Débora 'imainun Barac cananeo unikama abë́ 'akanankin kupitanuma 'atankëx kanta bana
5
A nëtë kaman ka Débora 'imainun Barac Abinóamnën bakë bëchikë ax ësaiki kantakëxa:2 Kamaxunbi ka Nukën 'Ibu rabikan, Israel unibunu ka axa 'akanani kuainsa unikama 'ikën; usa 'aish ka Israel unibunu 'akanani kuanti ka kixuan aín 'apun kakëx kuantishi 'ikën.
3 ¡'Ë kamina kuati 'ain, 'apuirakama! ¡'Ëx kimainun kamina bëtsi ëmanu 'ikë 'apukama mitsun kuati 'ain! ¡'Ëx kana Nukën 'Ibu rabi kantain! ¡Kantai kana Israel unikaman Dios a rabi kantain!
4 Seír kakë me anuax chikíkiani mix kuankëbë ka me shaíkimainun naíkamë 'ëo shaíkiakëxa, 'imainun ka naí kuin masákuatsinkë anuax 'uñe 'ibúakëxa.
5 Mix Nukën 'Ibu 'ianan israel unibunën Dios 'ain ka aín bashi Sinaí ax shaíkiakëxa.
6 Anúan Samgar Anatnën bëchikë tsóa a bari 'imainun, Jael tsóa a barikaman ka israel unikamax anúan nikë bai a 'imainun amo pátsinkiani nitsi me 'aisama anunbi nikiani kuankëxa;
7 usai 'ikëbë ka anua Israel unikama 'ikë aín ëma chukúmakama ax uniñuma ñankáishi 'inun bërúakëxa. Usai 'ikëbëtan kana 'ën Israelkama 'akinti sinánkën. ¡Usa 'ain kana Débora 'ën aín titasa 'ixun Israel unikama 'akinti sinánkën!
8 “Usa 'ain ka raíri unikama an bëtsi dios rabiti kuëënkë anu 'ain, atux xëkuënua 'akanantishi 'iakëxa. Usa 'ixun ka uínbi aín manë pará 'imainun aín paka pia xëtokë achúshirabi cuarenta mil uni 'ixunbi Israel unibunën ami katamënuxun biama 'ikën.
9 ¡'Ën kana Israelkaman 'apukama asábi ka kain, atux ka 'ën 'akánanti unun kamikëx uax 'akananxa! ¡Usa 'ain ka kamaxunbi Nukën 'Ibu rabikanti 'ikën!
10 Mitsux kamina kiti 'ain, uni ñuñu axa burro aín xanu uxuanën kaxunu tsókë 'imainun ñuñuma uni axa nishikë kamaxribi ka kiti 'ikën:
11 ¡anuxun ñuina 'umpax xëamikë anu kuanxun kamina, manë pará rabë́ bëtsimi tsarankakín ransai banakin Nukën 'Ibun mitsu 'akinkë ñukama ñuiti 'ain, 'imainun ka raíri ëmanu 'ikë unikama axribi ësai kiti 'ikën!
12 ¡Kamina bësuti 'ain Débora kamina bësuti 'ain, bësui kamina achúshi kanta Dios rabi kantati 'ain! ¡'Imainun Barac Abinóamnën bakë bëchikë minribi kamina ami ñatankë unikama aribi buánti 'ain!
13 Usa 'ain ka Israel unibunëx abë 'akanania ukë kushiira suntárukamabë 'akanani kuabuakëxa; kuanx ka 'ën kuënkë́xa ukë Nukën 'Ibun suntárukama ax ka 'akánanti 'unan unikamabë 'akananxa.
14 Raíri Efraínnën unikamaxa anuax 'akánanti me anu ukëbë ka atu kaxú Benjamínën suntárukamaribi uaxa. Ukëbë ka Maquir aín 'apukamabë umainun Zabulón axribi aín 'apukamabë uaxa.
15 Kuamainun ka Isacarnën 'apukamaribi Débora buani abë kuankëxa; kuani ka Isacarnën unikama Barac 'akini anuaxa 'akánanti me anu kuankëxa.
Kuankëbëbi ka Rubénën rëbúnkikama aín sinan kushibu 'akanainsabu 'aíshbi tikiakëxa,
16 ¿uisa kupín kara an ñuina bërúankë unikaman aín ovejakama kuënia kuatíbi bërúax? ¡Rubénën rëbúnkikamax ka chaiira unibu 'aish aín sinan kushibu ami katamëisa 'aíshbi rakuë́ti bëruaxa!
17 Galaadnu 'ikë unikama axribi Jordán kakë baka 'ukëmanan bërúmainun ka Dannën rëbúnki akamaxribi anua manë nunti këñurukë a rapasu bërúakëxa, 'imainun ka Asernën rëbúnki atúxribi parúmpapa kuëbí bërúax kuainima aín butunubi 'iakëxa;
18 'aínbi ka ain bashi matán me anuax Zabulón 'imainun Neftalí ain suntárukamabë bamati tana 'akananxa.
19 Usa 'ain ka abë 'akánanti 'apukama ax Taanac kakë ëma 'imainun Meguido kakë rapasua 'ikë xëxá anu kuankëxa, kuankinbi ka cananeo 'apukaman Israel unikama abë 'akanankin atu 'axun aín ñu biti sinanx kuankin atún ñu buanima 'ianan aín manë uxuabi buánma 'ikën.
20 Naíkamë 'ëo anua 'ikë anuaxbi ka 'ispa Sísara abë 'akanankin uni 'amainun nirakëakëxa;
21 Quisón kakë xëxá bërámabi unia an 'uñe 'ibúkian ñu tërënbiankë usaribi okin ka atu 'akëxa. ¡Mix xëxá 'ixun kamina axa mibë 'akanani ukë unikama aín kushibu këruti banaima abátanun 'imiakën!
22 ¡Usa 'ain ka caballokamax abákin aín taën me pënkakin banamikë ax 'insaira 'iakëxa!
23 Usai 'ikëbë ka Nukën 'Ibun ángel ësai kiaxa: ¡'Ëx kana Meroz kakë ëma 'imainun anu 'ikë unikama 'atimokë 'iti kuëënin! Atux ka axa 'akanani kuankë unikamasaribi 'ixun 'akanania Nukën 'Ibun unikama 'akini kuankëma 'ikën.
24 ¡Jael ax ka bëtsi xanukama samaira 'aish rabikë 'iti 'ikën, ax ka Héber quenita uni aín xanu 'ikën! ¡Ax ka abëa tsókë xanukama samaira 'ikën!
25 Jaelnën ka Sísaranën aín 'umpax ñukákëxunbi; aín vaca xuma 'inánxa. ¡'Inánan ka sëruakin vaca xuma 'akë aribi ain xampa upirami 'inánxa!
26 'Inánkëxuan xëamainun ka mëkën mëmiunën ami chupasa okin 'akë tëkërëkati manë xëtokë a bianan aín mëkën mëkeu anun ñu matásti mamúokin manë 'akë a bixun anun Sísara aín bëmanamixun memibi takáshkakin matáskin 'axa.
27 Usakia aín 'uxkënuabi Jaelnën 'akëx ka Sísara tarishki kushi pënkërakëbëkini 'itankëx ñuaxa.
28 Usakin 'akëxa aín tuá Sísara panákëbëtan ka aín xubu xëkuë chukúmanën kara aia kixun iskinbi aiama oi bënëti ain tita kiakëxa: ¿Uisa kupín kara aín caballonën nikinkë ñun bënëti aíma panatin? Aín caballonën nikinkë ñu taëkama sapi ka ramianan ëchikianan kia usa 'ain sapi ka panatia.
29 Usai kia kuakin ka an ñu tankë xanukaman ësokin kakëxa kakëxbi ka atux kikësaibi ësai kítëkëankëxa:
30 'Ën sinánkëx sapi ka 'akanankian bikë ñukama pain 'inánani 'ia. 'Ianan sapi ka xanu bixun an ñu mëëxunti achúshi 'inánkinma xanu rabë́ rabë́ axa 'akanankë unikama 'inani 'ia; 'ianan sapi ka Sísara aín chupa bëtsi bëtsi okin pukukë aribi achúshi 'inánkinma rabë́ 'inani 'ia 'ianan kara chupakama upíokin kuënëokë, an ira uni 'akëkama anúan tëtata kinun 'inani sapi ka 'ia kiax ka kiakëxa.
31 ¡Nukën 'Ibu 'ëx kana axa min unikamami nishkë unikama këñuti kuëënin, 'imainun ka an mi nuibakë unikamax upitax bukui barin urukin aín kushin pë́kabëtsinkësa usaribi 'iti 'ikën!”
Usai 'iaxa sënë́an ka cuarenta baritia 'imi a menuax 'akanantëkënima upitax buküakëxa.