Israel unibu 'apuñu 'iti kuëëan ñuikë bana
8
Kaniakëkin ka Samuelnën 'apu 'ixun Israelkama 'akinti aín bakë bëchikëkama anëakëxa. 2 Aín rëkuë́n bakë bëchikë, Joel kakin anëkë 'imainun ka aín bëchikë itsi Abías ax Beerseba anu 'apu 'iakëxa. 3 Usa 'aínbi ka aín bakë bëchikëkaman aín papa 'akësokin ñu 'aíma, 'itsaira ñuñu 'iti kuëënkin, unikama bëtsibë 'atima onankë a mëníoxunkinma a kupíonun kixun 'amikin upíokin ñu 'ama 'ikën. 4 Usa 'ain ka kamabi Israel kaman 'apubu ax timëkiani Ramá kakë anuax Samuelbë mëranax banai rikiankëxa, 5 anu rikianxun ka ësakin kakëxa: “Mix kamina kaniakëkë uni xënira 'ain, usa 'aínbi ka min bakë bëchikëkaman min 'akësabikin ñu 'aima; usa 'ain kamina achúshi 'apu axa nukaman 'apu 'iti nu anëxunti 'ain, bëtsi menu tsókë unikaman 'akësaribi okin.”6 'Aínbi ka Samuelnën atun 'apu achúshi anëxunun kixun kakëxunbi atu kuëënxuama 'ikën, kuëënkinma ka abë banakin Nukën 'Ibu kakëxa. Israel kamax ka atun 'apu achúshiñu 'isatania kixun kakëxa; 7 kakëxunbi ka Nukën 'Ibun ësakin kakëxa: “Añu 'axúnun kara Israel kaman mi kaia usakinbi kamina 'axúnti 'ain, atúan min kakëxun kuaisama tankë ax ka min banama 'ën bana kuaisama tankë 'ikën, usai 'ikin ka atun 'ëx aín 'apu 'ixun 'akinti kuëënkanima. 8 Anun Egipto menua 'ën chikía a nëtën usakin 'ë 'a 'ixun ka usaribi okin mi bërí 'aia, usa 'ixun ka bëtsi dioskama rabikin 'ë manuaxa. 9 Usa 'ain kamina, añu 'axúnun kara mi kaia a 'axúnti 'ain; 'aínbi kamina ësokin pain atu kati 'ain, axa atun 'apu 'iti uni an kara uisokin atu 'anuxun 'aia kixun ñukáti 'ain.”
10 Usa 'ain ka Samuelnën atun 'apu achúshi kuëënkëbëtan Nukën 'Ibun usakin 'anun kakë a Israel unibu ñuixuankëxa. 11 Ñuixunkin ka ësakin kakëxa:
—Axa mitsun 'apu 'iti an ka ësokin mitsu 'ati 'ikën: Mitsun bakë bëchikëkama ka ësakin 'ati 'ikën, anuax 'akánanti caballonën nikinkë carreta anu rairi 'imainun ka, axa suntáru 'ikësaribiti caballonuax 'akánanti raíri 'imiti 'ikën, 'imainun ka aín patsan an 'apu 'ikë suntáru 'ixun a bërúanun 'imiti 'ikën. 12 'Imainun ka raírinëxribi aín 'apu 'ixun an mil suntáru 'imainun cincuenta suntárunën kushi 'inun 'imiti 'ikën. Usakin 'anan ka raíri mikama an me manë paránën tukaxun anu ñu 'apákë aín bimi binun bimiti 'ikën, bimianan ka anun 'akanankë ñu caballonën nikinkë anun mëníoti ñukama aribi unionun 'amiti 'ikën. 13 'Imainun ka mitsun 'ini bëchikë xanukamaribi ñu mëëxunun 'imianan raíri an aín ro sanuira anuan 'iti 'axúnti 'imianan an ñu 'aruxuanan an pán 'axúnti akamaribi xanu 'imiti 'ikën. 14 Usakin 'anan ka aina 'inun me aín upíira kaístankëxun 'ibuati 'ikën, 'imainun ka ñu 'apákëkamaribi aín upíbu kaísun 'ibuati 'ikën, 'ibuanan ka mitsun olivos 'imainun uvas 'apákë kamaribi biti 'ikën. Bixun akama 'ain uni an ñu mëëxunkë aín unikama 'inánti 'ikën. 15 'Inánan ka ñu 'apáxunmi aín bimi bikë aribi mapai rabë́ okin nankin bikëbi achúshi bixun, aín uni an ñu mëëxunkë a aín suntárunën kushikama a 'inánti 'ikën. 16 Usakin 'anan ka mitsun ñu mëmikë unikama 'imainun an mi ñu 'axunkë xanukamaribi mi bikuanan, min burro aín upíbu 'imainun vaca bënëkamaribi kaískin ainan 'inun biti 'ikën. 17 Usakin 'anan ka min 'arakakë ñuinakama mapai rabë́ 'ikëbi achúshi ainan 'inun biti 'ikën. 'Imainun kamina mitsunbi atu tëmërakin ñu mëëxunti 'ain. 18 Usokin mitsúnbi kuëënxun anëkëxun 'apu an 'atima okin tëmëramikëxun, an 'akinun ñukákëxunbi ka Nukën 'Ibun mitsun bana kuatima 'ikën.
19 'Aínbi ka Israel kaman Samuel an kakëxun kuakinma ësakin kakëxa:
—Usama ka. Nuxribi kananuna nun 'apuñu 'iti kuëënin kixun kakëxa, 20 nuxribi kananuna bëtsi menu 'ikë unikama 'ikësai 'apuñu 'isatanin, an ka nukama axa numi nishkë unikamabë 'akanania nu 'akinti 'ikën.
21 Ësaia Israelkama kánani kikania kuatankëxun ka Samuelnën a bana kamabi ñuixunkin Nukën Ibu kakëxa, 22 kakëxun ka ësakin Nukën 'Ibun kakëxa:
—Atun mi kakësabiokin kamina atun 'apu achúshi anëxunti 'ain. Usa 'ain ka Samuelnën anuaxa ukankë atun ëmanubi kuantëkëntanun Israelkama xuakëxa.