—'Ë kaina an ñu 'apákë bikë unikaman bikin tëoia cebada 'apákë atu kaxú kuankin binun kara 'ë bimitima 'ikë istánun xutima 'ain. Kixuan kakëxun ka asabika.

—Kamina isikuanti 'ain —kixun ain ñen kakëxa. 3 Usakian kakëx ka anua cebada 'apákë aín bimi bikë unikama 'ikë anu kuankëxa. Kuanxun ka unikaman bikin ënkë cebada bimi atu kaxú kuankin anribi biakëxa, a naëx ka Booznan 'ikë kixun 'unánxumabi ka usakin biakëxa, ax ka Elimélec kakë uni aín aintsi 'ibu 'iakëxa.

4 Usai anu tëmainun ka naë 'ibu Booz ax Belénnuax aín unikaman kara an ñu 'apákë bitsia kixun isi uakëxa ukin ka an ñu bimi bikë unikama uisa kaina 'ain, kixun atu kakëxa:

—¡Nukën 'Ibun ka mitsu 'akinkin bërúanti 'ikë kixun kakëxa! Kakëxun ka atúnribi kakëxa:

—Miribi ka Nukën 'Ibun upíokin sinánxukin 'akinti 'ikë kixun kakankëxa. 5 Usakin katankëxun ka Booznën an ñu mëia bërúantia anëkë uni ñukákëxa:

—¿Uinu 'ikë unin bëchikë kara xanu ux 'ik? 6 Kixuan ñukákëxun ka an tëia uni bërúanti anëkë unin kakëxa:

—Ax ka moabita xanu axa Noemíbë Moab kakë ëmanuax ukë a 'ikën.

7 An ka uxun 'ën karaisana an ñu 'apákë ain bimi bikë unikaman ënkë a atu kaxú kuankin binun bimitima 'ai kixun ka 'ë ñukáxa, ñukákëxun kana binun kixun kan, usa 'ain ka bëráma upunkin ñu bimi bibaiti bari maníkëbë chukúmashi tanti uaxa. 8 Usakian kakëxun ka Booznën Rut kakëxa:

—Kamina ësokin mi kamainun kuati 'ain, usa 'ain kamina bëtsi unin naënua ñu 'apákë aín bimi bitsi kuantima 'ain. Ënubi kamina an 'ë ñu mëëxunkë xanu kama abë bërúti 'ain, 9 usa 'ain kamina 'ën ñu mëmikë uni kamabëtan uimiuküa kara ñu 'apákë aín bimi atun bitsia amia bikëbëtan minribi auküa biti 'ain. 'Ën kana an 'ë ñu mëëxunkë unikaman mi 'atima okinma upiokinshi 'akinun kixun kan. Shimakin 'umpax xëatisa tankin kamina uinu kara ñutëmi bixun 'umpax nania anua bitankëxun xëati 'ain.

10 Usakin kakëxun ka Rutnën aín bëmánanën me tikai tëtúbuti 'ikin Booz ñukákëxa:

—¿Uisaxun kaina min 'ë 'unán 'ixunmabi ax ka upí sinánñu xanu 'ikë kixun, 'ëx bëtsi menu 'ikë xanu 'ikëbi 'ë 'unánin? 11 Kixuan kakëxun ka Booznën kakëxa:

—'Ën kana upíokin 'unánin min bënë ñukëma 'ain kamina min ñe kamabi ñu upíokin 'akian, 'imainun kamina min papa min aintsikama ëbëtsini anumi tsókë me anuax nubë tsóti uan, bëráma kananuna min 'unánkëma uni 'iakën. 12 ¡Minmi 'akë ñukama kupín ka Diosan mi 'akinti 'ikën! ¡Israel unibunën Dios kamina an mi 'akinun barian! ¡Usa 'ain ka 'atapa tuañunëan aín tuákama bërúankin aín pëchinu atsímikësa obëtsinkin mi bëaxa. Usa 'ain ka kamabi min 'akë ñukama kupí mi 'akinti 'ikën! 13 Kixun kakëxun ka Rutnën kakëxa:

—Mix kamina upí sinánñu uni 'ësaribi 'ain, minmi nuibakin kakë banakama an ka 'ë upíokin sinánmia. 'Ëx kana an mi ñu 'axunkë xanu achúshimabi 'ain.

14 Usokin katankëxun ka anúan piti hora 'ikëbëtan Booznën anribia atubëtan pinun kixun Rut kakëxa:

—Katankëxun ka ënu ka ut, kixun kuëankëxa, kuënkëx uax tsóbutia ka pán tukakë ënë kamina bimi baka kachakë ënu chabóti 'ain kixun kakëxa. Kakëx ka Rut anua an cebada bimi bikë unikama pi tsókë atu rapasu tsóbuakëxa. Tsóbutia ka Booznën cebada bëru tutush okë a pinun kixun 'inánkëxa, 'inánkëxun ka 'aímai puchákin piakëxa, pikinbi ka cebada tutush okë tëxëokëxa. 15 Usakin 'atankëxa Rut amiribishi cebada bimi bitsi kuantëkënkëbëtan ka Booznën an ñu mëëxunkë unikama kakëxa:

—Anribia cebada bimi nëakin bitsia kamina. Bixuma 'anun kixun katima 'ain.

16 'Imainun kamina nëakin bikëxa cebada bimi rëukutia, abia tupikin binun isëshiti 'ain. ¡Uínbi ka usakian 'aia ubiotima 'ikën! 17 Usokian kan ka Rutnën cebada bimi Booznën naënua bari kuabuti ñantabutamainun biakëxa. Bitankëxun kamabi an bikë a aín xonua rishkikin tákakëx ka, tupúnkëx veinte kilo inumikian bikë cebada bimi 'iakëxa. 18 Usokin 'axun bibiani ka Rut na bibaikë ñu bimi buani anuaxa ukë Belén kakë ëma anua aín ñe ismi kuankëxa. Kuanxun ismitankëxun ka piti tëxëokë buánkë a bixun aín ñe Noemí 'inánkëxa.

19 'Inánkëxun ka Noemínën ñukákëxa:

—¿Uinu kaina tëbaitin? ¿Uisoxun kaina 'aisamaira cebada bimi bibaitin? ¡Diosan ka an mi ësokin 'akinkë uni chuámarua 'inun 'imiti 'ikën! Kixuan kakëxun ka Rutnën ain ñe ui unin naënu kara ñu bimi bitsi tëbaitia kixun ñuixuankëxa.

—Anua 'ën ñu bimi binux tëkë uni ax ka Booz kakin anëkë 'ikën —kixun ka ñuixunkin kakëxa. 20 Ñuixunkëxun ka aín ñe Noemínën kakëxa:

—¡Nukën 'Ibun ka a uni upíokin 'akinti 'ikën! An ka nu nuibakin bërí upíokin 'akianxa, bërámibi ka nun aintsi bamakëkama abë nuibanankë uni 'iakëxa. A unix ka nun aintsi 'ibu 'ikën, usa 'aish ka ax achúshi uni an nu 'akinti asábi 'ikën. 21 Kixuan kakëxun ka Rutnën katëkëankëxa:

—'Ën karaisana amiribishi an ñu 'axunkë xanu kamabëtan aín ñu bimi këñukin sënë́onkin bikintima 'ai kixun ka 'ë kaxa. 22 Usakian kakëxun ka Noemínën aín ñexuta kakëxa:

—'Ën nuibakë ñexuta asábi ka 'ën sinánkëx sapikamina an ñu 'axunkë xanu kamabë anu tëi bërúti 'ain, usa 'ain kamina bëtsi uninu ñu 'apákë aín bimi bitsi kuantima 'ain, bëtsi unínma mi ubioia usa 'ain. 23 Usokian aín ñen kakëx ka Rut amiribishi Booz kakë uni ain naënu kuanxun ñu bimi anu tëkë xanu kamabëtan bikin cebada 'imainun trigo 'apákë aín bimi këñukin binun 'akiankëxa. Usai tëibi ka aín ñebë ënananima abëbi 'iakëxa.