Nukën 'Ibuan ain anën Samuel kuëan ñuikë bana
3
Samuelnën ka uni bëná 'ixun Elínën 'amikëxun Nukën 'Ibun ñu mëëti 'akëxa. A nëtë kaman ka 'itsaira abë banakin uibi bana ñuixuanan namákësa okían isnun Nukën 'Ibun ismiama 'ikën. 2 'Aínbi ka achúshi imë́ ka Elí bëxuñu 'iakëxa, usa 'ixun ka upíokin isima anua 'ikë aín xubunubi 'iakëxa. 3 Anuax Nukën 'Ibubë banati xubunua Samuel 'ain ka bunántisa okin Dios 'axunkë anuax. Achúshi tirí anua upíira kakë 'ikë anuax bënatimaira pë́kikë 'iakëxa. 4 Usa 'ain ka Nukën 'Ibun Samuel Samuel kakin kuëankëxa:—¡Kuënkëxun ka Samuelnën kakëxa! ¡Ënu kana 'ai kixun kakëxa!
5 Usakian kuënkëx ka an kuëënkësa sinani anu abákiani kuanxun Elí kakëxa:
—Ënu kana uan; ¿uisa oti kaina 'ë kuëan?
—Kakëxunbi ka 'ën kana mi kuënkëma 'ai —kixun Elínën kakëxa—. Mix anu 'uxkë anubi kamina kuanti 'ai kixun ka Elínën kakëxa. Kakëx kuanx ka Samuel anua 'uxkë anubi kuanx 'uxtëkëankëxa.
6 'Uxkëbi ka Nukën 'Ibun amiribishi kuëntëkëankëxa:
—¡Samuel Samuel! Kakin kuëntëkënkëx ka anua 'uxkë anuax nirukiani kuanxun Elí kakëxa:
—Ënu kana uan. ¿Uisoti kaina 'ë kuëan? kixun kakëxa:
—Kákëxun ka 'ën kana mi kuënkëma 'ain 'ën bakë bëchikë kixun —Elínën kakëxa. Mix anu 'uxkë anubi kamina kuanti 'ain kixun katëankëxa.
7 Usa 'ain ka Samuelnën Nukën 'Ibu 'unánkëma pain 'iakëxa, usa 'ixun ka uisakin kara Nukën 'Ibun uni ñu 'akinia kixun 'unánkëma pain 'iakëxa.
8 'Aínbi ka Nukën 'Ibun Samuel rabë́ 'imainun achúshi okin kuëntëkëankëxa, usakian kuënkëx nirukiani kuanxun ka Elí kakëxa:
—Ënu kana 'ain; ¿Uisoti kaina 'ë kuëan? Usakin 'aia ka Elínën Nukën 'Ibun ka bëná uni Samuel ënë kuëënia kixun sinánkin, 9 ësokin kakëxa:
—Anu mi 'uxkënu kamina kuanti 'ain; anuxun kamina mia kuënkëxun, Nukën 'Ibu kati 'ain: Min uni 'ikë kamina kuaisabi 'inun añu 'ati kaina kuëëni 'ë kati 'ain. Ësakian kakëx ka Samuel anua uxkë anubi kuantëkëankëxa.
10 Ësakian kakëx kuanx anu 'uxkënu kuankë ka Nukën 'Ibun bëráma kuënkësabi okin aín anën kuëntëkëankëxa:
—¡Samuel! ¡Samuel! Kakin kuënkëxun ka min unin ka kuatia kamina kiti 'ai kixun Samuelnën kakëxa.
11 Kakëxun ka Nukën 'Ibun ësokin kakëxa:
—'Ën kana a kuatia rakuëtan bamai bërëtanun añu kara Israelkaman menu 'ati 'ain. 12 A nëtë 'ikëbëtan kana a nëtënbi, uisakin aín aintsi anuxun karana Elí kan usaibia 'inun 'imiti 'ain. 13 'Ën kana usabi okin aín aintsikama tëmëramiti 'ai kixun kana a ñuixuan, usakin kana 'itsaira 'inun ñu 'aisama 'akë kupín 'ati 'ai kixun ka an 'unánxa; aín bakë bëchikë kaman 'ën kuëënkëma ñukama 'aiabi ka usakin kamina ñu 'atima 'ai kixun 'ësëkin kakëma 'ikën. 14 Usa 'ain ka Elínën aintsikama atun ñu 'atima 'akë ax ka uínsaranbi, ñuina xaroxunkë anunbi 'anan ñu 'inainshikë anunbi tërënxunkëma 'iti 'ikë 'ëx kin.
15 Usai kia kuatankëx ka Samuel anua 'ikë anubi pëkaratamainun 'uxakëxa. Anuxun ka pë́karakëma 'aínshi anuxun Nukën 'Ibu rabikë aín xëkuë xëókakëxa. Xëókax ka Samuel namákësa okían iskë ñukama Elí ñuixuntimi rakuë́akëxa, 16 'aínbi ka Elínën kuënxun kakëxa:
—¡Samuel, 'ën bakë bëchikë! Kakëxun ka:
—Ënu kana 'ai kixun kakëxa.
17 Kakëxun ka Elínën ñukákëxa:
—¿Uisakin kara Nukën 'Ibun mi kax? 'Ëmi kamina añu ñubi unëtima 'ain. Diosan ka kamabi 'ë ñuixunkimami an kakë ñukama unëia mi tëmëranun 'imiti 'ikën.
18 Kakëxun ka Samuelnën unë́kinma kamabi ñu ñuixuankëxa, ñuixunkëx ka ratuti Elí munuma kuënkëni kiakëxa:
—¡Ax ka Nukën 'Ibu 'ikën! Usa 'ain kamina uisakin kara mi kaia usakinbi 'ati 'ain.
19 Usa 'ikë ka xura 'aish bërunania ënkinma 'akinkin Samuel ax kikësabiokin Nukën 'Ibun 'akiankëxa. 20 'Imainun ka kamabi Israelkaman 'unánmainun Dan kakë ëma anuxun 'unánmainun, Beerseba anuxunribi Samuelnën ka këmëkinma asérabi Dios kikë bana uni ñuixunia kixun 'unánkankëxa. 21 'Imainun ka Nukën 'Ibun amiribishi abë banakin Siló, kakë ëmanu anuxun Dios rabiti xubu 'ikë anuxun katëkëankëxa. Anuxun ka aín bana 'unánkin Samuel 'unánmiakëxa.