4 Usa 'ain ka Sansón achúshi xanu Dalila Sorec kakë menu tsókë abë kuëënankëxa. 5 Kuëënania kuabiani ka filisteo 'apukama Dalila isanan abë banai rikianxun ësokin kakëxa:

—Abë banakin kamina Sansón paránxun uisax kara ax kushiñuira 'ikë kixun ñukati 'ain, usakinmi ñukatia kananuna nun bixun; nëaxun bërúanti 'ain. Usokinmi 'akë kananuna nukama, achúshi achúshinën mil cien kuríki manë 'akë mi 'inánti 'ain. 6 Ësokin kabiania filisteo 'apukama rikian ka, Sansón aín xubunu bëbaia xanun kakëxa:

—'Ë kamina uinuax kara min kushi 'aia kixun bërí kati 'ain. ¿Uisokin 'axun karanuna mi churukutima okin nëati 'ain? 7 Kakëxun ka Sansónnën kakëxa:

—Mapai achúshi 'imainun rabë́ kata kanti mëxi ëskikëma anun tëkërëkakëx kuni kana, 'ën kushi nëtë́ti bëtsi unikamasaribi 'iti 'ain, kixun ka Sansónan kakëxa.

8 Usakin ñuixunbiania kuan ka filisteo unikaman 'apun Dalila mapai achúshi 'imainun rabë́ kanti mëxi ió anúan Sansón tëkërë kanun kixun buánxuankëxa, buánxunkëxun ka anun nëakëxa. 9 Nëakë 'ain ka bërámashi aín 'uxtinu unëkë unikama anu 'ain munuma kuënkëni kikankëxa:

—¡Sansón mi ka filisteo unikaman 'aia, kikëbë ratuti nirukin ka anúan nëakë kanti mëxi, a ñuman xënira 'akësokinshi të́kakëxa! Usokin 'akëbë ka uisa 'aish kara kushiira 'ikë kiax filisteo unikamax Sinánkasmakëxa. 10 Usakin 'aia ka Dalilanën kakëxa:

—¡'Ë kamina parán! ¡Këmë kamina mix 'ain! Usa 'ain kamina bëríra uisa okin karana mi nëati 'ai kixun 'ë kati 'ain. 11 Kixun ñukákëxun ka Sansónnën kakëxa:

—'Ëmi uínsaranbi anun ñu nëakëma itsi iotan, nëakëx kuni kana 'ën kushi nëtë́ti bëtsi unikamasaribi 'iti 'ain.

12 Usa 'ain ka Dalilanën itsi rastun iókama bikë anun upíokin Sansón nëatankëx munuma kuënkëni kiakëxa:

—¡Sansón mi ka filisteo unikaman 'aia kixun kuënkëonkin kakëxa! Usakin ka bëtsi nëtën 'akësokin unikama aín 'uxtinu unëtëkëntankëx kiakëxa; kikëbë nirukin ka Sansónnën anun nëakë itsi ñuman bëntsinra 'akësokinshi tëkapakëxa. 13 Usakin 'aia ka Dalilanën Sansón kakëxa: —¡Amiribishi kamina 'ë parántëkëan! ¡Usakinbi kamina min 'ë paráinshitin! ¡'Ë kamina kati 'ain uisa okinra karana mi nëati 'ai kixun! Kakëxun ka Sansónnën kakëxa:

—'Ën bu anun 'ë tëkërë kati 'akin kamina, mapai achúshi 'imainun rabë́okin chupasani këñun mëskukin xëotankëxun a i tëakë memi takáshkakin matáskin nitsínxun ami 'ënbu tëkërë kati 'ain. Usokëbë kana 'ën kushi nëtë́ti bëtsi uni kamasaribi kushiñuma 'iti 'ain.

Usokin 'anúan kakëxun ka Dalilanën Sansón 'aímai napëkëtia 'uxnun 'uxmitankëxun mapai achúshi 'imainun rabë́ okin aín bu chupasani këñun xëokëxa, 14 xëotankëxun ka imaxu tëakë memi takáshkakin nitsinkëmi aín bu xëokë a tëkërë katankëx munuma kuënkëni kiakëxa:

—¡Sansón filisteo unikamax ka mi 'ai aia kiaxa. Kikëbë nirukin ka Sansónnën i tëakë memi takáshkakin nitsínkë amia aín bu xëoxun chupa sanikëñun ami tëkërëkakë a ëchíkin tëkapakëxa! 15 Usakin 'aia iskin ka aín xanu Dalilanën kakëxa:

—¡Këmëntapun! ¿Uisati karamina 'ë ismina kuëëni kikínbi 'ë paránin? Bërí ka rabë́ 'imainun achúshi okinmi 'ëmi kuaikin usokin 'ë 'akë 'ikën, 'aínbi kamina bëríbi uisa kushiñuira 'aish kaina usai 'i 'ë kakëma 'ain. 16 Usakian Dalilanën nëtë́tibi kamabi hora 'urainra ubíokin an kakësabiokin ñukákëx, ka Sansón atsanx a kuaisama tani anunbi bamatisa tankëxa; 17 usakin urainra ubíokin ñukákëxun ka Sansónnën Dalila uisa 'aish kara ax usai 'ia kixun ñuixuankëxa:

—Uínbi ka uínsaranbi 'ën bu tëama 'ikën, 'ëx kana 'ën titan tuakëma pain 'aish Diosan kaískë uni a 'ain. Aín uni 'ain ka Nukën 'Ibu kikësabiokin uínbi 'ën bu tëatima 'ikën. Usa 'ain kana 'ën bumi tëakëbë kushiñuma 'i 'ën kushi nëtë́ti bëtsi unikamasaribi 'iti 'ain.

18 Usakian kakëxun ka bëríra kana 'unanin, uisa 'aish kara usa kushiñuira 'ikë kixun 'unánkin ka Dalilanën filisteo 'apukama anua unun kixun ësokin kamiakëxa:

—¡Bërí kamina ukanti 'ain mitsu ñuixunun, Sansónnën ka uisa 'aish kara usa kushiñuira 'ikë kixun 'ë ñuixuanxa! Usakian kamikëx ka anúan Dalila kupíoti kuríki bëi rikuatsiankëxa.

19 Umainun ka Dalilanën Sansón aín kisinu makëpimëtia 'uxnun 'uxmiakëxa, 'uxmixun ka achúshi uni an aín bu mapai achúshi 'imainun rabë́ okin xëokë a tëanun kuëankëxa. Kuënkëx uxuan aín bu tëan ka. Sansón bësuni, 20 munuma kuënkëni kiakëxa:

—¡Sansón mi ka filisteo unikaman 'aia ka bësut! Usai kikëbë ka aín bu tëakëma 'aísha 'ikësa usai 'iisa sinani Sansón bësuakëxa, bësukinbi ka Nukën 'Ibun ka 'ë ëanxa kixun 'unánma 'ikën. 21 Usai 'ia kushiñuma 'aish sinánkasmaia ka filisteo unikaman ñatanxun aín bëru rabë́ ëchiakëxa, ëchíxun ka Gaza kakë ëma anu buánxun manë risi uxua 'akë anun tëkërë kaxun anun ñu rënti 'akë anua ñu rëni sipunuax tënun ëankëxa. 22 Usaia sipuakë 'aish anu 'imainun ka amiribishi aín bu urui bëráma 'ikësabi 'itánun kuainbutëkëankëxa.

23 Usokin Sansón 'atankëx ka bëtsi nëtën filisteo unibunën 'apukamax Sansón kananuna kupitanuma bia kixun sinánkin atun dios Dagón kakë a kuëënkin rabikin ñuina xaroxuni timëkamë 'ëotankëx kantakankëxa:

—'Ë kamina anuxun atun dios rabiti xubu 'akin ami puruti nitsínkë rabë́ anuxun mëkënan tainsabinu ami këpiti ninun 'ë nitsínti 'ain. 27 Usai ka kamabi filisteo 'apukama anuxuan atun dios rabikë xubu anu timë́kë 'iakëxa, timë́kë 'aish ka 'aisamaira uni 'imainun xanu timëkamë 'ëokë 'iakëxa. Usai 'imainun ka tres mil unibëtan sënë́nsa unikamaribi xubu manámi uisakin kara Sansón abë kuëënkin raíritan 'aia isi anu kuaruax timëkamë 'ëokë 'iakëxa.

28 Usai filisteo unikama anu timëkamë 'ëokë 'ain ka, Sansónnën munuma banakin Dios kakëxa: “'Ën 'Ibu 'ën kana mi kain usa 'ain kamina achúshira 'oíshi 'ëmi sinántëkënti 'ain, 'ë kamina min kushi 'inánti 'ain, 'ën bëru rabë́ ëchikë kupí filisteo unikama achúshi okin 'akë anuishi bëríbi këñuminun.” 29 Ësakin Dios katankëx sënë́nkinshi ka ami xubu puruti nëbë́tsi nitsínkë rabë́ a aín mëkënan ramëkin tanishi, 30 munuma kuënkëni kiakëxa: “¡filisteo unikama mitsux kamina 'ëbëbi bërí bamakanti 'ain!” Usai kikian aín kushibëtanbi titikakin xutunkëx ka anuxua atun dios rabikë xubu atumi rurukubukin filisteo unikama atun 'apukama këñunbi xubun kuaintanuma atu këñuakëxa. Usakin 'akin ka ax asábi 'ixuan abë 'akanankin 'asamaira okin abëbi bamakin Sansónnan xubu chakamikin uni këñuakëxa.

31 Usai aín xukë́n filisteo unikamabëbi ñukë kuabëtsini uxun ka aín xukë́antu 'imainun aín aintsi 'ibukaman Sansón bamakë biakëxa, bibiankin buánxun ka aín nami anua aín papa Manoa bamakë maían Sorá 'imainun Estaol anu aín papa ñuia maínkë anubi maíankëxa. Usai ka veinte baritia pain Israel unikama 'apu 'ixun 'akintankëx Sansón anuishi sënëni ñuakëxa.