Bunántisa okin 'akë a bibiankin filisteo suntárukaman atun menu buankan ñuikë bana
5
Usakin atu 'axun bixun ka bunántisa okin 'akë anua Diosan kushi 'ikë a filisteo unikaman Eben-ézer anuxun bibiankin atun ëma Asdod kakë anu buánkëxa; 2 buánxun ka Dagón kakë diosan xubunu atsímiakëxa, atsímixun ka a dios rapasu nankëxa. 3 Nónkë a pëkarakëma 'aínshi anuxun Dagón rabikë xubunu kuankinbi ka Asdodnu tsókë unikaman pakëax menu anua Nukën 'Ibun bana kuënëokë 'arukë bunántisa okin 'akë kurin ratakakakë a bëtánain rakákë mërai ratúkankëxa, ratúkin ka biruxun anua 'ikë anubi nitsintëkëankëxa.4 Usakin nitsinbiani koonx rikuatsintëkënkinbi ka Asdod ëmanu tsókë filisteo unikaman amiribishi pakëax atun dios Dagón kakë ax bunántisa okin 'akë kurin ratakakakë bëtánain menu rakákë mëratëkëankëxa. 'Aínbi ka aín maxká 'imainun 'ain mëkën rabë́ xubu xëputi 'akin tarakankë ami 'i tëkëax anubi rakákë mërakëxa. Mëramainun ka 'ain namishi uisaibi 'ikëma rakákë 'iakëxa. 5 Usa 'ain ka bëríbi uinsaran kara Dagónën sacerdotekama ax anuxun Asdod rabikë xubunu atsinia anun ka akaman atsínkin xëputi 'akin tarakankë 'i akama amátima 'ikën.
6 Usokin 'akë aín ka Nukën 'Ibun 'aisamaira ku 'irumikin Asdod ëmanu 'ikë 'imainun a menu tsókë filisteo unikama 'aisamaira tëmërai rakuë́nun 'imiakëxa. 7 Usai 'ia isi ka Asdod ëmanu tsókë unikama kikankëxa: “Israel unikaman Diosan bunántisa okin 'akë ax ka nun menu 'itima 'ikën, a diosan ka nu 'atima okin tëmëramianan nun dios Dagón aribi 'atimoia.” 8 Kikankëbëtan ka anu 'ikë 'apun kamabi filisteo 'apukama timëti unun kamiakëxa, kamikë uax timë́kë ka ësokin atu ñukákëxa:
—¿Uisa karanuna Israel unikaman Diosan bunántisa okin 'akë ënë oti 'ain? Kixun ñukákëxun ka Gad kakë ëmanu buántanun kamina xuti 'ai kixun axa timë́kë 'apukaman kakëxa.
Kakëxun ka Gad kakë anu filisteo unikaman buánkëxa. 9 Usakin buánkë aínbi ka Nukën 'Ibun Gad kakë ëmanu tsókë unikama 'insíni ku 'irumainun tuákamaribi ku 'iruax tëmëranun 'imiakëxa.
10 Usokëbëtan ka filisteo unikaman bunántisa okin 'akë anua Diosan kushi 'ikë a ëma itsi Ecrón kakë anu buántanun xuakëxa, xutia buánxun bëbarukinkëbëbi ka anu tsókë unikama munuma sharati kikankëxa; “Nua këñununbi ka bunántisa okin 'akë anua Diosan bana 'ikë a nunu bëkania kiax kikankëxa.” 11 Kamabi unikama axa Diosan ka nu 'aisama okin bamanun 'atima okë 'ainshi ka bëtsi ëmanu 'ikë filisteo 'apukama kamikëxa anu rikuantsikë kakankëxa: “¡Nukamaxnu 'aisamaira këñúkëma 'aínshi kamina anua Israel unikama Diosan bana kuënëokë nankë bunántisa okin 'akë ënë xukanti 'ain!” 12 Usai 'ikëbëtan ka naínuxunbi kuaisa 'itánun an 'akinun kixun aín nami ankëti ku 'iruaxia ñukëmakama an atun dios ñukákëxa.