Gedeónën aín suntárukamabëtan abë 'akanankin kupitanuma madianita unikama 'a bana
7
Gedeón 'ikëbi Jerubaal kakinribi anëkë ax ka abëa 'ikë aín suntárukama pëkarakëma 'aínshi tsuákarubiani kuantankëx anua Harod kakë anubia unia 'umpax 'ikë 'urama anu bukubuakëxa. Anua atux 'imainun ka madianita unikama ax aín tsipumi anuaxa aín bashi Moré kakë pëukukë me sapan anu 'iakëxa. 2 Anuxun ka Nukën 'Ibun Gedeón kakëxa: “Uisati kaina 'aisamaira israelnën suntárukama min bëan, abë 'akanankin madianita unikama 'atankëx ka nubi kananuna 'a kiax anun rabiti 'ëmi manukanti 'ikën. 3 Usa 'ain kamina min suntáru raírikama uix kara 'akanantimi rakuë́tia akama aín 'ikënu kuantanun xuti 'ain.” “Usakian kakëxun ka Gedeónën aín suntárukama tankëxa tankëxa veintidós mil kuantamainun ka diez mil suntáru bërúakëxa.” 4 'Aínbi ka Nukën 'Ibun Gedeón amiribishi katëkëankëxa: 'Itsaira ka min suntárukama bërutëkëanxa. Usa 'ain kamina 'umpax xëanun buánti 'ain anuxun kana 'ën uikamax kara mibë kuanti 'ikë 'imainun uikamax kara kuantima 'ikë a 'ën mi kati 'ain. 5 Kakëxun ka Gedeónën aín suntárukama Diosan kakësabiokin 'umpax xëanun buánkëxa. Buánkë ka Nukën 'Ibun kakëxa: An aín mëkënan bixun kamunan 'akësa okin 'umpax xëakë a kamina amo sëtë́nati 'ain, 'anan kamina an rantipuruni tsóxun 'umpax 'akë aribi amo sëtë́nati 'ain. 6 An mëkënan bixun 'umpax xëakë 'imainun an tsóxun 'umpax xëakë akamax ka trescientos suntárushi 'inun bërúakëxa. Usa omainun ka aín patsanën rantipuruni tsóxun 'umpax xëakëxa. 7 Usokian 'akë ka Nukën 'Ibun Gedeón kakëxa: Ënë trescientos suntárukama bëtainshi kana mitsu ië́mikin madianita suntárukama 'amiti 'ain. 'Amainun ka aín patsan raírinëx aín 'itinubi rikianti 'ikën. 8 Usokin Diosan kakëxun ka Gedeónën aín patsan atun xubusa okin 'akë anua rikiantanun kixun xuakëxa; xukëxa rikiankëma 'aínshi ka amia atun 'umpax nikinkëkama a bianan atun carnero mancha aribi bixun atu xutankëx ka. Trescientos suntárukama kaískë a kamabëshi anua madianita suntárukama 'ikë me sapan a inubiani kuanx a 'uri 'ikankëxa. 9 A imë́ ka Nukën 'Ibun Gedeón kakëxa: “Ënuax kuanxun kamina madianitakama 'ai kuanti 'ain, 'ën kana mitsunmi abë 'akanankin abámikin 'anun mitsu 'amiti 'ain. 10 'Aínbi kamina atu 'atimi rakuë́ti, anua 'ikankë anu pain min kaniokë Purá abë kuanti 'ain, 11 anuxun kamina uisai kara mimi nishkë unikama kia kuati kuanti 'ain.” Kuakin kamina abi kana 'ati 'ai kixun kushiokin sinánti 'ain. Ësokian Diosan kakëx ka Gedeón an kaniokë Purá abë anua abë 'akánanti unikama 'ikë me sënënakëkë anu kuankëxa. 12 Usai 'imainun ka, madianita unikama 'imainun amalecita unikama 'ianan amiaxa bari urukëmiaxa ukë unikama atux me tsitsibiani champu 'itsa iskësaira kiani kuankëxa. 'Imainun ka atun camellokamax 'aisamaira 'aish parúmpapa kuëbínua masi bëru iskësaira 'iakëxa. 13 Usai kuanx abëa 'akánanti unikama bukukë anu bëbakin ka Gedeónën, suntáru achúshinëa aín namákë bëtsi ñuixunkin ësokin kaia kuakëxa:—'Ën kana achúshi pán cebada 'akë axa taramëkë kuatsini 'ai ami 'ikin anunu 'ikë nun xubusa okin chupa 'akë nipatia namákin isan. 14 Kixuan ñuixunkëxun ka suntáru itsin bëtsi kakëxa:
—Ax ka bëtsi ñumi namákëma 'ikën, Gedeón suntárunën kushi Joásnën bëchikë israel uni an ka Diosan 'amikëxun nubë 'akanankin nun 'ikënubi bëbarukin nu 'ati 'ikën. 15 Ësokia bëtsin aín namákë ñuixunia kuaxun ka, Gedeónën Nukën 'Ibu rabiakëxa. Rabitankëx ka anua israel suntárukama bukukë anu kuanxun atu kakëxa:
—¡'Akanani kuanti kamina mëníokakanti 'ain, Nukën 'Ibun ka madianita unikama 'anun nu 'akinti 'ikën! 16 Ësokin kakinshi ka trescientos aín suntárukama rabë́ 'imainun achúshi 'inun sëtë́nakin nitsinakëxa a kamabi atun carnero manchan 'inánan ka amia 'umpax nikinkë ñankáishi amia tiríoxun tsi buánkë aribi 'inánkëxa. 17 'Inánkin ka atu kakëxa:
—'Ëx abënu 'akánanti unikama bukukë 'ukëmanan anu bëbarukin 'ën 'aia iskin kamina uisakin karana 'ai usaribi okin 'akánti 'ain. 18 'Ën 'akëbëtan ka ax 'ëbë kuankëkaman carnero manchan banoia kuakin kamina mitsunribi anua 'ikankë a bëararakin mitsun carnero manchan banoti 'ain, banoi kamina munuma kuënkëni sharati kikanti 'ain: ¡Nukën 'Ibu ñui kianan kamina Gedeónribi ñui sharákanti 'ain! 19 Usakin atu kabiani ka Gedeón aín cien suntárukamabë kuanx anua abë 'akánanti unikama bukukë 'ukëmanan anu bëbakëxa, bëbai ka anua abëa 'akánanti suntárukama atun pain bërúanëkë axa kuanmainun raírinëxribi bërúain uti hora 'urama imë́ naëx 'ain ka Carnero manchan buánkë akama banonan amia 'umpax nikinkë ñankáishi akamaribi tukapakëxa, 20 tukapati ka rabë́ 'imainun achúshi akamaxunbi sënën sënëbi 'itánun carnero manchan banonan amia 'umpax nikinkë akamaribi tukapakëxa. 'Akin ka tsi tiríokësa 'inun tiríokë a buánan aín mëkeu carnero manchan buani munuma sharati kikankëxa: “¡Bërí kananuna 'akananin! ¡Nukën 'Ibu 'imainun Gedeónën nu 'akinkëx!” 21 Usai sharati kitankëxa israel unikama anuaxa sharákë anuax nëtë́ti bukubukëbëshi ka madianita suntárukamax atumi rakuë́ti sharákiani kuani anua 'ikë anuax abákankëxa, 22 usai kuankëbëtan ka trescientos Israel suntárukama an ënkinma atun carnero manchan banokëxa, banokëbë ka axa abákëmakama ax Nukën 'Ibun 'imikëx atúxbi 'akanankëxa, 'akanani abati ka raírinëx anun Sereránu kuanti bainu 'ikë Bet-sitá kakë ëma anu bëbakëxa, 'imainun ka raírinëx anua Abel-meholá kakë ëma aín me sënënakëkë Tabat kakë ëma 'ikë abu kuankëxa.
23 Usai 'ikëbëtan ka Gedeónën Neftalí Aser 'imainun Manasés aín suntárukamaribi bëi uxuan madianita suntáru abatia nui unun kixun kamiakëxa. 24 Usa 'ain ka Gedeónën aín suntáru Efraínën rëbúnkikama aín menuax 'akanani unun kamina ësokin kai kuanti aín kixun uni kakëxa, madianita unikamabë 'akanani ukian Jordán kakë baka anun sikatisa a bëaranan Bet-bará kakë ëma aribi atux anu bëbakëma 'aínshi uxun bëaranun kixun kati 'ain. Kakëxun ka Efraínën unikaman usakinbi 'akëxa, 25 'akin ka madianitakaman 'apu rabë́ Oreb kakë 'imainun Zeeb kakë a ñatankankëxa. Usakin 'axun ka Oreb kakë 'apu chaiira mapara anuxun rëtëkankëxa anuxun rëtëa 'ikë ka Orebnën mapara kakin anëa 'ikë 'unánkania. Zeeb kakë 'apu anuxun 'akë aribi aín anënbi anëakëxa, ax ka anuxun uvas aín baka biti chakati 'akë anu 'iakëxa. Usakin madianitakama 'atankëx kuankin ka Oreb 'imainun Zeeb aín maxká Gedeón buánxunkankëxa.