—Nukën 'Ibu ka mixmi bërí Israelkaman 'apu 'inun 'imiti 'ikë kixun ka kakëxa. Mix atun 'apu 'ixun kamina a 'urama 'ikë ami nishkë uni kamabë 'akananun 'imitima 'ain. 'Imainun ka aín unikaman 'apu 'imikëx kaina uisai 'i tantia Diosan mi 'imikë 'ikën. 2 Bërí kamina 'ëbë ënananin usa 'ain kamina, anu Raquel maían 'urama anuax uni rabëbë mërananti 'ain, ax ka Selsah anua Benjamínën rëbúnkinën me 'urama anu 'ikën. Atun ka ami barikë burro aín xanukama ka mëraxa ka mi kati 'ikën, usa 'ain ka burro aín xanukama ami sinanima mitsumira bërí sinania kixun ka mi kati 'ikën, uisa kara 'ën bakë bëchikë 'iaxa kiax kia. 3 Ënuax kuanxmi anua Tabor kakë menu i pëñanakëkë nikë anu bëbakëbë ka Betelnuxua Dios rabi kuankë uni rabë́ 'imainun achúshi uni mibë mërananti 'ikën. Atun ka achúshinëan rabë́ 'imainun achúshi chibu uamainun bëtsínribi rabë́ 'imainun pán achúshi uamainun ka bëtsin achúshi ñuina xakánu 'arukë uvas baka xëati 'akë a uanti 'ikën. 4 Uankin mërai mibë kanankian pán rabë́ 'inánkankëxun kamina timakinma biti 'ain. 5 Usokin 'atankëx kamina matá me chairukë Diosan me 'ikë, Guibeá kakë anua filisteo unikaman suntáru 'ikë anu bëbati 'ain. Bëbax a ëmanu atsini kamina an Dios kikë bana uni ñuixunkë unikamabë anuxun Dios rabiti 'akë anuax rikuatsinkëbë atubë mërananti 'ain. Mëranankin kamina atux kuanmainun rëkuë́nkiani kuankin mëkën rëbun mëëkin banamikë, 'imainun arpakëñun, xunkakin banamikë ñukama, a banamibiani kuania isti 'ain. 6 Usakin a iskëbë ka Nukën 'Ibun Bëru Ñunshin mibë 'iti 'ikën, 'imainun ka mibë 'ikin an bana ñuixunkë unikaman sinánsaribi 'imikin bana ñuixunun mi 'imiti 'ikën. 7 Uínsaran kara Diosan 'imikëx minu usai ñu 'ia anun kamina Diosanbi mi 'akinkëxun sinánti 'ain. 8 Usa 'ain kamina ënuax kuantankëxun Guilgal bëmánon, anuax 'itsama nëtë 'ikëbë mërananxun ñuina 'axun 'aímai këñutanun xaroi ñu 'atima 'akëkama mëníonanux timë́ti anu bëbaia 'ë kaínti 'ain. Anuxun kamina mapai achúshi 'imainun rabë́ nëtë 'imikin 'ë kaínti 'ain. Anuxun kana ami 'ati ñu ñuikin mi kati 'ain.

9 Usakin kakëx Samuelbë ënanankiani kuani ka Saúl Diosan 'imikëx aín nuitu bëtsikë upí tani chuámarua 'iakëxa. Usakin chuámarua tankëbë ka a nëtënbi a ñuikian Samuelnën kakë ñukama usaibi 'iakëxa. 10 Usai 'ikiani kuanxa Saúl aín unibë Guibeá, anu bëbakë 'ain ka, an Dios kikë bana ñuixunkë unikamax atubë mëranani kuankëxa. Kuankë 'ain ka Diosan Bëru Ñunshin upitan abë 'ixun 'amikëxun Saúlnën atun 'akësaribi okin bana ñuixunkin uni kuëënmiakëxa. 11 'Aínbi ka an bëráma 'unan akamax, an Dios kikë bana uni ñuixunkë unikamabë timë́xun bana ñuixunia isi ami banai bëtsibë bëtsibë kánani kikankëxa. “¿Uisai kara Quisnën bëchikë ux 'iax? ¿Saúlnëxribi kara an uni bana ñuixunkë unikama achúshi 'ik?”

12 'Aínbi ka atubë 'ikë Israelkama achúshinëx ësai kiakëxa: “¿'Imainun kara uix 'ain papa 'ik?” An ka 'unánxa anun uni banakë bana kikësabi oi 'ia. “¿Usa 'ain kara Saúlribi an uni bana ñuixunkë unikama achúshi 'ik?”

13 Usakin bana ñuixunkin sënë́onbiani kuanx ka Saúl anua 'ikë aín xubunu bëbakëxa. 14 Usaia bëbakë 'ikë ka ain kukun an ñu mëëxunkë uni akëñunbi ñukákin kakëxa:

—¿Uinu kaina kuankan? Kakëxun ka Saúlnën kakëxa:

—Burro aín xanukama nëtë́kë bari kananuna kuan. 'Aínbi kananuna mërákëbëma, Samuel isanan abë banakuatsini ain.

15 Ësakian kakëxun ka aín kukun an ñu mëëmikë uni 'imainun Saúl kakëxa:

—¿Uisakin kara Samuelnën mi kax? Akamina 'ë bërí ñuixunti 'ain.

16 Kixun kakëxun ka Saúlnën aín kuku kakëxa:

—Nun kuamainubi ka ësokin nu kaxa burro aín xanu akama ka mërakanxa kixun ka nu kaxa. 'Aínbi ka Saúlnën abë banakian Samuelnën Diosan Bëru ñunshin upitan ka mi 'apu 'imiti 'ikë kakë ashi ñuixuanma 'ikën. 17 Usakin kakë 'ixun ka Samuelnën israel unibu abëtan Nukën 'Ibu Mispá kakë ëmanuxun rabi unun kixun kamiakëxa; 18 anuxun ka ësakin kakëxa:

—Ësai ka israel unibunën Dios kiaxa: “'Ën kana Egipto menu 'iabi israel unibu 'ikë mitsu chikiankën; chikínkin kana egipcio unibunën tëmëramikin ñu mëmiabi 'anan bëtsi unikamaribi ñu mëëxuniabi chikiankën.” 19 'Aínbi kamina mikaman bërí Diosma 'ikë 'akësa okinra kuëënkima rakan, an kamabi ñu 'aisama 'anan tëmërakin ñu mëi atsánkë 'ikë chikían 'ixunbi. 'Imainun kamina ami manúkin a rakani axa mitsun 'apu 'iti achúshi uni anëxunun kikan. Usa 'ain kamina bërí Nukën 'Ibu rabi anu ukanti 'ain, 'aínbi kamina, atun bananbi banakë akama abiribi ñaká, umainun ka ñakátibi aín aintsibë aintsibë uti 'ikën.

20 Usakin katankëxun ka Samuelnën kamabi uni ñaká achúshi achúshi a 'urama rikuatsinun kakëxa. Usakin kakëxa rikuatsini timëkë 'ain ka ñura rabë́ kuënëoxun anun tankëxi ka Benjamínën rëbúnkinën ñakámi oi nipakëakëxa. 21 Usakin a maxá bikëbi ka amiribishi Samuelnën a 'urama unun Benjamínën, rëbúnkikama kakëxa, kakëx uaxa timë́kë 'ain ñu rabë́ra 'unánti okin kuënëoxun anun tankëxa, tankëxa atumi ki nipakëtia ka Matrínën, rëbúnkikaman biakëxa, anuax ka Saúl, Quisnën bëchikë ami kiribi nipakëakëxa. Nipakëkë barikinbi ka a mërakanma 'ikën, 22 mëraima ka atux amiribishi Nukën 'Ibubë banatëkëánkëxa, anu kara Saúl 'ikë 'unánkatsi kiax. Ñukákëxunbi ka Nukën 'Ibun kakëxa Saúl ka ënu 'iaxa, 'aínbi ka anu chupa 'arukë ñu bukunkëmi unëaxa kixun ka kakëxa. 23 Usakin kakëx ka raíri unix abákiani anua unë́kë anua Saúl bitsi kuanëakëxa. Kuaxun bitsínkin bëkëxa atu nëbëtsi nirakëtia iskëxbi ka Israel kaman a tupuma 'ixun atu rapëskakë 'ikë iskankëxa. 24 Usa 'ikëa iskaniabi ka Samuelnën atu ñukákin kamabi kakëxa:

—¿Nukën 'Ibun mitsun 'apu 'inun kaískë uni a kaina iskanin? ¡Ënë unisaribi israel uni achúshi ka 'aíma 'ikën! ¡Axëshi ka nun 'apu 'iti 'ikën! Kixun ka israel unibunën kakëxa.

25 Usakin kakëxun ka Samuelnën anuxun ax kikësaibi 'iti Nukën 'Ibun banakama a unikama ñuixuankëxa, 'imainun ka usakin ñuixuntankëxun achúshi kirikanu kuënëoxun anuxun Israel kaman Dios rabikë a mëu mëníokin nankëxa. Usakin 'axuan Samuelnën anuaxa ukë anu kuantanun kakëx ka Israel kama anua 'ikë 'ain xubunubi rikiankëxa. 26 Atux kuantamainun ka Saúlnëxribi aín xubunu kuani, Guibeá ëmanu kuankëxa, kuankëbëtan ka Diosan Israel uni aín sinan kushibu raíri abë kuankian uantanun kixun sinánmiakëxa. 27 'Aínbi ka Israel uni aín patsan axa ñu upí kuëënkëma ax ami 'atimati banai ësai kikankëxa:

—“¿Ënëx kara an nu ië́miti a 'ik? Ësai kanankin a timai ka ax ka nun 'apu 'ikë kisama tankankëxa; usai kikaniabi ka Saúlnën atu kuakëmasa okëxa.