Saúl 'imainun aín bakë bëchikëkama 'akanani kuanx bamá ñuikë bana
(1 Cr 10.1-12)
31
Filisteo suntárukaman ka Israel unikama 'akëxa, 'akëxun oí ka israel suntárukamax atubë 'akananibi abákankëxa, usakia filisteo unikaman 'akëx ka aín bashi Guilboa anu uni bamakë 'aisamaira 'iakëxa. 2 Usa 'ain ka filisteo suntárukamax Saúl 'imainun aín bëchikë Jonatán, Abinadab 'imainun Malquisúa akamaribi nuibianxun 'akëxa. 3 Usokin nuibianx ka raíri 'akinma Saúl 'anux ami 'ikuainkankëxa; usai 'ixun ka ax pian 'akánanti 'unánkë filisteo unikaman Saúl atun pia pukin 'akëxa, usakin ax ka 'itsaira atumi rakuëkankëxa. 4 Usokia 'akankëxun ka Saúlnën an manë pará tuixunkë uni a kakëxa: —Min manë xëtokë bikin kamina anun bëríbi 'ë 'ati 'ain, 'ëx kana filisteo unikama an Dios rabikëma kamaxa 'ë 'atankëx 'ëmi kuaiti kuëëniman. Usokian kakëxunbi ka an aín manë pará tuinxukë uni an usokin 'aisama tani 'itsaira rakuë́akëxa. Usai 'ikëbëtan ka Saúlnën aín manë xëtokë bitsi anun abi tarókati bamakëxa. 5 Usai abi 'ia Saúl bamaia isi ka, an aín manë pará tuinxunkë uni axribi aín manë xëtokë bitsi anun abi tarókati bamakëxa. 6 Usai ka a nëtënbi Saúl 'imainun aín bakë bëchikë rabë́ 'imainun achúshi akama 'ianan an aín manë pará tuinxukë uni 'imainun kamabi abëa abákë suntárukama atúxribi bamakëxa. 7 Usai 'ikë ka israel unibu axa aín bashi 'ukëmanan tsókë 'imainun Jordán kakë baka au tsókë unikaman kuakëxa, kuanan ka Israel suntárukamax ka abáxa 'imainun ka Saúl nën bakë bëchikëkamaxribi ñuaxa kixun ñuikania kuakëxa, kuabiani ka atux anu 'ikë ëma ëbiani anuax abákankëxa. Usai abákian atun ëma ñankáishi 'itánun ëbiankë ka filisteo suntárukaman anu bëbarukin atun ëmakama 'ibúakëxa.8 Usai 'ikë a pëkaran ka filisteo suntárukamax uni bamakë atun ñu bikatsi kiax rikianxun Saúl 'imainun aín bëchikë achúshi 'imainun rabë́ axribia bamax bashi Guilboa kakë anu rakákë mërakëxa. 9 Mëraxun ka suntáru achúshinën Saúl aín maxká tëbískakin bimainun raírinën anuan 'akanankë akamabi biakëxa, usokin 'atankëxun ka kamabi filisteo mekamanu 'ikë unikama 'imainun anuxua atun dios rabikë xubunu 'ikë unikamabia chanionun kixun uni xuakëxa. 10 Usokin 'anan ka raíri filisteo suntárukaman anúan 'akanankë aín manë xëtokë 'imainun aín manë pará okían 'akë aribi, anuxun atun dios Astarté rabikë xubu anu nankëxa, nanan ka Saúl ain bakë bëchikëkama ñukë akëñunbi anun Bet-sán kakë ëma bëararakin kënëkë anu bëntankankëxa.
11 Usokia filisteo unikaman Saúl ñukë 'akë ka Galaab menua 'ikë ëma Jabés anu bukukë unikaman kuakëxa, 12 kuabiani ka uni kushi sinánñubu atux ishi kanankiani imë́ kuanëkin Bet-sán kakë ëma anun bëararakë anua Saúl këñunbia aín bakë bëchikëkama ñukë bëntankankë a nanpabëtsinkin bëxun Jabés kakë ëma anuxun xarokankëxa. 13 Usokin 'axun ka aín xokama ashi Jabés kakë ëma anua nikë i pëchiñu tëmú, anu maínkankëxa. Usokin 'atankëx ka mapai achúshi 'imainun rabë́ nëtë 'imikin ñu pima samákankëxa.