—Minbi kamina 'unanin, mi 'imainun min suntárukamax ka 'akanani 'ëbë kuanti 'ikën. 2 Kakëxun ka Davidtan kakëxa:

—Asábi ka. Usa 'ain ka, 'apu an ñu 'axúnti uni ënëx ka 'akanainsa 'ikë kixun 'unánti 'ikën. Usai kia ka Aquís an David kakëxa:

—'Ën suntárukaman kushi mi chikitima 'inun kana mi anëti 'ain kixun ka kakëxa.

3 Usa 'ain ka Samuel ñukë 'ain kamabi Israel menua 'ikë unikama anun rabanan masá nuituti 'ikankëxa, usai anun rabanan 'itankëxun ka anuaxa bakëan aín me Ramá kakë anubi maínkankëxa. 'Imainun ka Saúlnën an ñu tankë unikama 'imainun an ñukë uni ain ñunshin abë banati kuëënkë a kamabi a menua chikínkë 'iakëxa. 4 Usa 'ain ka filisteo unikama timëkiani kuanx Sunem kakë anu atun 'iti 'ax anu 'ikankëxa, 'imainun ka Saúlnëxribi aín suntárukama timëbiani kuanx Guilboa kakë anu atúxribi timë́akëxa. 5 Anuxun ka Saúlnën filisteo unikamaxribi anu atux 'iti 'ax bukukë isakëxa, isí ka 'itsaira rakuë́ti atun ka kupitanuma nu 'ati 'ikë kiax bërëi 'iakëxa. 6 Usai 'ikin ka uisai kara Nukën 'Ibubë banati 'ikë kixun tankëxa, 'aínbi ka Nukën 'Ibun an ñukákëxunbi kuatima 'ianan namámikinbi ismiama 'ikën, 'ianan ka Urim kakë anbi kaima 'imainun an Dios kikë bana uni ñuixunkë akamanbi ñuixuama 'ikën, usai kamina 'iti 'ai kixun kanun 'amiama 'ikën.

7 Usokëxun ka ain suntárunën kushikama kakëxa:

—Axa ñukë uni aín ñunshinbë banakë xanu achúshi kamina 'ë barixunkanti 'ain, 'ëx abë banai anu kuanun. Kakëxun ka ain suntárunën kushikaman kakëxa:

—Endor kakë ëmanu ka axa ñukë unikaman ñunshin kuëntankëxa abë banakë xanu 'ikën kixun ka kakëxa. 8 Kakëxun ka Saúlnën an pañukë chupa a pëanan bëtsi chupa pañuakëxa ax ka Saúl 'ikë kixun 'unántima rabanan.

'Ikiani ka aín suntárunën kushi rabë́ buani imë́ xanu a iskatsi kiax kuankëxa. Kuankin ka aín xubunu bëbakin kakëxa:

—'Ën kana mi ësokin kain añu karana 'ati 'ain 'ë tanxunkin kamina, uni ñukënën ñunshin añu karana 'ati 'ai kixuan 'ë kanun kuëënti 'ain. 9 Kixun kakëxun ka xanun kakëxa:

—Min kamina upíokin 'unan, Saúlnën ka ënë menua an ñu tankë unikama 'imainun axa uni ñukë aín ñunshin kuëanx abë banakë unikama chikíanxa. ¿Uisati kaina a bana kuaxuan 'apun aín suntárukama 'aminunbi usakin 'ë kain? 10 'Aínbi ka Saúlnën Nukën 'Ibu kakëxa:

—Asérabi kana Nukën 'Ibun kuamainunbi mi kain uisa ñu 'aisamabi kamina inútima 'ain.

11 —¿Ui uni mi bëxúnti kaina kuëënin? —kixun ka a xanun kakëxa.

—Kakëxun ka 'ë kamina Samuel kuënxunti 'ai —kixun ka Saúlnën kakëxa. 12 Kakëxun Samuel isi ka xanux achúshiti munuma kuënkëankëxa; usai 'ikin ka Saúl kakëxa:

—¿Uisati kaina 'ë paránkin ësokin 'ain? ¡Mix kamina Saúl 'ain! 13 Kakëxun ka 'apu Saúlnën kakëxa:

Rakuë́axma kamina 'iti 'ain. ¿Añu ñuira kaina isan?

—Achúshi dios kana menuaxa manámiki kuaruia isin ka xanun kakëxa.

14 —¿Añu ñu iskësa kara min iskëx 'iax? —kixun ka Saúlnën kakëxa.

Kakëxun ka —Achúshi uni kaniakëkë 'aish, chupan rakukë 'iaxa —xanun kakëxa. Kakëxun ka Saúlnën ax ka Samuel 'ikë kixun bënë́kinshi 'unánkëxa, 'unani ka ñanati aín bëmánan memi bëtiki 'iakëxa.

15 Usaia 'ia ka Samuelnën bëru ñunshinan kakëxa:

—¿Uisoti kaina unun kixun 'ë ubíokin umian? Kakëxun ka Saúlnën kakëxa:

—'Ëx kana 'aisamaira sinani masá nuitutin, filisteo suntárukaman ka 'ë 'anux timë́kamë 'ëoxa Diosanbi ka 'ë 'akinti ëanxa. Usa 'ixun ka ñukákëxunbi 'ë 'akinima 'imainun ka namámikinbi bërí 'ë kaima. 'Imainun ka an Dios kikë bana ñuikë unikamanbi 'ë kanun kixun kaima, usa 'ain kana mi kuëan añu karana 'ati 'ai kixun mi ñukánuxun. 16 Kakëxun ka Samuelnën bëru ñunshinan kakëxa:

—¿Uisati kaina 'ën Nukën 'Ibun ka mi 'akintima 'ikë kixun kakë 'ixunbi mimisa bërí nishia kixun kain? 17 Nukën 'Ibun usakia mi 'ati kanun kakëxun 'ën kakësabiokin ka mi 'axa. An ka 'apu 'ikë a mi bikuankin min 'unánkë uni David a 'apu 'inun kaisaxa, 18 min kamina Nukën 'Ibun kakësokinbi 'axunkin aín bana kuakëma 'ain, 'ianan kamina mia amalecitakama këñunkin 'anun kakëxunbi 'akëma 'ain. Usa 'ain ka bërí Nukën 'Ibun ësokin mi axa. 19 Usa 'ain ka Nukën 'Ibun Israel suntárukama këñun mi ribi filisteo suntárukaman abámikin 'anun 'amiti 'ikën, 'imainun ka imë́ishi mi 'imainun min bakë bëchikëkama 'akanani ñutankëx 'ëbë 'iti 'ikën. 'Ianan ka Nukën 'Ibun filisteo suntárukama anua 'ikë aín 'itinua Israel suntárukama ñatanun 'amiti 'ikën. 20 Kakëxun kuatishi ka Saúl menu nipakëakëxa, ax ka uni chaxkë́ira 'iakëxa. Samuelnën bana kuati ratuti ka ain ñunshin nëtë́tishi pakëakëxa. Usai 'ixun ka a nëtën ñu pima 'ianan imë́ribi añu ñubi pëkaramikin piama 'ikën. 21 Usai 'aisamairai ratutia iskin ka xanun Saúl a 'uramokin kakëxa:

—An mi ñu 'axunkë xanu ënën ka min kakësabiokin 'axuanxa. Ësokin 'ai kana bamati 'ai kixun 'unánkinbi ka ënë xanun min bana tankin usakin 'axa. 22 Usa 'ain kamina bërí 'ën kakëxun kuati kuëënun mi kain, 'ën kana piti chukúmashi mi 'inanin, usa 'ain kamina mi kuanun narakakin piti 'ain.

23 Kaxúan 'inánkëxunbi ka Saúlnën piisama tankëxa, 'aínbi ka aín suntárunën kushikama 'imainun xanu anbi ubíokin urainra kakëxun kana piti 'ai kixun kakëxa. Usakin kaíshi menuax nirui ka anua 'uxkënuax tsórakëakëxa. 24 Anua tsómainun ka xanu an achúshi vaca bërí kanikë xuá aín xubu rapasu 'ikë a rëakëxa, 'anan ka harina putuakë anun chamiti ñukëñunma chë́kakin mamua okin 'axun xuixuankëxa. 25 Usokin 'abiankin namikëñun uanxun ka Saúl 'imainun aín suntárunën kushikama pinun 'inánkëxa, 'inánkëxun a pibiani ka a ñantánbi kana kuanin kixun kabiani kuankëxa.