Nukën 'Ibun ángel achúshi Boquim kakë me anuax mërá ñuikë bana
2
Nukën 'Ibu ángelnën ka Guilgal kakë anuax kuanxun Boquim kakë me anua Israel unibu ësokin kakëxa: 'Ën kana mitsu Egipto menua chikínbëtsinkin a 'inánuxun mitsun chaitiokëkama ka me ënu bëakën, bëxun kana ësokin kakën: Uinsaranbi kana 'ën mitsubëtan achúshi ñu 'akë a manutima 'ain, 2 usa 'ain kamina mitsun ënë menu 'ikë unikamabëtan achúshi ñubi 'akatsi atubë kanantima 'ain, usai 'ikinma kamina kamabi atun anuxun ñuina xarokëkama a rurupati 'ain. 'Aínbi kamina 'ën kakëxunbi kuaisama tankën, ¡Usa 'ain kamina añu kaina mitsun 'a kixun sinánti 'ain! 3 Usa 'ain kana bërí mitsu kain: Ënë ëmanu 'ikë unikama kana mitsun ismainunbi chikiniman 'imainun ka atun rabikë dioskama ax anun mitsu paránti 'iti 'ikën. 4 Ësokin atu katankëxa Nukën 'Ibun ángel sënë́nkëbëishi ka kamabi Israel unikama munuma sharati ini tsuákiruakëxa. 5 Usai anuax 'ikë ka Boquim kakin a me anëakëxa, anuxun ka Israel unikaman anuxunbi ñuina rëxun xaroxunkin Nukën 'Ibu rabiakëxa. 6 Usa 'ain ka Josuénën ashikin Israel unikama kakë 'ain, achúshi achúshi unix uinu 'ikë me kara biti 'ikë a bitsi kuankankëxa. 7 Usa 'ain ka ax tsókëpan 'ain Israel unikaman Nukën 'Ibu rabi tsókankëxa; 'imainun ka uni aín tukurikubu axa ñukëmapain 'aish bukukë atun Israel unibua Nukën 'Ibun ñu chaiirabu 'axunkë a iskankëxa. 8 'Aínbi ka Josué ciento diez baritiañu 'aish ñuakëxa, 9 ñukë 'ikë ka aín me Timnat-sérah, kakë aín tsipumia 'ikë Gaas kakë Efraínën bashikama abu 'ia anu maíankëxa. 10 'Imainun ka Israelkama axa Josué tsókëpan 'ain tsóa atúxribi ñuakëxa. Usa 'ain ka bëría bakënkëkama atun ka uisaxunbi Nukën 'Ibu 'unánan an israel unikama 'axuan ñukama abi 'unánma 'ikën.Israel unibunën Nukën 'Ibu rabikinma aín bana manua
11 Usa 'aish ka Israel unibunën 'akë ñukama Nukën 'Ibun iskëx Baal rabikin atun pëukin bëtsi bëtsi ñukamaribi rabikë ka ax 'aisama 'iakëxa. 12 Usokin bëtsi ñukama 'ai ka atun chaitiokëkama Egipto menua an chikínbëtsinkin bëa Dios ami manúakëxa, manukian atu rapasu bukukë unikaman rabikë dios ashi rabikëbë ka Nukën 'Ibu 'itsaira xuamati atumi nishakëxa. 13 Nukën 'Ibu rabiti a ënkin ka Baal kakë dios akëñun bëtsi ñukama Astarté kakë dios an isa 'akinia kixun sinánkin aribi rabikin pëuxun bëtsi ñukamaribi rabiakëxa, 14 usokëbë Israel unikamami nishkin ka Nukën 'Ibun an ñu mëkamakë unikaman atun ñu mëkamanun 'amianan, a rapasu 'ikë unikaman an 'akinti 'aíma aín kupitanuma 'anun 'amiakëxa. 15 Usai ami manuax 'ikania ka uínsaran kara 'akanania anun Nukën 'Ibun 'akiniama abë 'akanani kuankë unikaman atu 'akëxa, an atu kásabiokin.
Usai 'iabia Nukën 'Ibun 'akinkëxma ka Israel unibu 'aisamaira tëmërakëxa, 16 'aínbi ka 'aisamaira okían an ñu mëkamakë unikaman tëmëramikëbëtanbi an 'apu 'ixun 'akinti uni 'aíma 'aían tëmërakëbëbi atu mi Dios mërakëxa. 17 'Aínbi ka Israel unikaman usai atux 'ikëbëtan Diosan ax 'apu 'ixun 'akinti uni kaisiabi aín bana kuatima ñunshin nakë́kin unikaman bëtsi dioskama rabikin Nukën 'Ibu Dios rabiama 'ikën. Atun chaitiokëkamaxa Nukën 'Ibun bana ax kikësabi oi 'iti bana tan 'aínbi ka atux, atun chaitiokëkama 'iásai 'iti sinánma 'ikën. 18 Uínsaran kara Nukën 'Ibu an atu 'akinun uni achúshi 'apu 'imia, anun ka anbi 'akiankëxa, 'akinia ka Diosan Israel an 'akinti kaískë unikaman ami nishkë unikaman 'aia nuibakin, 'akiankëxa, 'akinkin ka a unikama atunua chikínun 'amiakëxa. 19 'Aínbi ka an 'akinkë 'apu ñukëbëtan, amiribishi ñu 'atima 'atëkënkankëxa, 'akin ka atian ira atun chaitiokëkaman 'asamaira okin bëtsi dioskama rabikankëxa. Usakin 'ai ka atun ñu 'aisama 'akë ëinsama tani atun sinan iruarati sinánñuma uni 'ikësai 'ikankëxa. 20 Usai 'ia isi ka Nukën 'Ibu Israelkamami xuamati nishi, ësai kiakëxa: “Ënë unikaman ka ësai 'ikin atun chaitiokëkamabëtan 'ën achúshi ñu 'a 'atimokin 'aia, usa 'ixun ka 'ën kakësa okin 'aisamatania. 21 Usa 'ain kana, Josuénën ñukëmapain 'ixun raíri chikíanan 'ama ëmakama rairi a chikintima 'ain.” 22 Ësokin 'akin ka Nukën 'Ibun israel unibunëx kara aín chaitiokëkama 'iásai ami sinania kara ami sinanima kixun istisatankëxa. 23 Usa 'ain ka Nukën 'Ibun atu rapasu 'ikë bëtsi menu 'ikë unikama a kamaira Josuénën chikínun 'amiama 'ikën, 'amikinma ka raíri ëmakama chikinxuma 'anun 'imiakëxa.