—¿Mitsunmi 'ën 'akësamaira okin 'akë a kaina sinaniman? Mitsúnmi 'itsamashi 'akë ax ka nun nu 'itsaira 'akë usamaira 'inunmi 'akankë 'ikën. 3 Diosan ka mitsu madianitanën 'apu Oreb 'imainun Zeeb 'anun 'amiaxa. ¿Añu karana 'ën mitsun akëbëtan sënë́nmaira 'itánun 'an? Ësakin Gedeónën kakëxun kuati ka Efraínën rëbúnkinën suntárukama atúxa xuamati nishkë tantibuakëxa.

4 Usa 'ain ka Gedeón 'imainun aín trescientos suntárukama abë 'akanankë unikama nuibiani kuani 'aisamaira atsánkë 'aíshbi Jordán kakë baka bëbatankëx sikarakëakëxa. 5 Sikarakëxun ka Sucot ëmanu tsókë unikama Gedeónën atun ñu ñukákin kakëxa: 'ëbë ukë suntárukama kamina 'aisamaira abë 'akanankë unikama nuibaëxax atsanxa usa 'ain kamina mitsun ñu tani nanxun na pinun 'inánkanti 'ain kixun kakëxa, nux kananuna madianita 'apu Zébah 'imainun Salmuná nui 'itsaira nibaixan. 6 Ësokin kakëxunbi ka Sucotnu 'ikë 'apukaman Gedeón kakëxa: ¿Nun piti 'inánun kara min suntárukaman Zébah 'imainun Salmuná ñatanbëtsinkin bëat? 7 Kakëxunbi ka Gedeónën atu kakëxa: Asabi ka usa 'ain kana Nukën 'Ibun 'ë 'akinkëxun Zébah 'imainun Salmuná kakë 'apu ñatanbëtsini 'ëx utëkënkin kana anu uni 'ikëma menu 'ikë muxa pëñan bitsini ukin mitsun namibi anun tukapakin raëxpati 'ain. 8 Ësokin kabiani Penuel kakë ëma anuribi kuanxun ka Sucot ëmanu 'ikë unikama 'akësaribi okin ñukákëxa: Ñukákëxunbi ka Penuelnu 'ikë unikamanribi Sucotnu 'ikë unikaman 'akësaribi okin kakëxa, 9 kakëxun ka aturibi Gedeónën kakëxa: Uínsaran karana abë 'akanankin unikama 'abëtsini utëkëni anun kana mitsun ëmanu 'ikë torre ënë rurupati 'ai kixun ka kakëxa.

10 Usaia 'imainun ka Zébah 'imainun Salmuná Carcol kakë ëmanu mapai rabë́ 'imainun mapai achúshi mil aín suntárukamabë 'iakëxa, akamax ka amiaxa bari urukë amiaxa kuankë suntárukamaishi 'iakëxa. Atux bërúmainun ka ciento veinte mil suntárukama 'akanani këñukë 'iakëxa. 11 Usa aín ka Gedeón anu uni 'ikëma me sënënakëkë abi ratanbiani kuani Nóbah 'imainun Jogbehá kakë ëma kikiani kuarukin, atun 'unánkë 'aímabi ratuishi ami bëbarukin anua bukukë atu 'akëxa. 12 'Akëbë ka Zébah 'imainun Salmuná anuax abákëxa: 'Aínbi ka Gedeónën abatiabi ain suntárukamabëtan nuibianxun ñatankëxa, ñatankëbë ka aín suntárukama 'aisamairai rakuëkankëxa.

13 Usokin atu 'abëtsini Heres kakë bai anunbi utëkënkin ka Gedeónën bëna uni achúshi ñatankëxa, 14 uni bëna achúshi Sucot kakë anua ñatanxun ka rakuëoxun ñukákëxa: Ñukákëxun ka setenta 'ain kushibu Sucotnu 'ikë atún anë kuënëoxun 'inánkëxa. 15 'Inánkëx Sucotnu atsínkin a ëmanu 'ikë unikama Gedeónën kakëxa:

—Kamina sinánkanti 'ain, uisai kaina mitsux 'ën Zébah 'imainun Salmuná ñatankëma aín 'ëmi kuai kikan kixun. 'Ianan kamina sinánkanti 'ain, 'ën suntárukamami mitsun piti, 'aisamaira nitsi atsánkë 'ikëbi ñonkin mitsu piti 'inánnuma kamina abë 'akanankin 'apu rabë́ bëráma bitsínkin bëkëma aín kikan. ¡A kënë 'ikë kananuna bitsínkin bërí bëan! 16 Katankëxun ka anu uni 'ikëma menua bitsinkë i pëñan muxañu bëkë anun. Sucot ëmanu 'ikë aín kushibu anun mëëkin rishkiakëxa. 17 Usakin 'anan ka Penuelnu 'ikë aín torre rurupanan anu 'ikë ain unikamaribi 'akëxa.

18 'Atankëxun ka Zébah 'imainun Salmuná ñukákëxa:

—¿Uisa unibu kara mitsunmi Tabor kakë aín bashinua 'akë atux 'iakëx? Kixun ñukákëxun ka atun kakëxa:

—Mi iskësabu 'ianan ka atu achúshi achúshinëx 'apu iskëtinbu 'iaxa kixun ka atun kakëxa. 19 Usakian kakëx munuma kuënkëni ka Gedeón kiakëxa:

—¡'Ën xukë́nanbi ka! ¡'Ën xukë́n 'ibukama 'axa! Asérabi ka Nukën 'Ibu tsotia usa 'ain ka atúxribi tsotia usa 'ain kana 'ën ribi mitsu bërí rëtëtsianma. 20 Kikinshi ka Gedeónën ain bakë bëchikë apan Jéter kakëxa:

—Min manë xëtokë bitsi nirukin kamina ënë uni rabë́ 'ati 'ai kixun kakëxunbi ka Jéternën bëná 'ixun rakuë́kin ain manë xëtokë aín xakánua ëchíkin biama 'ikën. 21 Ëchitiama okin ka Zébah 'imainun Salmunánën Gedeón kakëxa:

—¡Minbi kamina nu rëtëti 'ain! ¡Axa 'akananshikë uni a kananuna aín sinan kushi 'ikë 'unanin! Kakëxun aín manë xëtokë bikin Gedeónën anun Zébahkëñun Salmuná a 'akëxa 'axun ka 'ain camello tëñumikë aín ñu upíbu a biakëxa.

22 Usokin 'akë ka israel unibunën kakëxa:

—Min kamina madianita unikaman 'atimoiabi nu 'akian, usa 'ain kananuna mi 'imainun min rëbúnkinëx nun 'apu 'iti kuëënin. 23 Kixuan kakëxunbi ka Gedeónën atu kakëxa:

—'Ë 'imainun 'ën bëchikënëxbi ka mitsun 'apu 'itima 'ikën, Nukën 'Ibux kuni ka mitsun 'apu 'iti 'ikën. 24 Usa 'ain kana 'ën abë 'akanankin ñatankë bikë unikama atun mëñusuti 'ë 'inánti kuëënin. A mëñusuti kuri 'akë ax ka anu uni 'ikëma menu 'ikë unikama suntárunën mëñukë a 'iakëxa. 25 Usokian kakëxun ka Israel unikaman achúshi tari menu 'apátankëxun kamabi atun bikë mëñusuti bëxun anu bukunkin Gedeón kakankëxa minmi nu bënun kakë mëñusutikama akënë 'ikën. 26 Usokian mëñusuti kuri 'akë a kamabi timë́këx ka diecinueve kilosa 'iakëxa, 'aínbi ka raíri ñukama anun rabunkian atun tëñuanan pañukë manë uxua 'akë 'imainun anua Madiánu 'ikë 'apukama rakukë chupa minanën pukukë akama 'imainun atun camellokama tëñumikë akama tupunkëma 'iakëxa. 27 A kurikama timë́kë ka Gedeónën achúshi ñu pará 'inun 'akëxa 'akë ka a rabikanti Ofrá kakë ëma anu nitsíankëxa, usokin 'akë ka kamabi Israelkamax efod a rabi Nukën 'Ibumi sinánma 'ikën, usakian Gedeónën 'akë ax ka ainan 'imainun aín aintsikamanan achúshi ñu 'aisama 'akë 'iakëxa.

28 Usa 'ain ka madianita unibunëx Israelkama abë 'akanankin atu kananxun atu bikë 'aish, anuax kaitëkëni cuarenta baritia sënë́mi amiribishi Gedeón a menu tsókëpan 'ain atubë 'akanantëkëama 'ikën.

29-30 Jerubaal kakë 'ianan Gedeón kakëribi uni ax ka ain ëmanubi tsóti kuankëxa, anuxun ka setenta uniakë sënë́nmikin bakë bëchipakëxa, 'ianan ka 'itsaira xanuñu uni 'iakëxa. 31 'Imainun ka achúshi xanu Siquem kakë ëmanu 'ikë an ñu 'axunkë amiribi achúshi okin bakë bëchiakëxa, bakë bëchixun ka aribi Abimélec kakin anëakëxa. 32 Usa 'ain ka Gedeón kaniakëkë 'aish aín ñuti nëtë sënënkëbë ñuakëxa, ñukë ka ain aintsikaman anua ain papa Joás ñuia maían bashi kini anubi maínkankëxa, ax ka Ofrá kakë ëma anua Abiézernën rëbúnkikama tsókë me anu 'iakëxa. 33 Usai Gedeón ñukë 'ain ka Israel unikama amiribishi amabi dios isakixun bëtsi bëtsi ñu Baal 'axunkë a rabi Diosmi manúkankëxa, manukin ka amabi Baal-berit kakë ax isa Dios 'ikë kixun sinánkin rabikankëxa. 34 Usokin ami manuxun 'ai ka ax atubë 'akanankatsi kixun sinánkë unikaman atu bëarabuinkë 'ikëbia an 'akinkë Nukën 'Ibu amira manúkankëxa, 35 'imainun ka an atu 'akinkë Jerubaal kanan Gedeón kakë uni ax ñukëma pain 'ixuan atu 'akinkë a sinanima ain aintsi 'ibukamabë nuibanani tsótima atubë nishanankëxa.