Achúshi nëtën ka filisteo suntárukamax Israel kamabë 'akánanti sinanx timë́kankëxa, usaía 'ikëbë ka israel suntárukamaxribi atubë 'akananux mëníokakëxa, mëníokakiani rikianx ka Eben-ézer kakë anu bëbax anu 'ikankëxa. 'Imainun ka filisteo suntárukamaxribi ëma Afec kakë me sapan 'ikë anu timë́akëxa, 2 anuxun ka filisteo suntárukaman pain israel suntáru 'akin pëuakëxa, pëuax abë 'akanankin ñusma oxun 'akin ka cuatro mil Israel suntáru rëtëkankëxa.

3 Usakia 'akëx ka anuaxa 'akanankë anuax Israel suntáru raírinëx rikiankëxa, rikiankëbë ka atun 'apukamax kiakëxa: “¿Uisa kupí kara Nukën 'Ibu bërí filisteo suntárukaman usakin nu 'anun 'amiax? Anu kuanxun kamina Siló kakë ëmanu nankë bunántisa okin 'akë kurin ratakakakë anua Nukën 'Ibu Diosan bana kuënëokë 'arukë a bitsi kuanti 'ain, axa nu nëbëtsi aín ka Diosan ax numi nishkë unikamanua nu ië́miti 'ikën.” 4 Usai kitankëxun ka Israel 'apukaman an biti suntáru raíri Siló kakë ëmanu xuakëxa, xukëx kuanxun ka bunántisa okin 'akë kurin ratakakakë anua Dios kamabi kushiñu Querubin samaira ainan a bëakëxa. Bëkëbë ka Elínën bëchikë Hofní 'imainun Finees a rabëtaxribi atubë uakëxa, ukin ka anua Diosan bana kuënëokë 'arukë bunántisa okin 'akë a bëakëxa.

5 Usakin bëia isi anua atux bukukë anu bunántisa okin 'akë kurin ratakakakë a nukukëbë ka, Israel suntárukamax 'itsaira kuëëni me banami chirinkin me shaíkaisa oi 'ikankëxa. 6 Usai kuëëni sharati 'ia ka filisteo suntárukaman kuakëxa, kuati ka atúxbi ñukákanani kikankëxa. ¿Uisakatsi kara Israel suntárukamax anua atux bukukë anuax 'aisamaira sharatin? Usa 'ain ka Israel suntárukaman bunántisa okin 'akin kurin ratakakakë anu Diosan bana kuënëokë 'arukë anua atux bukukë anu buánkë filisteo suntárukaman kuakëxa, 7 kuati rakuë́ti ka kikankëxa: “¡Atun Dios ka anua Israel suntárukama 'ikë anu uaxa! ¡Nun kananuna uinsaranbi uni usai 'ia kuakëma 'ain! 8 ¡Usakin ñu 'akëbëtan kara! ¿Uin atun Dios kushiira an 'atima oia nu 'akinti 'ik? ¡Ax ka an egipcio unikama anu uni 'ikëma menuxun këñumianan bëtsi bëtsi ñu 'akin atu ismia a 'ikën! 9 ¡Usa 'ain kananuna kana 'aíma kixun sinánkima abi kushikin filisteo suntárukama 'ixun nun ira 'ati 'ain. Usokin 'akëxuma ka atun ñusma oxun 'atankëxun nun atu 'akësaribi okin nun atu ñu mëëxunun hebreo unikaman 'imiti 'ikën!”

10 Usa 'ain ka filisteo suntárukaman atubë 'akanankin israel suntárukama ñusma oxun 'aisamaira okin 'akëxa, usaira okían 'akëx ka anuaxa ukë atun 'ikënubi abákankëxa. Usakia 'akëx ka bamakë unikama ax 'aisamaira 'aish treinta mil suntáru israel rëtëkë 'iakëxa. 11 'Anan ka filisteo suntárukaman anua Diosan bana kuënëokë 'arukë bunántisa okin 'akë aribi Israel suntárukama 'akin, bianan ka Elínën bakë bëchikë rabë́ Hofní 'imainun Finees aribi rëtëkankëxa.

12 Usokian 'akëbë ka Benjamínën rëbúnkinën aintsi suntáru achúshinëx anuaxa 'akanankë anuax abákëxa, abátankëx ka aín aintsikama Siló kakë ëmanu bukukë a nëtënbi bëbaxun chanioi kuankëxa. Kuania iskankëxbi ka aín chupa nushi nushira 'ianan aín maxká men chuarukë 'iakëxa. 13 Usai kuanx bëbakin iskëxbi ka, Elí anu tsóti 'akë achúshinu tsóxun anun ëmanu atsínti xëkuë 'urama ñuitsimarua uni kara 'aíma kixun tania tsókë isakëxa. Anuax ka uisa kara bunántisa okin 'akë anua Diosan bana kuënëokë 'arukë a okanxa kixun sinani 'itsaira masá nuituakëxa. Usa 'ain ka suntáru 'akanankënuaxa abákë an ëmanu atsínkinshi uisai kara 'ikanxa kixun unikama ñuixuankëxa; ñuixunkëxun kuati ka kamabi unikamax munuma kuënkëni sharáti kikankëxa. 14 Sharákania kuati ka Elí anua tsókë anuaxbi sinani kiakëxa: ¿Uisakatsi kara unikamax xuamatira sharati banain? kixuan sinánkëbëbi ka, suntáru abákë ax bënëtishi abákiani kuanxun Elí tsókëbi kai kuankëxa, 15 anu ka Elí noventa 'imainun ocho baritiañu 'iakëxa, usa 'aish ka kaniakëti bëxuñu 'iakëxa. 16 Usa 'ikë ka uni an nukúkin kakëxa: Bëríbi kana anuaxa 'akanankankë anuax uisaibi kara 'iakë kuatsini bamati 'aishi aín. ¿Uisai kaina 'ikan 'ën bakë bëchikën? kixun ka Elínën ñukákëxa.

17 —Israel suntárukama nux kananuna filisteo suntárukaman 'aisamaira okin uni 'akëbë kana abán, —kixun ka ax abákë uni an kakëxa—. Kanan ka nun suntárukama ka kupitanunma 'itsaira rëtëkanxa, usokin 'akin ka min bakë bëchikë Hofní 'imainun Finees a rabë́ribi 'axa 'anan ka bunántisa okin 'akë anua Diosan bana kuënëokë 'arukë aribi filisteo suntárukaman biaxa kixun kakëxa. 18 Usakin nu 'akin ka suntárukaman bunántisa okin 'akë a biaxa kixun ñuia kuatira ka, Elí anun ëmanu atsínti xëkuë rapasu tsótaxbi kaniakëkëira 'aish aín ratúkënanbi kaxutan nipakëti tëtsasikiti ñuakëxa. An ka cuarenta baritia Israel unikama atun 'apu 'ixun 'akiankëxa.

19 Anu ka aín bakë bëchikë Finees aín xanu aín piaka ax ñuitsikë 'aish anúan bakënti nëtë́ishi 'ia kainkë 'iakëxa, usa 'ixun ka filisteo suntárukaman bunántisa okin 'akë anua Diosan bana kuënëokë 'arukë a bikankë kuakëxa, kuanan ka aín bënë Finees aribia 'akankë kuanan aín bënën papa axribia pakëti tëtúki ñukë kuati ratuti masánuitutia ka anuxuinshi aín tuákën paëokëxa, usakia 'aisamaira paëokëx tënëtisamaira tani ka anuaxëshi aín tuá bakëankëxa. 20 Usai 'ibia bë́nania iskin ka an bakënmikë xanukaman kakëxa; kamina rakuë́tima 'ain achúshi bëbu tuá kamina bakë́an, usakian kakëxunbi ka an kuashikin uisakinbi káma 'ikën. 21-22 Usai 'ixun ka ashikin aín tuá Icabod kakin anëakëxa. Anëi ka ashiti ësai kiakëxa: “An Israel kama 'akinti ka 'aíma 'ikën, bunántisa okin 'akë anua Diosan bana kuënëokë 'arukë a bikanxa.” Ësai ka xanu ax kiakëxa, usa 'ixun ka bunántisa okían 'akë a bianan filisteo suntárukaman aín bënë rëtëkë kuanan aín kuku ñukë añui kiakëxa.