4 A nëtëkaman ka Débora Lapidotnën xanu an Israelkaman ñu 'atima 'aia aín 'apu 'ixun mëníoxuankëxa. 5 Usa 'aish ka anubi tsókë 'aish Débora ax kuanx kuanx xëbin nikë tëmú tsókë xanu 'iakëxa (usa unánxun ka “Déboranën xëbin kakin anëakëxa”) ax ka Efraín unikaman me Ramá 'imainun Betel an nëbë́tsiorakë ëma anu 'iakëxa, anu 'ain ka Israelkamax uix kara nishanani 'atima onanxa ax an mëníoxunun anu kuankëxa.

6 Achúshi nëtën ka Déboranën Barac kakë uni Abinóamnën, Quedes kakë ëma achúshi anua Neftalí ñaká unikama bukukë anua katánun xukin ësokin kakëxa: Israelkaman 'Ibu 'imainun ain Dios ax ka ësokinmi 'anun kiaxa: Aín bashi Tabor kakë anu kamina diez mil Neftalí 'imainun Zabulón unikaman suntáru anu timëti 'ain. 7 'Ën kana Sísara 'apu Jabín ain suntárunën kushi axa, Quisón kakë xëxá anuax mitsubë 'akanankin atun caballonën nikinkë anuax 'akánanti a 'imainun ain suntárukamabi bëi unun 'imiti 'ain. 'Aínbi kana 'ën mitsunmi kupitanuma 'anun 'amiti 'ain, ka Dios kiaxa. 8 —Asabi ka mixmi 'ëbë kuankëbë kana kuanti 'ain, —kixun ka Baracnën kakëxa—. 'Aínbi kana mixmi 'ëbë kuankëbëma kuantima aín. 9 —Usa 'ain kana mibë kuanti 'ain —kixun ka Déboranën kakëxa—. 'Aínbi ka ënë 'akanania achúshi xanúan Sísara 'anun Nukën 'Ibun 'amiti 'ikën, usa 'ain kamina abë 'akanankin 'atankëx 'ën kana a unikama 'a kiax kitima 'ain.

Usai pain kanankiani ka Déborabë Barac Quedes kakë ëma anu kuankëxa. 10 Anuxun ka Baracnën Zabulón 'imainun Neftalínën unikama anua ax 'ikë anu kuanun kixun kamiakëxa, kamikëx aia ka Baracnën aín kushi 'ixun diez mil suntáru timëakëxa. Timëbiani kuankëbë ka Débora abë kuankëxa. 11 Quedes kakë 'urama anua in papa chaiira nikë Saanaim kakë me anu ka Héber kakë quenita uni ax tsóakëxa, ax ka aín aintsi quenita kamabë ënanan 'aish axi tsókë uni 'iakëxa, ax ka Moisésnën kukun bakë bëchikënën rëbúkinkama 'iakëxa.

12 Usaia aín bashi Tabor kakë anu kuankë a ñui kia ka Sísaranën Barac kuakëxa, 13 kuakin ka anribi kamabi aín suntárukama 'imainun novecientos caballonën nirinkë anuax 'akánanti manë 'akë akama buani Haróset-goím anuax kuankëxa, kuantankëx ka Quisón kakë xëxá anu bëbakëxa. 14 Usa 'ain ka anu bëbaxun Déboranën Barac kakëxa:

—¡Bërí nëtën kamina min suntárukamabëtan Sísara 'ai kuanti 'ain, Nukën 'Ibun ka min mi 'anun mi 'amiti 'ikën! ¡Nukën 'Ibun ka atua 'anun min suntárukama 'akinti 'ikën!

Usokian kakëx ka Barac aín bashi Tabor kakë anuax aín diez mil suntárukamabë kuabuakëxa, 15 kuabutankëx atubë 'akananiabi ka Nukën 'Ibun atun suntárukama 'imainun axa anuax 'akánanti manë 'akë caballonën nirinkë anuax 'akanankë Sísaranën suntárukama 'aisamaira rakuë́ti aín manë xëtokën Baracbë 'akananima abánun 'imiakëxa; usai 'ikëbë ka Sísaranëxribi anuaxa 'akanankë caballonën nirinkë anuax 'ibukiani abákëxa. 16 Usaia 'imainun ka Baracnën aín suntáru 'imainun axa caballonën nirinkë anuax 'akanankë anun kuaniabi nuibiankin Haróset-goím kakë anubi bëbarukin 'akëxa. Usakin ka a nëtën Sísaranën suntáru achúshibi kuaintanuma kamabi këñukin 'akëxa.

17 Jabín kakë 'apu Hasor ëmanu 'ikë ax ka Héber quenita aín aintsikamabë upí 'iakëxa, usa 'ain ka Sísara ax abati kuanx Hébernën xanu Jael kakë aín xubunu bëbakëxa, 18 bëbaia iskin ka kakëxa:

—'Ën 'Ibu 'ën xubunu kamina rakuë́tima atsínti 'ain. Kakëx ka aín xubunu atsímiakëxa anua ka Sísara Jaelnën chupa achúshitan mapukin unëakëxa; 19 usakian 'akëxun ka Sísaranën shimairaxun 'umpax ñukákëxa. Ñukákëxun ka Jaelnën anua leche 'arukë ñuina xaká a mapëntankëxun bixun na xëanun 'inánkëxa; 'Inántankëxun ka amiribishi amia xëakë a maputëkëankëxa. 20 Maputankëxun ka Sísaranën kakëxa:

—Min xubusokin chupa këxtú 'akë aín xëkuënubi kamina bërúti 'ain anuxun kamina uni ukian min xubunu kara uni ukëma 'ikë kixun ñukákëxun kamina ënu ka uíxbi ukëma 'ikë kixun kati 'ain. 21 Usakin katankëx ka Sísara nibaiti atsanx tënëtisamaira tani 'aímai napëkëti 'uxakëxa. Usai 'uxan ka Jaelnën martillo achúshi 'imainun ami xubusokin chupa këxtú 'akë tëkërëkati nitsínti 'akë manë xëtokë a bibiani ñuitsima anua Sísara 'uxkë anu kuankëxa, kuanx nirakëkinshi ka manë xëtokë anun aín bëmánan pëánkabianxun memi takáshkakin 'akëxa. Usakin 'akëx ka Sísara ñuakëxa.

22 Usakin 'anbi ka abákë Sísara baribiani kuanx ami bëbaruia iskin ka, Jaelnën Barac kakëxa:

—Ënu ka ami barikë uni a 'ikë mi isminun kamina uti 'ain. Kakëx xubusokin chupa 'akë anu atsínkibi ka Sísara aín maxkánu manë xëtokën pëánkabianxun memi takáshkakin 'akëxa ñukë rakákë mërakëxa. 23 Usa 'ain ka Nukën 'Ibun cananeo unikaman 'apu Jabín axa Israel unibu kikësa 'oíshi 'inun 'imiakëxa. 24 Usa 'ain ka a nëtëkaman Israel unibunën atian ira ñusmoxun 'akian Jabín aín unikama këñunbi 'atimonun 'amiakëxa.