2 Usa 'ain ka Quiriat-jearimnu 'ikë ëmanu veinte baritia 'imikin bunántisa okin 'akë anua Diosan bana kuënëokë 'arukë a bixun, 'arakamainun Israel kamax uisakin kara Nukën 'Ibun atu 'akinti 'ikë kixun 'itsaira sinani masá nuitukankëxa. 3 Usa 'ain ka Samuelnën kamabi israel unikama kakëxa: “Mitsun asérabi mitsun nuitubëtanbi sinánkin a rabikin kamina bëtsi menu tsókë unikaman rabikë diosmi rabikankë a ënkin mitsun 'arakakë Astarté tankin 'akë a bixun nikanti 'ain, usakin 'atankëxun kamina Nukën 'Ibu rabikin ax kuëënkësabi okin 'akánti 'ain. Usakin 'akëxun ka mitsu filisteo unikama 'atima oia chikínti 'ikën.” 4 Usakia kakëxun ka israel unikaman atunbia Baal 'imainun Astarté tankin 'akëa rabikë ñukama a putankëxun Nukën 'Ibu ishi rabitëkënkankëxa. 5 Usokin 'atankëxun ka Samuelnën, an timë́kanun kixun kati uni xuakëxa: “Xukëxun kakëx uax Mispá kakë ëmanu timë́kankëxa, anuxun ka Nukën 'Ibu 'akinun ñukáxuankëxa.”

6 Usakin kamikëx ka israel unibu Mispá kakë ëmanu timë́kankëxa, anuxun ka raíri unikaman 'umpax bitankëxun a 'inaishikësa 'itánun menu ampë́nkakëxa. Usakin 'akë ax ka Nukën 'Ibu 'inaishiti nankë ñu 'iakëxa. Usakin 'atankëxun ka a nëtën unikama añu ñubi pima samákin atun 'uchakëkama Nukën 'Ibu chikinaxunkankëxa. Anuxun ka Samuelnën Mispá kakë ëmanuxun Israel unikama aín 'apu 'ixun atu 'akinkin pëuakëxa. 7 Usai 'ia israel unikama Mispá kakë ëmanu timëkankë ka filisteo 'apukaman kuakëxa, kuabiani ka atu 'atëkënkatsi kiax aín suntárukama buani rikiankëxa. Usai rikiania kuati ka israel unikama 'itsaira atumi rakuë́akëxa, 8 usai 'ikin ka Samuel kakankëxa: “Nukën Ibu nu ñukaxunkin kamina ëntima 'ain, an ka filisteo unikaman 'ati 'ikëbi nu ië́miti 'ikën.”

9 Usakin kakëxun ka Samuelnën achúshi oveja 'ain tuá bërí kanikë bitankëxun Nukën 'Ibu 'aímai këñutanun raroxuankëxa; xaroxunkin ka Israelkama 'akinun Nukën 'Ibu ñukáxuankëxa, usakin 'akëxun ka Nukën 'Ibun an ñukákësabi okin 'akiankëxa. 10 Usakian Samuelnën oveja tuá bërí kanikë 'aímai këñutanun xaromainun ka filisteo suntárukamax israel unikama 'akatsikiax atu 'urama obëtsini ukankëxa; usai 'ikëbëtanbi ka Nukën 'Ibun naínuax kanákamë 'ëo kushiira banai sharákirui atu rapasu 'ibúnun 'imikëbë ratúkankëxa, usai 'ikëbë ratuti ka filisteo suntárukamax anuaxbi abákankëxa, usakin 'akëx ka israelnën suntárukaman 'akësa 'inun filisteo unikama abákëxa. 11 Usai abákëbë ka israel suntárukama Mispá kakë ëma anuaxbi kuankin nuibiankin abë 'akanankin nukuxun filisteo unikama atu kupitanuma 'akin, Bet-car kakë ëma anu bërúkin 'akëxa.

12 Usakin 'an ka Samuelnën achúshi mapara chaiira bixun Mispá kakë ëmabëa Sen kakë me sënënakëkë anu nitsíankëxa, nitsintankëxun ka Eben-ézer kakin anëakëxa anëi ka ësai kiakëxa: “Bërí ka ënuxun Nukën 'Ibun nukama 'akianxa kiax kiakëxa.”

13 Usakin ka Israel suntárukama filisteokaman 'akëxa, usakian 'akëx ka amiribishi Israel kaman menu kuantëkëama 'ikën; usa 'ain ka Samuel atubë tsókëpan 'ain filisteo unikaman atu ubioxuma 'anun Nukën 'Ibun 'imiakëxa. 14 Usakin ka filisteo unikaman 'ibua 'ikëbi israel suntárukaman atubë 'akanankin 'atankëxun, Ecrón anuxunbi Gat kakë ëma anu sënë́nbi bitëkëánkëxa, biax ka a menu Israel kama tsótëkëankëxa. Usakin atu 'axun ka israel unikaman amiribishi filisteo unikaman bia 'ikëbi atun me bitëkëánkëxa, bitankëx ka israel unikama Amorreo unikamabë nishananima upitax tsóakëxa.

15 Samuel an ka Israel kama atun 'apu 'ixun aín ñuti nëtë 'itámainun 'akiankëxa, 16 usa 'aish ka baritia tibi Betel ëmanu kuanan, Guilgal 'imainun Mispá kakë ëma anuribi kuankin uisai kara Israel kama 'ia isanan atux anua tsókë ëmakamanu kuankin bana ñuixuni niakëxa. 17 Usai akama oi nikin atu istánkëx ka anua aín xubu 'ikë Ramá kakë anubi utëkëankëxa, anuxun ka Israel kama atun 'apu 'ixun 'akiankëxa. 'Anan ka anuxun ñuina xaroti achúshi maxax bukunrukin Nukën 'Ibu 'axuankëxa.