2 SAMUEL
Davidtan Saúl ñukë ñuikania kua bana
1
Usa 'ain ka Saúl ñukë 'ain David aín unikamabëtan amalecita suntárukama abámikin 'abiani Siclag kakë ëmanu kuantëkëankëxa, kuanx ka anu rabë́ nëtën bërúakëxa.2 Anu 'ixunbi ka Davidnën Saúl ka ain bakë bëchikë rabëbë bamaxa kixun 'unánma 'ikën, usa 'ain ka rabë́ 'imainun achúshi nëtë 'ikëbë anua Saúl 'ikë anuax uni achúshi aín chupa tukibukë 'ixun ain maxkánu chimaputan matakakiax 'itsaira masá nuituti kuatsini uakëxa. 'Ai ka anu bëbai David bëtánain aín bëmánanën me tikai tëtúbuti tsóbuakëxa. 3 Usai 'ia iskin ka Davidtan ñukákëxa:
—¿Uinuax kaina mix ain? 'Ëx kana anua israel unikama 'ikë anuax abati uan:
—Kixun ka a unin kakëxa.
4 —¿Uisai kara anuax 'ikanx? ¡Kamina 'ë kati 'ain!
—Kixun ka Davidtan karaishiakëxa.
—Kakëxun ka suntárukama ka 'akananibi abákanxa kixun kanan ka 'itsaira suntáru ka bamaxa —kixun a unin kakëxa—. ¡'Imainun ka Saúl aín bakë bëchikë Jonatán abë bamaxa kixun kakëxa! 5 Kakëxun ka ñukákëxa.
—¿Uisaxun kaina Saúl 'imainun aín bëchikë Jonatán ka bamaxa kixun 'unán? —kixun ka Davidtan an bana chanioi kuankë uni a ñukákëxa. 6 Ñukákëxun ka a unin kakëxa:
—Anu kuanti sinanmaxi ain bashi Guilboa kakë anu kuan kuankinbi kana Saúl aín manë xëtokëmi kërëxax nikë isan, iskëbëbi ka filisteo suntárukamax anúan 'akanankë caballonëan nirinkë 'imainun axa caballonuax 'akanankë suntárukaman 'urama obëtsinkin a nukui aia kana isan kixun këmëkin kakëxa. 7 Iskëbëtan anribi kaxú bësukinbi aia iskin ka 'ë kuëanxa. Kuënkëx kana a 'urama obiani kuan. 8 Kuania ka ui uni kara isana 'ëx 'ai kixun 'ë ñukáxa, ñukákëxun kana 'ëx kana amalecita uni 'ai kixun kan. 9 Kakëxun ka 'urama onun kixun 'ë kaxa, kakëx 'uramaira obiani kuania ka 'ë kaxa, kana tëmëratisama tanin 'ë kamina bëríbi 'ati 'ain kixun, 'aínbi ka bamatisa 'aish 'itsaira tëmëraibi bamakëmapain 'iaxa. 10 Usakin kakëxun 'urama okin kana 'an, 'aínbi ka 'ën iskëx pakëtankëx amiribishi nirutëkëntisamaira 'iaxa. Usa 'ikë 'axun kana aín maxkánua mañukë ain mañuti bianan kana aín mëñusuti aribi mi bëxúnti bian 'ën 'Ibu.
11 Usokin kakëxun kuati ka David 'imainun abë 'ikë unikama atun chupa anun paëkin tukai, 12 'itsaira 'atimokin sinani ini Saúl 'imainun ain bakë bëchikë Jonatán bamakë kuati 'ianan 'akanankian israel suntárukama Diosan 'akinkë 'ikëbi, bëtsi unikama abámikin 'akë a sinánkin bari kuantamainun añu ñubi pima samákankëxa.
13 Usai 'ikin ka axa bana chanioi ukë bëná uni a Davidtan ñukákëxa:
—¿Mix kaina uinu 'ikë uni 'ain?
—Kakëxun ka —'ëx kana bëtsi menu tsókë amalecita uni 'ai —kixun bëná uni an kakëxa. 14 ¿Kakëxun ka uisa kupí kaina 'atimokin 'akin Diosan ain unikaman 'apu 'inun kaískë uni a 'an? —kakin ka munuma banakin Davidtan, 15 ain suntárunën kushi achúshi kuënkin kakëxa:
—¡Ënë uni kamina bëríbi 'ati 'ain! Kakëxun ka amalecita uni a bamatanun 'akëxa, 16 'akëbë ka David kiakëxa:
—Mix bamakë ënëx ka mixi kamina min 'ucha chikínati 'ënbi kana Diosan kaískë 'apu 'a kiax kikë a kupími bamakë 'ikë kiakëxa.
David bëunan mëskuti Saúl 'imainun ain bakë bëchikë Jonatán bënini ian ñuikë bana
17 Ësai ki ka David Saúl 'imainun 'ain bëchikë Jonatán bamakë kuatankëx rabiti kantai kiakëxa, 18 ësai rarumati kiti bana ënë ka kamabi Judá menu tsókë unikaman 'unánti 'ikë, kiax ka kiakëxa. Usa 'ain ka bëunan mëskuti ini kia bana ënë anua Israel unikama 'usai 'ikë ñuikin kuënëokë kirikanuribi kuënëokëxa:
19 “¡Israelkama ka 'itsaira masá nuitutia,
ax ami nishkë unikaman ka atún 'apu aín bashinuxun axa!
¡Nun suntárukama axa 'akánanti 'unanbu aka ami nishkë unikaman 'axa!
20 Usa 'ain ka Gatnu tsókë unikama kuatima 'ikën,
'imainun ka Ascalón ëmanu bëbakin a bana ñuitima 'iaxa,
filistea xanukamax ka a banakama kuati kuëëanan,
manámiki chirini kuëënti 'ikën, atux ka bëtsi ñu rabikë xanubu 'ikë usa 'aish.
21 ¡'Imainun ka anu mitsux 'ikankë
Guilboa kakë aín bashi ax 'uí 'imainun nibítan 'ibúkin chabokëma 'iti 'ikën,
anuax ka 'aisamaira Israel unikama bamaxa!
Anuxun ka axa rakuë́timaishi 'akánanti 'unánkë unikama 'axun
'ain manë parókë ami nishkë unikaman aín 'ibu 'atankëxun amákanxa.
Anuax ka Saúlnën manë parókë aín
'ibu bamakë 'ain, aín ichukë ax taën amákin chuokankëx aín ichukë ax nëtë́axa.
22 Uinsaranbi ka Saúl 'imainun Jonatánnën ami nishkë
unikama 'atankëxun aín imin aín pia xëpukan kakëma 'aish aín xubunu uama 'ikën,
'imainun ka 'ain manë xëtokë ain pia axa 'akánanti 'unánkëira
unikaman imin 'anan aín xënin xëshibëtsini aíma 'iama 'ikën, kiax ka David kiakëxa.
23 Saúl 'imainun Jonatán ax ka kamabi israel unikaman axa upí uni 'ikë nuibakë 'iakëxa,
'ianan ka tsókëpan 'aish 'iásabi ñuaxi atubë ënanankëma 'ikën.
¡Ax ka tëtëkamë 'ëo nuankësamaira 'ianan!
¡Paru 'inuán kushisamaira 'iakëxa!
24 ¡Israelnu 'ikë xanukama Saúl sinani ka inkan,
an ka lino 'akë chupa minanën mëskukin pukukë mitsu pañumiakëxa,
pañumianan ka chupa kurin chëxëokin upíira okin 'akë mitsu 'inánkëxa!
25 ¡Uisai 'akanani kara axa rakuë́timaishi 'akánanti 'unáinra unikama
anuaxa 'akanankënuax bamakanxa!
¡Jonatán ka numi nishkë unikaman 'akëx ain bashi chairukënuax bamaxa!
26 'Aisamaira kana mi sinani masá nuituti bëunan mëskutin.
¡Jonatán 'ën xukë́n 'akësamaira okin kana mi nuiban!
¡Min kamina 'itsaira 'ë 'upíira okin nuiban!
'Ëx kana 'ën xanu 'akësamaira oi mibë nuibanankën.
27 ¡Uisai 'iax kara axa rakuë́timaishi 'akánanti 'unáinra unikama 'ain 'akanankënuax bamati 'ik!
¡Atúxa anun 'akanankë aín manë xëtokëkama ka 'atima okë 'iaxa!”