—¿Judá menu 'ikë ëma achúshinu karana 'ëx kuantima 'ain? Kakëxun ka Diosan kakëxa:

—Kamina kuanti 'ai kixun kakëxa. Kixuan kakëxun ka Davidtan ñukákëxa:

—¿Uinu karana kuanti 'ain? Kixun ñukákëxun ka Diosan kakëxa:

—Hebrón kakë menu kamina kuanti 'ain. 2 Kixuan Diosan kakëx ka David 'ain xanu rabë́ buani kuankëxa: Kuankin ka Ahinóam ax ka Jezreel kakë ëmanu 'imainun ka Abigail Nabal kakë uni an raënkëa bikë ax Carmel kakë ëma anu tsókë 'iakëxa. 3 Usa 'ain ka kuankin abë tsókë unikama aín aintsikëñunbi buani kuanx Hebrón kakë ëma chukúma anu 'iakëxa.

4 Anuxun ka Judánu 'ikë unikaman timë́xun David atun 'apuisa 'inun kixun anu bëbakë anëakëxa.

Anuxun ka uni raíritan David ñuixuankëxa Jabés kakë ëmanu tsókë Galaad menu 'ikë unikama insa Saúl ñukë mainkanxa kixun, 5 kakëxun ka Davidtan anu 'ikë unikama kamikin ësokia katánun uni xukin kamiakëxa: “Diosan ka mitsu 'upiokin nuibakin 'akinti 'ikën, mitsun kamina Saúl ñukë 'ikë upíokin mainkakën. 6 Usa 'ain ka Diosan mitsu nuibakin 'akinti 'ikën: 'Akimainun kana 'ënribi mitsumi usakin 'akë a kupí nuibati 'ain. 7 Usa 'ain kamina kushi okin sinani nirukanti 'ain, mitsun 'ibu Saúl ñukë 'ain ka Judá menu tsókë unikaman atun 'apu 'inun 'ë anëaxa usa 'ain.”