3 Usa 'ain ka kamabi baritia 'ikëbë Elcaná ax aín ëmanuxun rabianan Nukën 'Ibu kamabi kushiñu a Silónuxun ñuina xaroxuni chikíakëxa. Elí kakë sacerdote ain bakë bëchikë rabë́ Hofní 'imainun Finees kakin anëkë 'iakëxa, usa 'ain ka a rabëtaxbi sacerdoteribi 'iakëxa. 4 Usa 'ain ka uínsaran kara ñuina xaroti 'ia anun Elcaná an ñuina nami anbia 'anun, aín xanu Peniná 'imainun aín bakë bëchikëkama 'inánkëxa, 5 'aínbi ka Ana a ira, nami 'itsaira an nuibakin 'inánkëxa, Nukën 'Ibun ax tuáñu 'iti kuëënxunkë 'ikëmabi. 6 Usokin 'akëbë ka Peniná ami 'itsaira nishakëxa, nishi ka a istisama tani Nukën 'Ibun a tuánun 'imikëbëma ami kuaiakëxa. 7 Kamabi baritia anuxun Nukën 'Ibu rabiti xubunu kuankëtibi ka Peniná ami nishakëxa; usaía ami nishkëxun 'unankin ka Anan masá nuituti inkin piisama tankëxa. 8 Usai 'ia iskin ka aín bënë Elcanánën kakëxa: Ana, ¿uisa kupín kaina inin? ¿uisa kupín kaina masá nuitukin piisamatanin? ¿'Ëx karana mapai rabë́ bakë tuá bëbu kamasamaira minan 'ain?

9 Bëtsi nëtën ka Silónu kuanx, piíkin sënë́ontankëx Ana niruakëxa. Anu ka sacerdote Elí kakë ax anu tsóti 'akënu anuxun Nukën 'Ibu rabiti xubu xëkuë anun atsínti 'urama tsókë 'iakëxa. 10 Usa 'ain ka Ana 'atima okin sinani nishi iankëxa, ini ka Nukën 'Ibubë banakëxa, 11 banakin ka ësokin kakëxa: Min asérabi 'ëx tëmëraia 'unánkin kamina an mi ñu 'axunkë xanu 'ikë 'ëmi sinanakin, achúshi tuá 'ë 'inánti 'ain, 'inánkëxun kana kanikia an mi ñu 'axúnun 'unánmiti 'ain, 'imainun kana 'unántiokin aín bu tëatima 'ain.

12 Usa 'ain ka Anan Nukën 'Ibu basipain ñukatia, Elínën aín kuëbí isakëxa; 13 'aínbi ka aín sinanëinshi ñukákëxa. Usakin ñukatia ka aín bana kuama 'ikën; kuakëxumabi ka aín kuëbishi shaikakëxa. Shaíkaia iskin ka Elínën ñu paë xëax sapi ka paëanxa kixun sinánkëxa, 14 sinánkin ka kakëxa:

—¿Uínsaran kaina min paë́nkë ënti 'ain? ¡Uvas baka paëokin 'akë 'uran xëaxuma ka at!

15 Kakëxunbi ka Anan kakëxa:

—Usama ka 'ën kana uvas baka paëokë 'anan uisa ñubi paë 'itánun 'akëbi xëakëma 'ain, 'aínbi kana 'itsaira masá nuituti paëanan Nukën 'Ibun ismainunbi tëmërain. 16 Usa 'ain kamina min 'ëx kana bëtsi xanusa 'ai kixun sinántima 'ain, 'ën kana kamabi nëtën Dios ñukatin, 'imainun kana 'itsaira ñu sinani masá nuituti tëmërain.

17 Kixun kakëxun ka —chuámarua kamina kuanti 'ain —kixun Elínën kakëxa—, 'imainun ka Israelkaman Diosan ka min ñukákësabi okin mi 'inánti 'ikë kixun kakëxa. 18 Kakëxun ka asábi ka kixun Anan kakëxa:

—Usakin kabiani ka Ana anúan ukë anunbi kuankëxa, kuanxun ka piakëxa, usai ka uínsaranbi masá nuitutëkëntimoi 'iakëxa. 19 Usaia 'ión pëkarakëma 'aínshi nirutankëxun Nukën 'Ibu rabibiani ka anuaxa ukë Ramá kakë ëmanu 'ikë aín xubu anubi kuantëkëankëxa.

Kuanx ka anuax Elcaná aín xanu Anabë 'iakëxa, 'ikë 'unánxun ka Nukën 'Ibuan an ñukákin kakësabiokin 'axuankëxa. 20 Usokëx ka Ana tutankëx anun bakënti nëtë 'ikëbë bëbu tuá achúshi bakëankëxa, bakënxun ka Samuel kakin Nukën 'Ibun 'inánkë kupín anëakëxa. 21 Anëan ka Elcaná aín aintsikamabëbi Silónu kuankëxa, kuanxun ka anuxun ax kikësabiokin 'akin, rëtankëxun 'aímai këñutanun baritia tibi 'akësabi okin ñuina xaroi kuankëxa; 22 usai kuankëbëbi ax kuankinma ka Anan aín bënë kakëxa:

—'Ëx kana 'ën tuakënpan xuma ëntamainun kuanima. Usa 'ain kana xuma 'akë ënia kuni Nukën 'Ibu 'ën kakësabiokin 'axunia anubi 'inun ëni kuanti 'ain. 23 Kakëxunbi ka aín bënë Elcanánën kakëxa:

—Uisokin 'ati kaina sinanin usakin kamina 'ati aín. Usa 'ain kamina an pain xuma ëntamainun bërúti 'ain. 'Ëx kana kuëënin Nukën 'Ibun ax kikësabiokin 'anan mi 'akinti. Ësokian kakëx kuanima bërúxun ka 'ain tuákën xuma 'akë ëntanun 'ikiankëxa.

24 'Ikinkëxua 'ain xuma 'akë ënia ka chukúmara 'ikëishi anbi anuxun Nukën 'Ibu rabiti xubu Silónu 'ikë anu buánkëxa. Buánkin ka vaca bakë rabë́ 'imainun achúshi këñun veintidos litro trigo bimi 'imainun achúshi ñuina xakánu 'arukë uvas bakaribi buánkëxa. 25 Buánxun ka achúshi vaca bakë buánkë a 'aímai këñutanun xaronan 'ain tuá buánkë a Elí 'urama an isnun buánkëxa. 26 Buánxun ka Anan kakëxa:

—'Ën 'Ibu 'ë kamina uisabi otima 'ain, mix kamina bërí ënu 'ain, 'ëx kana an mi rapasunuxun Nukën 'Ibu ñukákë xanu a 'ain. 27 'Ën kana Nukën 'Ibu ënë tuá 'ë 'inánun ñukan, usa aín ka 'ë 'inánxa. 28 Usa 'ixun kana 'ën Nukën 'Ibu Diosan ñu mëëti 'anun 'imian, usa 'ain ka ainan 'iti 'ikën. Ësakin kakëx ka Elí 'ain bëmánanën me tikai tsóbukin Dios rabiakëxa.