—Kakë́xa timë́kë ka ñukákëxa, ¿Uisa karanuna anua Diosan ñukama 'arukë bunántisa okin 'akë kurin ratakakakë ënë oti aín? Uisokin karanuna anua bëkë anubi buántëkënun xuti 'ain kamina nu kati 'ai kixun ñukákëxa. 3 Ësokia ñukákëxun ka atún kakëxa: Israel unikaman 'Ibun bana anu 'arukë bunántisa okin 'akë kurin ratakakakë a 'inántëkënkin ka usabi xutima 'ikën, uisabi oxuma ka nukama ka 'atima oxa usa kupí Diosan bana anu 'arukë bunántisa okin 'akë a numa 'atima otëkënia ñu anu 'aruxun xukë 'iti 'ikën. Usokin 'akëbëa mitsun ku 'irukëkama a pëxkukin kamina Diosan ka nu ënkinma 'atima oxa kixun 'unánkanti 'ain. 4 Kakëxun ka atun kakëxa. —¿Añu karanuna nua nishkin 'atima oxunma 'anun 'axúnti 'ain? —kixun ka filisteo unikaman ñukákëxa.

—Ñukákëxun ka mapai achúshi kuri ku tankin 'axúnun —kixun sacerdote unikama kakëxa—, kanan ka achúshi achúshi mitsun 'apu 'axuanan ka mapai achúshi makún tankinribi a manëbi 'ati 'ain, mitsux kamina a 'insínan mitsun 'apubëbi tëmërakani kixun kakëxa. 5 Usokin kamina ku tankin kuri 'anan makún tankinribi 'ati 'ain, nun menu ñu 'apákëkamama këñuia 'ati 'ain, usokin kamina Israel unikaman Dios rabiti 'ain; usokin 'akëbëtan sapi ka nu 'atima okë ëanan nun diosribi 'anan me 'atimokë a ënti 'ikën. 6 Uisa kupí kaina mitsun bana kuakëmasa oi egipcio unikama 'imainun faraón 'iásai 'ikanin, atuxka Israel unikama Diosan 'atimokëxun aín menua chikinuxun bana kuatima 'ia usai 'ikanin. 7 Usa 'ain kamina mitsun carreta ió achúshi 'anun 'amiti 'ain; 'amikëxun sënë́on kamina vaca 'arakakë tuá achúshiocë rabë́ uínsaranbi me tukamikin tankëma bixun a rabë́bi 'ain manchanmi i tërë́katankëxun amibi carreta tëkërëkati 'ain; 'aínbi kamina aín tuákën vaca nuibianun 'amikinma anuxun pimikë xubunubi aín tuá xëputi 'ain. 8 Usokin 'atankëxun kamina bunántisa okin 'akë kurin ratakakakë anua Diosan bana 'ikë a carretanu 'aruti 'ain, 'aruanan kamina achúshi caja kuri ñu tankin 'akë aribi bunántisa anua Diosan bana 'ikë amo upíokin 'aruti 'ain, Diosan nishkin nukama 'atimokin tëmëramitima kupín 'axunkë a 'aruti 'ain. 'Aruxun kamina axia carreta kuantanun ënti 'ain. 9 'Aínbi kamina ësokin 'unánti 'ain: vaca rabë́ axa Bet-semes anua Israel unikama me sënë́nkë au kikiankin carreta uankë ax ka Israel unikama aín Diosan nu 'atimokin nu tëmëramikë 'ikë kixun 'unánti aín; 'aínbia vaca rabë́ ax anua ain tuá 'ikë xubu ami kikiani kuankëbëtan kananuna, ax ka an nu tëmëramikëma, nuxnu usai 'iti 'ain ka 'ia kixun 'unánkanti 'ain.

10 Usokin kakëxun ka filisteo unikaman usabi okin 'akëxa. 'Akin ka vaca rabë́ bitankëxun aín tuá pain anuxun pimiti xubunu xëpúakëxa, xëpúxun ka rabë́bi tëkërëkaxun ami carretaribi tëkërëkakëxa; 11 tëkërëkaxun ka carretanu bunántisa okin anua Diosan bana 'arukë kurin ratakakakë a 'aruanan bunánti chukúma anua kuri makún tankin 'anan ku tankin 'akë aribi 'aruakëxa. 12 'Arukin sënë́onkëbë ka vaca rabë́ ax Bet-semes kakë menu anun kuanti bain ami kikiani 'ain tuá kuëëni vaca 'inkësai 'ikiani kuani, amo pátsinima a puntëishi kuankëxa. Kuamainun ka mapai achúshi filisteo 'apukama ax, a kaxú kuani Bet-semes kakë me sënënakëkë anu a nuibiani kuankëxa. 13 Usokin 'abiani kuanmainun ka Israel unikama Bet-semes me sapannu tsókë raírinën trigo bimi biakëxa, bikinbi 'urakëo bunántisa okin 'akë anua Diosan bana 'ikë a buánkania mërai ka 'itsaira kuëënkankëxa. 14 Kuëënkëbë ka carreta anua Josuénën me Bet-semes 'ikë anu nirakëakëxa. Anua maxá chaiira 'ikë anubi nirakëakëxa. Nirakëkëbëtan ka Bet-semes anu tsókë unikaman carreta 'akë 'i abi karuaxun anun vaca rabë́ a 'aímai këñutanun Nukën 'Ibu xaroxuankëxa. 15 Usokian 'anun ka levita unikaman bunántisa okin 'akë anu Diosan bana 'arukë a pain nanpanan, bunánti chukúma anua kuri ñu tankin 'akë purukë a maxá chaiira kamanan nanpákëxa; a nëtën ka Bet-semes anu tsókë Israel unikaman Nukën 'Ibu ñuina rëxun 'aímai këñutanu xaroxuanan bëtsi ñukamaribi xaroxuankëxa. 16 Ësokin 'aia isbiani ka mapai achúshi filisteo 'apukama ukë ax a nëtënbi Ecrón kakë 'ain ëmanubi kuantëkëankëxa.

17 Mapai achúshi okin kuri ku tankin 'akë ax ka filisteo unikaman Nukën 'Ibun atun ëma Asdod, Gaza, Ascalón, Gat, 'imainun Ecrón akama 'atimokin tëmëramitima kupí 'akë 'iakëxa; 18 'imainun ka makún tankin kuri 'akëkama ax ka filisteo unikaman ëma mapai achúshi abëtan sënën 'inánan ëmakama ënënmenma buinarakin kënëkë a 'imainun ëma chukúma kënëkëma akamabëtan sënën 'akë 'iakëxa. Maxá chaiira akamanan bunántisa okin 'akë kurin ratakakakë nan ax ka anua Josuénën me 'ikë, Bet-semes anua bëríbi istisa 'ikën.

19 'Aínbi ka Nukën 'Ibun Bet-semes anu tsókë unikama raíri bunántisa okin 'akë 'ain namë isia bamanun 'imiakëxa. Usokin 'akin ka setenta nukëbënë uni Nukën 'Ibun këñuan ka anun rabanan anu tsókë unikama inkankëxa Diosan usakin atu 'imikë 'ain. 20 Usokin an ka Bet-semes anu tsókë unikama kiakëxa: ¿Uin kara anubi nixun Nukën 'Ibun ax upíira 'ixun 'atimokëxun tënëti 'ik? ¿Uimi okin karanuna bunántisa okin 'akë anua Diosan bana 'ikë ënë numa 'atimoia xuti aín? 21 Ësai kitankëxun ka anu 'ikë unikaman Quiriat-jearim anu tsókë unikama ësokin kamiakëxa: filisteo unikaman ka bunántisa okin 'akë anua Diosan bana 'ikë kurin ratakakakë a bëtëkëanxa, usa 'ain kamina bitsi 'ukanti 'ain kixun kamiakëxa.