Anan kantakin Dios rabia ñuikë bana
2
Ësai ki ka Ana Diosbë banakëxa:Nukën 'Ibu 'ëx kana 'ën nuitunënbi mi sinani kuëënin,
min kamina amiribishi kushiñu 'inun 'ë 'imian.
Usa 'aish kana axa 'ëmi nishkë unikama ñui banati 'ain, min kamina 'ë 'akian.
¡Usa 'ain kana bërí kuëënin!
2 ¡Nukën 'Ibu uixi ka upíira misaribi 'aíma 'ikën!
¡Uínbi ka min 'akësa okin bërúankin nu 'akinima, Nukën 'Ibu!
Uixi ka misaribi 'aíma 'ikën.
3 Uinu 'ikë uníxbi ka ax kuëënkësa oi banatima 'ikën,
'imainun ka uixi 'itsaira rabiakati banatima 'ikën,
Diosan ka ax Dios 'ixun kamabi ñu 'aia,
an ka kushiira 'ixun kamabi unin 'akë ñu 'unankin 'atima oia.
4 An ka kamabi uni kushiirabu atun piakama 'imainun aín kantikama tsasipanan,
kushiñumakama ax kushiñu 'inun 'imia;
5 'imainun ka axa 'aisamaira pitiñu 'iakama,
an bërí piti chukúmara kupí aín ñu bëtsi 'inania;
'aínbi ka axa numin 'iakama an,
bërí numi tanima.
'Imainun ka axa tuáñuma 'ia xanukama,
an mapai achúshi 'imainun rabë́ okin tuaxa,
'aínbi ka ax paia 'itsa tuáñu 'iakama ax,
bërí tuáñuma 'ikën.
6 Usa 'ain ka Diosan uni tsónun 'imianan bamanun 'imia;
'imianan ka anu uni mainkënu 'imixunbi,
anuabi uni baískimi tëkënia.
7 Nukën 'Ibun ka nu ñuñu 'imianan ñuñuma 'inun 'imia;
'imainun ka nu 'uchaiabi, nuibakin 'akinia.
8 Nukën 'Ibun ka ñuñuma uni ñuñu 'inun 'imia
'imianan ka kuaínbëkini nitsi ñu ñukákanankë uni,
atúxribi ñuñu unikamabë ñuñu 'i 'apu 'inun 'imiti 'ikën 'imikin ka,
atux tsókë anuribi tsónun 'imiti 'ikën;
Dios ax ka kamabi ñun 'ibu 'ianan kamabi men 'Ibu 'ikën,
usa 'ixun ka an me uniokin anubia 'itinu nankëxa.
9 An ka aín unikama uinu kara nitsia anuabi bërun oia,
'aínbi ka an ñu 'atima 'akë unikama Dios 'unánkëma 'aish bëánkibukënu bamaia,
usa 'ain ka uínbi ax kushi 'ikë a uisabi oima.
10 Nukën 'Ibun ka axa ami nishkë unikama këñunun 'imiti 'ikën,
'imikin ka naíkamë 'ëonuax kanákamë 'ëo banarui 'ikin
atunu 'ibúkin këñunun 'imiti 'ikën.
Usakin ka Nukën 'Ibun kamabi menu 'ikë unikama 'ati 'ikën;
'anan ka anbia 'apu 'inun kaiskë 'apu a kamabi nëtëan kushiñu 'inun 'imiti 'ikën.
11 Ësai kitankëx sënë́nkiani ka Elcaná 'imainun Ana Ramánua 'ikë
aín xubu anu kuankëxa,
kuankinbi ka aín tuá sacerdote Elí kakë anu an
bërúanxun Nukën 'Ibun ñu mëëti 'akinun ëbiankëxa.
Elínën bakë bëchikë kaman ñu 'aisama 'a ñuikë bana
12 Elínën bëchikë kamax ka sacerdote 'aíshbi ñu 'atima 'akë 'aish 'atima sinánñubu 'iakëxa, usa 'ixun ka Nukën 'Ibun kuëënkësama okin ñu 'akëxa, 13 'akin ka sacerdote unikaman 'akësokin 'akinma; an ñu mëmikë unikaman uin kara ñuina nami xaronanbi 'aruia a anua an ñu mëëxunkë unikaman anun nami biti xëta rabë́okin 'akë tuiax kuanxua, 14 manë kënti 'arukëxa kubinkënuabi nëbikin aín bakanua, biti tuínxun këntinuabi nami bikë ax ka, Elínën bëchikë sacerdotekama ainan 'iakëxa. Usakin ka Silónuax uxun israel unikaman bëxun 'aia 'akëxa. 15 'Anan ka an ñuina xarokë akaman 'arukëma 'aínshi ukin kakëxa: 'Ë kamina Elínën bakë bëchikë sacerdotekama xuixunu nami 'inánti 'ain; kixun ka sacerdote an ñu 'axunkë unikaman kakëxa, 'arukë nami a kuëënkinma ka paxaishi sacerdotenën kuëënti 'ikën. 16 Kakëxunbia an ñuina xarokë sacerdotenën Dios 'axunkë ka aín xëni pain kana xaroti 'ain, sënë́nkëbëtan kuni kamina uiti kaina kuëëni ati biti 'ai kixun ka a ñukákë uni an kakëxa. Kakëxunbi ka: ¡Usama ka bëríbi kamina 'ë 'inánti 'ain! 'Inánkëxuma kana mix kuëënkëbëtamabi mi bikuanti 'ain. 17 Usokia Elínën bakë bëchikëkaman Dios 'inainshiti 'ikëbi 'akë ax ka Nukën 'Ibun iskëx 'aisama 'iakëxa, usokian atun 'akëx ka Nukën 'Ibu 'axunkë ñu ax 'aisama okin 'akë 'iakëxa.
18 Usokia atun 'amainun ka, bëná 'ixun Samuelnën efod kakë chupa upíira lino 'akë a pañukë 'ixun Nukën 'Ibun ñu mëëti ënkinma abi 'akëxa. 19 'Amainun ka baritia 'ikëtibi aín tita 'imainun aín papan, anuxun Dios rabiti xubunu atun 'akësabi okin ñuina rëxun xaroi kuankin chupa chukúma achúshi upíokin 'axunkë a buánxuankëxa. 20 Buánxunkë 'ain ka Elínën Elcaná 'imainun aín xanu upíokin sinánxuni ësai kiakëxa: Nukën 'Ibun ka ënë xanumi bëchitëkënun mi 'akinti 'ikën, an ka aín ñu mëëti 'anun ënë tuá 'imiaxa.
Ësokin 'atankëx ka aín xubunu kuankëxa, 21 kuankëa Nukën 'Ibun upíokin sinánxunkëx, ka Ana tutankëx bakë́ankëxa. Usai 'ikinka, Ana rabë́ 'imainun achúshi bëbu tuá 'anan xanu rabë́ ribi tuakëxa, usokin 'amainun ka Samuelnëx anuxunbi Nukën 'Ibun ñu mëëti 'ai kaniakëxa.
22 'Imainun ka Elí ax kaniakëkë uni 'ixunbi, aín bakë bëchikëkaman Israelkamabëtan 'atima ñu 'aia 'unánkëxa, 'unánkin ka anuax Diosbë mërananti 'akë xubu chukúma aín xëkuënua an bërúankë xanukamabë 'uxkë aribi 'unánkëxa. 23 Usa 'unánxun ka aín bakë bëchikëkama kakëxa: Kamabi unix ka mitsunmi 'atima ñu 'akëbë 'ëmi banaia. ¿Uisa kupín kaina mitsun usakin ñu 'ain? 24 Usokinmi mitsún ñu 'akë ax ka 'ën kuakëx upíma 'ikën, usokin 'akin kamina Nukën 'Ibun unikama mitsún 'uchamin, usa 'ain ka unikamax mitsun 'akë ñu ñui banaia. 25 Achúshi uníxa bëtsi unimi 'atimati banakë a ka Nukën 'Ibun mëníoti 'ikën; 'aínbi ka achúshi uníxa Nukën 'Ibu ñui banakë a ¿kara uin mëníoxunti 'ik? Kixun kakëxunbi ka aín papan bana atun kuaisama tankëxa, usai ka Nukën 'Ibunbi usai 'ia atu këñumiti sinánkë 'ain 'iakëxa. 26 Usa 'ain ka Samuel bërunani kanikin upíokin ñu 'aia Nukën 'Ibun ismainun unikamanribi upí tuá 'ixuan upíokin ñu 'aia 'unánkëxa.
27 A nëtën ka a isi achúshi uni an Dios kikë bana ñuixunkë anu bëbaxun Elí kakëxa: Ësai ka Nukën 'Ibu kiaxa: mitsun rarakama Egipto menuxun faraón ñu mëëxunkëbë kana 'ëx asérabi atumi mërakën. 28 'Imainun kana Israel unikaman ñaká kamanua 'ën kaískë sacerdote 'ixuan atun anuxun ñuina xaroti 'ën 'amikë anuxun, ñuina xaronan sanuira ro aribi 'anan sacerdote unikaman pañukë chupa upíira a pañunun 'amiakën. 'Amianan kana mitsun rarakama 'imainun mitsuribi 'ë 'inaishikë ñu 'ë rabikin xaroia aín tëxëkë pinun 'amiakën. 29 ¿Mitsun kamina usakin 'anun kakëxuan 'aiabi, 'ë 'inainshikë ñu 'atimon? ¿Uisati kaina min bakë bëchikëkama usakin 'ëmi manuxun ñu 'anun 'amiti 'ain? ¿Mitsux kamina 'ë 'inainshiti Israel unikaman bëkë piti ñu upíbu a pibi xuátima 'ai kiax ka Dios kiaxa? 30 Usa 'ain ka Israel unibunën Dios an mi 'imainun min aintsi aín ñu mëëti 'axúnun 'inánkë ax bërí kiaxa: Uinsaranbi kana atun ësokin, 'ë ñu 'axúnun 'amitima 'ain, 'akinma kana an 'ë nuibakë aribi nuibati 'ain, 'anan kana 'ëmi kuaikin ñu 'akë a nuibatima 'ain. 'Ëx min 'Ibuira 'aish kana ësai kin. 31 Anun 'ën min kushi 'imainun min rarakama 'aisama oti nëtë ka 'urama 'ikën. Usa 'ain ka uinu 'ikë mitsun aintsixbi kaniakëti tsótima 'ikën. 32 Usa 'ain kamina 'aisamaira nitë́xëti Israel unikama upíokin 'ën ñu 'axunkëbë atumi nishtima 'ain, 'imainun ka uínsaranbi min aintsi 'ibukama kaniakëtira tsótima 'ikën. 33 'Aínbi kana 'ën min rëbúnki achúshi an sacerdote 'ixun 'ë ñuina xaroxunun 'imiti 'ain, ax ka bëskuni bëkaniakati 'iskasmati 'ën mi kakësabi oi tëmërati 'ikën, usai 'imainun ka min rëbúnki raírinëx bëtsi unikaman 'akëx këñuti 'ikën. 34 Usai 'imainun ka min bakë bëchikë rabë́, Hofní 'imainun Finees minmi 'ë kakësabi oi ka 'ia kixun mi isnun a nëtënbi a rabëtaxbi ñuti 'ikën. 35 Usai 'ikëbëtan kana 'ënbi achúshi sacerdote min aintsima bëtsi uni 'ën kakësabiokin 'aisa uni bariti 'ain, an ka 'ën kakësabiokin 'ati 'ikën, 'ianan kana a asaribi okin aín rëbúnkikamanribi ax kikësa okían 'ën 'imia 'apu ñu mëëxunun 'imiti 'ain. 36 Usokin 'akëbë ka, min aintsi axa ñukëmakama ami rantinpurunkin a piti ñukama ñukánan anun ñu maruti kuríki binux tënuxun sacerdotekama ñukati 'ikën.