3 Achúshi nëtën ka Quis kakë uni aín burro xanukama nëtë́akëxa. Nëtë́kë 'ain ka ain bëchikë Saúl kakëxa:

—Mënioka kiani kuanxun kamina nun burro xanukama raíri nëtë́kë a bari kuanti 'ain. Kuankin kamina an nu ñu mëëxunkë uni achúshi buánti 'ain. 4 Usakin kakëx mëníoka kiani ka Saúl Efraínën rëbúnki 'ain bashi a inubiani kuankin Salisá kakë me 'unánkë a inubiankëxa; inubiani kuankinbi ka aín burro xanukama mërama 'ikën. Mërakinma Saalim kakë me a inubiani kuanxun Benjamínën rëbúnkinën me anuaribi barikinbi 'aíma okëxa. 5 'Aima obiani Suf kakë me anuribi kuani bëbakin ka an ñu mëëmikë uni abë kuankë a Saúlnën kakëxa:

—'Aima ka usa 'ain kananuna ënushi bërukiani kuantëkënti 'ain, 'ën papa sapi ka numi 'aisamaira sinania burro xanukamami 'ikësamaira usa 'ain kananuna kuantëkënti 'ain. 6 Kakëxun ka an ñu mëëxunkë uni abëa kuankë an kakëxa:

—Ënë ëmanu ka uni achúshi an Dios kikë bana uni ñuixunkë kamabi unían aín bana tankë 'ikën, usa 'ain ka ax kikësabi oi ñu 'ia. Anu kananuna kuanti 'ain, an sapi ka anun a bari kuanti bai nu ñuixunti 'ikën.

7 —Asabi ka anu kananuna kuanti 'ain kixun ka —Saúlnën kakëxa—. ¿'Aínbi karanuna añu uni a buánxunti 'ain? Nun a piti ñubi ka pishanu 'aíma 'ikën. Añu karanuna an Dios kikë bana uni ñuixunkë a 'inani kuanti aín. 8 Kakëxun ka an ñu mëëxunkë unin kakëxa:

—'Ëx kana manë kuríki chukúma achúshiñura 'ain. A kananuna an Dios kikë bana uni ñuixunkë uni anun kuanti bai nu isminun katankëxun 'inánti 'ain. 9 (Bërámaira ka israel unikamax Diosbë banatisa tani kiakëxa.) “An Dios kikë bana uni ñuixunkë kananuna isi kuanti 'ain.” “Usa 'aínbi ka bërí usa unikama an Dios kikë bana uni ñuixukë kakin anëia” (bërámaira ka an Dios kikë bana uni ñuixunkin kakin anëkë 'ikankëxa).

10 —Asabi ka kixun ka —Saúlnën kakëxa—. Anu kananuna kuanti 'ain. Kanantankëx ka a rabëtabi anua an Dios kikë bana uni ñuixunkë uni 'ikë ëma anu kuankëxa, 11 kuani mapërakëkiani ëma ami kikiani kuankëbëbi ka 'umpax bitsi rikuatsinia mërakin xanu chipashkama ñukákëxa:

—¿Ënua karana an Dios kikë bana uni ñuixunkë uni a mërati 'ain? 12 Kakëxun ka xanu chipashkaman kakëxa:

—Anu ka 'aínbi ka 'uripain kuankënu 'ikën. Usa 'ain kamina bënë́kiani kuanxun ënë ëmanu 'ikë unikaman Dios ñuina rëxun xaroxunkë anua bërí kuankëmashi isi kuanti aín. 13 Usa 'ain kamina anu nukúkinshi mitsun uinu kara ax 'ia bariti 'ain, anuxua ñuina xarokin piti 'akë anu kuankëmashi. Unikaman ka axa kuankëmapan 'ain masima pitima 'ikën. An pain upíokin sinánxunia ka unikaman ñuina nami xarokë a piti 'ikën, usoia ka axa kamikëx rikuatsinkë unikaman piti 'ikën. Usa 'ain kamina bënë́kiani kuanxun anua mërai kuanti 'ain.

14 Usakian kakëx ka mapërakëkiani ëma 'ikë ami kikiani kuankëxa. Kuani bëbai kuankëbëbi ka Samuel ami kikuatsini, anua pinux timëkankë anu kuani chikíkuatsini uakëxa.

15 A pëkarakëbë Saúl a ëmanu bëbanun ka Nukën 'Ibun namámikësokin Samuel ësokin kakë 'iakëxa: 16 “Imë́ishi ënë horanbi kana achúshi, Benjamínën rëbúnki aín menu tsókë xuti 'ain, akamina 'ain maxkánu xëni chikukin mamëti 'ain, ax ka Israel unikaman 'apu 'iti 'ikën. An ka filisteo unikaman 'atimoiabi 'ën uni Israelkama 'akinti 'ikën, 'ënbi kana 'itsaira tëmërai kikania kuakin atu 'akinti sinan.”

17 Usa 'ain ka Samuel, Nukën 'Ibun Saúl kuania isia kakëxa: “A ñuikin 'ën mi koonkë uni a ka aia. Ax ka 'ën unikaman 'apu 'iti 'ikën.” 18 Usa 'ain ka anun ëmanu atsintimi kikuatsini ukin 'urama okëxun Saúlnën Samuel kakëxa:

—'Ë kamina min uinu kara an Dios kikë bana uni ñuixunkë uni ain xubu 'ikë kamina 'ë kati aín.

19 —“'Ëx kana an Dios kikë bana uni ñuixunkë a 'ain —kixun ka Samuelnën kakëxa—.” Anua timë́kankënu kamina kuanti 'ain, bërí kamina anuxun 'ëbëtan piti 'ain. Imë́ishi pëkarakëma 'aínshi kana 'ë katimi sinánkë banakama a mi kati 'ain, katankëxun kana mi xuti 'ain. 20 Min burro xanukama axa nëtë́kë ka rabë́ 'imainun achúshi nëtë 'ikën, usa 'aínbi kamina ami 'itsaira sinántima 'ain, akama ka bëtsi unin mëraxa. Kamabi Israel kamax ka min xubunu mibë 'ikë min aintsi achúshinëx 'apu 'iti kuëënia. 21 Kakëxun ka Saúlnën kakëxa:

—¡'Ëx kana Benjamínnën rëbúnki 'ain, usa 'aínbi kana 'ëx Israelkaman 'anákaira 'ain! 'Imainun ka 'ën aintsikama Benjamínën rëbúnki 'ikëbi ñuumara 'ikë unin isia. ¿Uisa kupí kaina ësokin 'ë kain?

22 Ësokin kakëxun ka Samuelnën Saúl an ñu mëëxunkë uni akëñun bibiankin, anua pinux timëkamë 'ëokankë anu buánxun nuküakëxa, nukuxun ka Samuelnën Saúl abëa kuankë an ñu mëëxunkë uni akëñun, anua ñuina xarokë pinux uni timë́kë aín kataitsi anu buánkëxa, buánxun ka anua treinta uni ain kushibu tsókë 'ikë anu upí ñunu tsónpankëxa: 23 Usoxun ka Samuelnën an piti 'arukë uni a kakëxa: 'Ën mi nanxunun mi 'inánkë nami a kamina 'ë bëxúnti 'ain. 24 Kakëxun ka bënë́kinshi an ñu 'arukë unin ñuina 'arukë aín kisi achúshi bitsínkin bëxun Saúl 'inánkëxa. 'Inánkëxun ka Samuelnën kakëxa:

—Ënëx ka 'ën mi nanxunkë 'ikën. Unikama kamikin kana mi pikinti a amo nan. Usakin ka Saúlnën a nëtën Samuelbëtan piakëxa.

25 Usokin piíkin sënë́obëtsini ka anuax Saúl uakëxa, ukë ka anua 'uxti xubu manámi Saúl mëníoxuankëxa, 26 mëníoxunkëx ka anu Saúl 'uxakëxa. 'Uxnë́tia pë́karakë ka Samuelnën xubu manánua kuënxun Saúl kakëxa:

—Kamina mi kuanun mëníokati 'ain. Kixun kakëx ka Saúl abëa kuankë an ñu mëëxunkë uni a 'imainun Samuelbë ëman chikíakëxa chikíkiani ka ëma uri kuankëxa, 27 kuankëbë abë ëmanuax chikíkiani kuankin ka Samuelnën Saúl kakëxa:

—Min ñu mëëmikë uni a kamina axpain rëkuë́nkianun xuti 'ain, 'ë pain kamina kaínti 'ain, 'ën kana Diosan usakin mi kanun 'ë kakë bana mi kaisatanin.