Usaia Abimélec kakë uni 'iá bana
9
Abimélec Jerubaal kakë uni aín bëchikë ax ka anua ain titan aintsikama 'ikë Siquem kakë ëma anuax atubë banai kuankëxa kuanxun ka. Ësokin kakëxa:2 —Nux kananuna aín aintsi 'ibu 'ain usa 'ain kamina Siquem ënu 'ikë unikama ësokin kakin sinanamiti 'ain, usa 'ain ka achúshi unixëshia 'apu 'imainun ka setenta Jerubaalnën bakë bëchikëkama ax achúshirabi 'apu 'itima 'ikën. 3 'Imainun ka Abimélecnën axribi atun aintsi 'ixun anu 'ikë unikama anu kuanxun a isa 'akinun kixun sinanamikin Siquemnu 'ikë unikamaribi kakëxa. 4 Kanan ka setenta kuríki manë 'akë a anuxun Baal-berit rabiti xubunu 'ikë kuríki a bixun Abimélec 'inánkëxa. 'Inákëxun a kuríki bixun ka anun Abimélecnën 'atima unikama a isa nuikin 'akinun kixun kupíokëxa. Usokëx ka a uni 'atimakama a nuibiani abë kuankëxa, 5 anua ain papa Jerubaal tsóa Ofrá kakë ëma anu kuankëxa, kuanxun ka anuxun achúshi mapara chaiira anu unëxun setenta ain xukë́nkamaishi Abimélecnën 'amiakëxa. 'Amikëbë ka aín xukë́n 'anáka Jerubaalnën bëchikë Jotam kakë axëshi istirabanan unëakëxa. 6 Usokian aín xukë́nkama 'akë ka Siquemnu 'ikë unikaman 'imainun Bet-miló anu 'ikë unikamanribi in papa tëmú Siquemnu 'ikë anu 'imainun maxax chaiira 'aish upíira anu timë́xun Abimélec atun 'apu 'inun anëakëxa.
7 Usokin aín xukë́nkama 'amitankëxa Abimélec 'apu 'ikë kuati ka aín bashi Guerizim anu mapërakëax anuax munuma kushinra kuënkëni kamabi Siquemnu 'ikë unikaman kuanun ain xukë́n 'anáka Jotam kiakëxa: ¡Siquemnu 'ikë unikaman 'ëx kia kamina upíokin kuankanti 'ain! ¡'Ëx kia mi kuakësa usaribi okin ka Diosan mitsux kia kuati 'ikën!
8 Bëtsi nëtën ka ikaman 'apuñu 'isatankin olivos kakë i ain 'apu isa 'inun kixun kaxa. 9 Kakëxunbi ka olivos kakë in kaxa 'ëx i kaman 'apu 'inuxun kana, 'ën biminua unin xënibikë a ëni bimitëkëntima 'ain, anuma unikamax Dios mabi uni rabinux 'ikania usa 'ain kixun ka kakëxa.
10 “Usokin kakëxun ka i kaman higuera kakë i aribi aín 'apu isa 'inun kixun kakëxa. 11 'Aínbi ka higuera kakë i an ësokin kakëxa, 'ëx i kaman 'apu 'inuxun kana bataira okin tuanan nëishira 'inun tuákë a ënti 'ain kixun kakëxa.
12 Usakin kakëxun ka i kaman uvas 'apákë aribi atun 'apu isa 'inun kixun kakëxa. 13 Kakëxunbi ka uvas 'apákë anribi aín 'apu 'inuxumabi ësokin kaxa: 'ëx i kaman 'apu 'inuxun kana 'ën unían aín baka bixun 'anun Dios rabi kuëëanan atúxbi anun kuëënkë 'ëx bimikë a ënti 'ain.
14 Usakin 'urainra 'uran ñukákëxbia kuëënkëbëma sënë́nkin ka ikaman aín 'apu isa 'inun kixun muxa achúshiribi ñukákëxa. 15 Ñukákëxun ka muxanribi ikama ësokin kakëxa, 'ëx asérabi mitsun 'apu 'iti kuëëni kamina mitsux 'ën tupën okë tëmú 'iti 'ain; 'aínbi ka ax 'ëx 'apu 'iti kuëënkëbëma anuax achúshi tsi rëkirukin Líbano kakë menu 'ikë kunxankama këñuti 'ikën.
16 Bërí kana 'ën mitsu ñukatin: ¿Mitsun kaina asérabi Abimélec 'apu 'imikin upíokin ñu 'an? ¿Mitsun kaina 'ën papa Jerubaal 'imainun aín aintsi 'akinkësaribi okin mitsunribi 'akian? 17 'Ën papa ax ka mitsu 'akini ñuti tana madianita unikamabë mitsu kupín 'akanankëxa; 18 usa 'aínbi kamina bërí mitsux 'ën papa 'imainun aín aintsikamami nishkin aín bakë bëchikë setenta unikama a maxá chaiira 'ikë anuxun 'akan. Usokin aín xukë́nkama 'axun kamina, xukënñuma uni 'akësokin Abimélec 'apu anëkan, ax ka Jerubaalnëa aín xanu an ñu mëëxunkë xanumi bakë bëchia 'aish mitsun aintsi 'ikë kupíshi kamina usokin 'akan. 19 'Aínbi kana 'ën bërí ësokin mitsu kain: mitsunmi asérabi 'ën papa Jerubaal 'imainun aín aintsikama, upíokin 'akinkë 'aish ka asábi 'iti 'ikën, usa 'ain kamina mitsubëa Abimélec ax upí 'imainun mitsúxribi abë upí 'ikanti 'ain; 20 usokin mitsun 'akëma 'ain ka ¡Abimélecnuax achúshi tsi rëkirukian Siquemnu 'ikë unikama 'imainun Bet-milónu 'ikë unikama këñuti 'ikën, 'imainun ka Siquemnuax 'ianan Bet-miló anuax tsi achúshi rëkirukin abi tsin këñuti 'ikën!”