7 Usakian israel unibunën Nukën 'Ibu madianita unikaman tëmëramikëxun 'akinun ñukákëxun ka 8 an achúshi uni an Dios kikë bana uni ñuixunti xuakëxa: Ësakin mitsu kanun ka Israel unibunën 'Ibu 'imainun 'ain Dios kiaxa: 'Ën kana mitsu Egipto menu tsókëpan 'aish 'aisamaira tëmëraiabi chikiankën, 9 'imainun kana mitsuishi egipcio unibunua chikinkima, an mitsu 'atima oisatankë unikama aribi chikiankën. Atu mitsun ismainunbi chikíkin kana anua tsókë unikama ain me mikama 'inánkën. 10 'Imainun kana 'ëx mitsun 'Ibu Dios 'ai kixun kana mitsu kakën, usa 'ain kamina amorreo unikaman rabikë aín dios ami rakuë́kantima 'ain, kamina bërí atun menu tsótan; 'aínbi kamina 'ën mitsu kakësabiokin 'akëma 'ain.

11 Usa 'ain ka Nukën 'Ibun ángel achúshi uax Ofrá kakë ëma anua 'ikë in papa tëmú tsóakëxa, ax ka Joás kakë uni Abiézer ain rëbúnki ainan 'iakëxa. Anuxun ka Gedeón kakë uni Joásnën bëchikë an aín trigo unëxun tákakëxa, anuxun ka uvas aín baka xëati biti chakakë anuxun ka madianita unikaman isma mëraia kiax rakuë́ti unëxun ka usakin 'akëxa. 12 'Akëbë ami mërakin ka Nukën 'Ibun ángelnën kakëxa: ¡Nukën 'Ibu ka mibë 'ikën, usa 'ain kamina uni rakuëma 'ianan kushi sinánñu 'iti 'ain! 13 Kakëxun ka Gedeónënribi kakëxa:

—'Ën 'Ibu ësokin kana mi kain Nukën 'Ibu ka nubë 'ikën, ¿Uisa kupín karanuna nux ënë ñukama ësai inutin? ¿Uinu kara an nun chaitiokëkama Egipto menua chikínkin bëtsi bëtsi ñu 'axuan 'ikëa nu ñuixunkë Nukën 'Ibu Dios ax 'ik? Nukën 'Ibun ka madianita unikaman 'atimonun nu ëankëxa. 14 Ësokian kakëxun ka Nukën 'Ibun ángelnën bëískin kakëxa:

—Mix kamina 'aisamaira kushiñu 'ain, usa 'ain kamina madianita unikaman Israelkama 'aisamaira okë a isti 'ain. 'Ën kana mi kuantanun xuti 'ain. 15 'Aínbi ka Gedeónën amiribishi katëkëankëxa:

—'Ën 'Ibu amiribishi kana mi katëkënin, ¿uisaxun karana 'ën Israelkama ië́nun 'akinti 'ain? 'Ën aintsi Manansésnën rëbúnkikama atux ka ñuñuma unibu 'ikën, usa 'ain kana usa 'ën aintsikama 'ain 'ëx usa ka a uni 'ikë kixun unin kaisama 'ain. 16 Kiabi ka Nukën 'Ibun ángelnën katëkëankëxa:

—Kamina 'ati 'ain 'ën kana minmi 'aia mi 'akinti 'ain. Min kamina madianita unikama 'akin achúshi unira 'akësokinshi 'ati 'ain. 17 Ësokian kakëxun ka Gedeónën amiribishi kakëxa:

—Asabi ka mix kuëënkin kamina asérabi kara Diosan mi xuaxa isnun kamina achúshi ñu 'ë 'axúnti 'ain, usakin 'axunkëxun kana asérabi kamina 'ëbë bana kixun 'unánti 'ain. 18 Usa 'ain kamina ënuxunbi kuankinma 'ën mi 'inainshitisa tankë ñu bitamainun kaínti 'ain. Usakian kakëxun ka Diosan ángelnën asábi ka kana mi aia kaínti 'ai kixun kakëxa.

19 Kabiani aín 'ikënu kuanxun ka Gedeónën achúshi cabranën tuá rëxun mëníonan, veinte litrobëtan sënë́nsa harina anun chamiti ñu këñuma pán 'akëxa; 'atankëxun ka aín nami tasánu 'aruanan aín baka bikë a kënti achúshinu 'aruakëxa, 'arubiankin ka anua in papa 'ikë a tëmú akamabi buani kuankëxa. 20 Buánkë ka Diosan ángelnën mapara kamanan aín nami nanan pán anun chamiti ñukëñunma 'akë aribi nania amibia aín baka ampë́nkanun kixun kakëxa. Usokian Gedeónën an kakësabiokin, 'an ka 21 ángelnën aín tsati rëbun nami 'imainun pánkama a tikakëbëshi maparanuax rëkirukin tsin nami 'imainun pán këñukin xarokëxa; xarokëbëa aín bërunuaxbi Nukën 'Ibun ángel nëtë́tia ka Gedeónën istëkëama 'ikën. 22 Usai 'ia iskin Nukën 'Ibun ángel ka asérabi ax 'iaxa kixun sinani ka Gedeón kiakëxa: ¡'Ën 'Ibu 'ëx kana min ángelbë 'ën 'unánkë unibë 'ikësai asérabi isi kanan! 23 Kia ka Nukën 'Ibun ësokin kakëxa:

—Rakuëama ka 'ik, kamina ñuiman. 'Ën 'imikëx kamina chuámarua tani kuëënti 'ain. 24 Ësokin kakëxun ka Gedeónën anuxun ñuina xaroti achúshi anubi 'atankëxun anuxun Nukën 'Ibu rabikin xarotankëxun; “Nukën 'Ibuinshi ka nu chuámarua 'imia kixun kakin anëakëxa. Anuxun ñuina xaroti Gedeónën 'a ax ka bëríbi anua Abiézernën rëbúnkikama 'ikë Ofrá kakë ëma anu 'ikën.”

25 Usakian 'akë a imë́bi ka Nukën 'Ibun Gedeón kakëxa:

—Min papan 'arakakë vacanua kamina aín bënë achúshi bianan, bëtsiribi mapai achúshi 'imainun rabë́ baritia ñu biti 'ain, bitankëxun kamina min papan anuxun Baal ñuina xaroxunti 'akë a rurupanan, kamina i tëakë upíokin mëníoxun nankë anuxun ñuina Baal xaroxunti rapasu nitsínkë aribi nipati 'ain, 26 'imainun kamina anua 'ikë aín bashi manámi anubi anuxun ñuina xaroti achúshi min Dios 'axúnti 'ain. 'Atankëxun kamina, vaca ain bënë bëtsi pain bitankëxunmi tsiankin bikë a 'ë 'aímai këñutanun xaroxunkin i upí a rabikë 'ikëbi nipakë abi karuaxun anunbi xaroti 'ain. 27 Usakian kakëxun ka Gedeónën mapai rabë́ aín uni bitankëxun Nukën 'Ibun kakësabiokin kamabi ñu 'akëxa; 'akin ka nëtë́n 'akinma aín papan aintsikama 'imainun a ëmanu 'ikë unikamami rakuë́kin imë́ribi 'anëakëxa. 28 Usokin 'anë́kë 'ain ka pëkarakëma 'aínshi nirukinbi ka a ëmanu 'ikë unikaman anuxun Baal rabikin ñuina xarokë a rurupanëkë mërakankëxa, mëranan ka anuxun ñuina xaroti rapasua 'ikë i upíira nitsínkë aribi pakëti tëkëbukë aribi mëranan, anuxun ñuina xaroti bëtsi bënokin 'axuan anuxun vaca bënë xaronëkë mërakëxa. 29 Usokin 'anë́tia mërai ratuti ka bëtsibë bëtsibë ñukákanani kanankëxa: ¿Uin kara ësokin ñu 'anë́tin? Usai kanankin uin kara 'axa kixun pain ñukákin puntëkinbi ka Gedeón Joásnën bakë bëchikë an ka axa kixun 'unánkankëxa, 'unánbiani anu kuanxun ka aín papa Joás kakankëxa:

30 —Min bakë bëchikë kamina rëtënun nukama 'inánti 'ain. ¡An kaisa Baal rabikin anuxun ñuina xaroxunti a rurupanan a rapasu nitsínkë i upíira aribi tëkëbutanun nipanëtia! 31 Kiabi ka Joásnën anu rikuatsinxua an kakë unikama kakëxa:

—¿Mitsux kaina Baalnën rabanan në́ti anun rabanan mëëananti 'ain? ¡'Ëx kana kuëënin uix kara Baalnën rabanan në́tia ax ka pëkarakuatsínkëma 'aínshi ñukë 'iti 'ikën! Baal ax Dios 'ixun ka anuxun a rabiti rurupakë a abi mëníoti 'ikën, ax ka anuxun a rabikë 'iakëxa. 32 Usokin anuxun 'akë ka Gedeón 'ikëbi Jerubaal kakin anëi ësai kikankëxa: “Baalnëx ka abi bërúankati 'ikën,” Gedeónnëbi ka anuxun Baal ñuina xaroxunti a rurupaxa.

33 Usakian 'an ka madianita unikama 'imainun amalecita unikama 'ianan amiaxa bari urukëmiaxa ukë unikama, timëtankëx Jordán kakë baka sikarakëkianx Jezreel kakë me sapan anu 'ikankëxa. 34 'Aínbi ka Nukën 'Ibu bëru ñunshin upitan Gedeón abë 'ixun 'akiankëxa, 'akinkëxun carnero manchan banokëbë ka Abiézernën rëbúnkikama timëakëxa; 35 timëmainun ka aín ñakánuaxa Manasésnën aintsikamaribi timë́ti unun kamiakëxa. Kamianan ka aín ñakánuaxa Aser, Zabulón, Neftalínën rëbúnkikamax abë timëti unun kixun kamiakëxa, kamikëx utankëx ka abë timë́kankëxa.

36 Usaia 'ian ka Gedeónën Dios kakëxa: “Asérabi kaina 'ën aintsi Israelkama 'akinun 'ë 'akinti 'ain, mixmi kikësabiokin, 37 isnuxun kana carnero xaká achúshi aín rani këxtuira anuxun trigo tákakin mëníoti 'akë anu nanti 'ain. Nankëa nibitan pëkarakëma 'aínshi 'ibúkin chabókë, 'aínbia anu nankë me ax chabákëma 'ain kana 'ën 'unánti 'ain asérabi kamina 'ën Israelkama ië́minun mix kikësabiokin 'ë 'akinti 'ai kixun ka kakëxa. 38 Usaia asérabi 'ikë ka. Pëkarakëma 'aínshi nirukianxun Gedeónën tasun achúshimi buákakin chininkin nibí an ñuinanën xaká chabókë a biakëxa. 39 Usakin 'atankëxunbi ka, amiribishi Gedeónën katëkëankëxa: 'Ën amiribishi katëkënkëx kamina 'ëmi nishtima 'ain. 'Aínbi kana ashikin mi ënë imë́ tantëkënti 'ain. Ënë 'atëkënkin kamina ñuina xaká a chabókima anu nankë meshia nibitan chabónun 'imiti 'ain.” 40 A imë́bi ka Diosan usakinbi 'axuntëkëankëxa. 'Akë a pëkarakëbë ka ñuina xaká noonkë ax chabákëma 'imainun anua noonkë me axëshi nibítan chabónëkë 'iakëxa.