3 'Aínbi ka Elimélec Noemínën bënë ax anu tsóti kuanxbi anuax ñuakëxa, ñuan ka a xanu ain tuá rabëbëshi bërúakëxa. 4 Usai anu pain 'ikin ka a rabë́xunbi moabitas xanu biakëxa; a xanu achúshinëx Orfá kakë 'imainun ka bëtsíxribi Rut kakin anëkë 'iakëxa. 'Aínbi ka mapai rabë́ baritia sënë́nti 'urama 'ain 5 Mahlón 'imainun Quilión axribi ñuakëxa, ñuan ka aín tita Noimí tuáñuma 'ianan bënuñuma bërúakëxa.

6 Achúshi nëtën ka Noemínën Moab menu 'ixun Nukën 'Ibun kaísa aín menua numi chaiira 'ikëbi nëtë́miaxa kixun ñuikania kuakëxa. 7 Usakin kuati ka amiribishi Judá kakë menu kuantëkënti sinántankëx anua 'ikë me anuax ain ñexuta rabëbë aín menubi kuantëkëankëxa; 8 'aínbi ka bainuxun aín ñexuta rabë́ kakëxa:

—Mitsun titan xubunu kamina kuantëkënti 'ain, Nukën 'Ibun ka 'atimokin tëmëramikima upíokin mitsu 'akinti 'ikën, 'imainun ka 'ë 'akianan 'ën tuákama 'akinkësaribi okin mi 'akinti 'ikën, 9 'anan ka bënutëkëntankëxmi min bënëbë upiti tsónun mi 'akinti 'ikën:

—Ësokin katankëxun ka aín ñexuta Noemínën kuantanun kixun bëtsuku kakëxa, 'aínbi ka a rabëtan inkin, 10 ësokin kakëxa:

—¡Usama ka! ¡Nux kananuna min menu mibëbi kuantëkënti 'ain! 11 Kakëxunbi ka Noemínën munuma banakin kuainsama taniabi katëkëankëxa:

—'Ën ñexuta kamina kuanti 'ain, ¿añu 'anux kaina 'ë nuibiani 'ëbë kuainsa tanin? 'Ëx kana mitsu an kanitankëxun biti nukëbënë okin tuatëkëntisama 'ain. 12 Usa 'ain kamina mitsun xubunubi kuantëkënti 'ain. 'Ëx kana kaniakëkë xanu 'aish amiribishi bënutëkëntisama 'ain. 'Ëx xuntaku 'aish ënë ñantánbi bënutankëxun tuatëkënia, 13 ¿kaina mitsun atubë biranaxun kania kaintsian? ¿a tuákama kania kaini sapi kamina mitsux bënuñuma nitsian? Usama ka usai kamina 'ën ñexuta 'aish 'ëbë bërútima 'ain. Nukën 'Ibun ka 'itsaira tëmëranun 'ë 'imiaxa, 'aínbi kana tëmëraia mitsu isi 'ëx 'ikësamairai 'itsaira masánuituti 'ain. 14 Usokin kakëx ka atux amiribishi intëkëankëxa. Usai 'itankëxun ka Orfánën 'ëx kana 'ën xubunubi kuantëkëni kixun kakin aín ñe achúshi okin bëtsuku kabiani kuankëxa, 'aínbi ka Rut axëshi aín ñebë bërúakëxa. 15 Bërútia ka Noemínën kakëxa:

—Ka kuat, min tsabë ka ain me anua aín dioskama 'ikë anubi kuantëkënia. Usa 'ain kamina mixribi abë kuanti 'ain.

16 Kakëxunbi ka Rutnën kakëxa:

—'Ë kamina mi ëbiani mibë ënanankiani kuantanun kixun katima 'ain. ¡Uinu karamina kuanin anubi kana 'ëxribi mibë tsóti kuanti 'ain! 'Imainun ka min ëma ax 'ën ëmaribi 'iti 'ikën, min Dios axribi ka 'ën Dios 'iti 'ikën, min ëmanu tsókë unikama ax ka 'ën aintsiribi 'iti 'ikën, 'imainun kana min rabikë Dios aribi 'ën Dios 'ikë rabiti 'ain. 17 'Anan ka uinu kara mi ñuia mainia anuribi ñuia 'ë maínti 'ikën. ¡Usa 'ain ka Nukën 'Ibun mibë ënanankiani kuania ñukëma pain 'ikë 'aisamaira okin 'ë tëmëramiti 'ikën! 18 Ësakin kakëxun ka Rutnën ka 'ë ëinsamaira tania kixun 'unánkin Noemínën uisakinbi katëkëama 'ikën.

19 Usai 'ikiani ka xanu rabë́ bain Belén kakë ëmanu bëbai kuankëxa. Kuania bëbakiania isi ka Belénnu 'ikë unikama ratuti tsuákirui kikankëxa. Kikankëbë atúxribi tsuákirui ka xanukama kanankëxa: ¿Ënëx kara Noemí ama 'ik? 20 Kiabi ka Noemínën atu kakëxa:

—'Ë kamina bërí Noemí kakin anëtima 'ain; Mará kakin kamina 'ë anëti 'ain, Dios kamabi kushiñu an ka 'aisamaira 'ëx nishkë anunbi tëmëranun 'ë 'imiaxa. 21 Ënuax chikiti kana 'ën bënë 'imainun 'ën tuakamabë chikiakën 'aínbi kana bërí ñuñuma utëkënin, usai 'ëx 'iti sapi ka Nukën 'Ibun kuëëankëxa. ¿Uisa kupí kaina Dios kamabi kushiñu an 'aisamaira okin tëmëramikëbi Noemí kakin 'ë anëkanin? 22 Ësai ka Noemí Moab kakë aín me anubi 'ain ñexuta Rut kakë moabita abë kuantëkëni 'iakëxa. Belén ëmanuxuan atun cebada 'apákë bikin pëukankëbë ka Noemí bëbakëxa.