukë 'ikë ka aín me Timnat-sérah kakë 'ain tsipumia 'ikë Gaas kakë, Efraínnën bashikama kakë 'ia anu maíankëxa, 31 israel unibunën ka Josué ñutisamapan 'aish tsótan Nukën 'Ibu rabiakëxa, rabia 'ixun ka ax ñua 'ain uni apankama an Nukën 'Ibun kamabi ñu Israel unibu 'axunia isa 'ixun 'unánkë unikama atúxribi ñukëma 'aish tsótan rabiakëxa.

32 Israel unibunën ka Josénën xo Egipto menua bitsínkin bëínëa 'ixun, Siquem kakë me anu maíankëxa, a mex ka Jacobnën cien kuríki manë 'akë kupín Hamornën bakë bëchikë, Siquemnën papa aín me 'ikëbi marua a 'iakëxa, a me ka Josénën rëbúnkikaman atunanbi 'inun biakëxa.

33 Eleazar, Aarónën bakë bëchikë ñukë 'ikë ka aín aintsikaman aín bakë bëchikënën me anua Efraín unibu 'ikë, Finees kakë uni aín me anubi maíankëxa.