Israel menu 'ianan Judá menuribi David 'apu 'ia ñuikë bana
(1 Cr 11.1-3)
5
Usakin 'akë basikëbë ka kamabi Israel unibu aín ñakánu ñakánu 'ikë akaman Hebrón ëmanu, kuanxun abë banakin David kakëxa: “Nukamax kananuna min aintsi 'ibu 'ain. 2 Bërámabi ka Saúlnën ax 'apu 'ixun minmi asérabi Israel kama 'akanani kuania buánun 'amiakëxa. Usa 'ikë ka Nukën Ibun mi Israel kaman 'apu 'ixunmi upiokin 'akinun 'imiaxa.”3 Ësakian an 'aia, 'unánxun ka kamabi Israel unibunën Hebrónnua 'ain anu rikianxun ësakin David kakëxa, kakëxun ka uisakin kara ax 'apu 'ixun 'ati 'ikë a ñuixunkin Diosanbi unánun kakëxa. Usakin kakëxun ka atúnbi Israel unibunën 'apu 'inun anëakëxa. 4 Treinta baritiañu 'ixun 'apu 'ikin pëua 'aish, ka David cuarenta baritia 'imi 'apu 'iakëxa: 5 Hebrón menuax ka Judá unibunën 'apu mapai 'imainun rabë́ bari inúmi 'itankëx mapai achúshi 'imainun achúshi 'uxë 'imi 'apu, Jerusalénnuribi kamabi Israel unibunën 'apu 'ianan, Judá menu 'ikë unikaman 'apuribi treinta y tres baritia 'apu 'iakëxa.
Davidtan aín suntárukamabëtan Sión kakë ëma bia ñuikë bana
(1 Cr 11.4-9)
6 Aín unikama buani ka David 'apu 'aish anuxun jebuseo, unikama anu tsókë akama 'anux Jerusalén menu kuankëxa. Kuankë 'ikë ka jebuseo unikaman atun ëma buinarakin kënëarakë 'ain, anun atsintisama sinani ami kuaikin David kakankëxa: “Mix anu atsintisama ka nun me ënëx 'ikën, nun suntárukama bëxuñu 'ianan aín xo 'atima 'aish masari nikë 'aínbi kamina mitsux ënu atsintsianma.” 7 Usakin kakëxunbi ka aín suntárukamabëtan Davidtan Jerusalén ëmanu 'ikë suntárukama ñatankin biakëxa, usakin 'axun ka Davidtan ëma kakin anëakëxa, anëa 'ikë ka usakin anëkankëxa. 8 Usa 'ain ka Davidnën usakin kamina anuxun 'ati 'ai kixun aín unikama kakë 'iakëxa: “jebuseo unikama 'akin kamina anúan 'umpax kuanti 'akë kini anun, atsínkin kamina kamabi uni bëxuñu 'imainun, aín xo 'atima masari nikë uni, akamami kana 'ëx nishin usa 'ain a këñukin 'ati 'ain.” Usa 'ain ka a ñui a 'unánti bana ësai kia: “Uni aín niti upíma 'imainun, aín xo bamakë masari nikë a unikamax ka anuxun Dios rabiti xubunu atsintima 'ikën, kiax ka unikamax kiakëxa.” 9 Usakin aín suntárukama ñatankin bianan unikama 'atankëx ka David, a ëmanu tsóti kuankëxa, usa 'ikë ka Davidnën ëma kakin anëakëxa, 'imainun ka anu 'ikin buinarakin aín ëman 'ikë kinikama abi maxábëtan, me tëin bëtaskin anu 'apu 'ikë xubu anubi sënëónkin kënëmiakëxa.
Hiram kakë 'apun aín menuxun an ñu 'unánkë unikama Davidnu xuá ñuikë bana
(1 Cr 14.1-2)
10 Usakin Dios kamabi kushiñu an 'akinkëxun Davidtan 'akëx ka kamabi ñu upí 'iakëxa, usakin 'aia ka Diosanbi 'akiankëxa. 11 Usakian 'akëbëtan ka Tiro ëmanu 'ikë 'apu Hiram kakë an, anu kuankian bëtsi menu 'ikë 'apu añu kara 'aia kixun iskë aín unikama Davidnu kuantanun xuakëxa, xukin ka carpinterokama 'imainun an maxá ramëniokin mëníokë a 'ianan, kunxan tëapakë akama tapan 'abiankin parúmpapan buánxun anu 'apu David 'iti xubu 'axuntanun kixun xuakëxa. 12 Usakin kamabi ñu 'akin ka Davidtan Diosanbi ka Israel unibunën 'apu 'inun 'ë 'imiaxa kixun 'unánkëxa, 'imainun ka anbi 'apu 'ixun ëma upí 'itanun mëníonan, Israel unikama upíokin 'akinun 'amiakëxa.
Davidtan bakë bëchikëkama ñuikë bana
(1 Cr 3.5-9; 14.3-7)
13 Hebrón kakë menuax kuanx Jerusalén ëmanu tsókin Davidnën, anuxun aín xubu anua 'ikë xanukama bianan, an ñu 'axunkë xanukama aribi bixun atumiribi bëbu 'imainun xanu okinribi bëchipakëxa. 14 Aín bëchikëkama Jerusalén ëmanu tsókia bakë bëchipacëkama atun anë ka 'iakëxa: Samúa, Sobab, Natán, Salomón, 15 Ibhar, Elisúa, Néfeg, Jafía, 16 Elisamá, Eliadá 'imainun Elifélet akamax ka aín bakë bëchikëkama 'iakëxa.
Abë 'akanankin Davidtan filisteo suntárukama kupitanunma 'a bana
(1 Cr 14.8-17)
17 Israel unikaman ka atun 'apu 'iti David anëaxa kixun ka filisteo suntárunën kushikaman kuakëxa, kuabiani ka a 'akatsikiax a bari kuankankëxa, 'aínbi ka David anua 'ikë anuax kuantankëx aín suntárukamabë unëkë 'iakëxa. 18 Usa 'ain ka filisteo suntárukama anu kuanx, aín bashi Refaim kakë me sapan kiankë anu 'iakëxa. 19 Usai atux 'imainun ka, Davidtan ënë ñuikin abë banakin Dios kakëxa:
—¿Filisteo unibunën suntárukama karana 'akanankinti 'ain? ¿'Ë kaina atu 'aia 'akinkin kushioti 'ain? Kakëxun ka Diosan kakëxa:
—Asabi ka, kamina atu 'ati 'ain, 'aia kana mi 'anun mitsu 'akinti 'ain.
20 Usakian ñukákëxuan kakëx ka aín suntárukama uani kuanx David Baal-Perasim kakë me anu bëbakëxa. Anu bëbaxun ka anuxun filisteo suntárukama kupitanuma 'akëxa. Usa 'ain ka David anuxun 'akë a ñui ësai kiakëxa: “Diosan ka baka kushiira xobuti bëchunkë usaribi 'ixun 'ëmi nishkë unikama 'anun 'ë uanxa.” Anuxun usakin 'axun ka Baal-Perasim kakin anëakëxa. (Ënë banax ka Diosan ka anun kuanti bai nu 'axuanxa ki kikë 'ikën.) 21 Usakian 'akëx abákin rakabiania ka filisteo unikaman rabikë ñukama David 'imainun aín suntárukaman biakëxa.
22 Usai 'ian basikëbë ka filisteo suntárukaman amiribishi Rafaim kakë me sapankiankë anu ritëkënkuatsiankëxa, 23 ritëkënkuatsinkë 'ain ka abë banakin David ësokin Diosan kakëxa:
—'Akin kamina 'ashi buinxun atu 'atima 'ain, anua bukukankë a kaxú kuainakëkin bëararatankëx kamina anua bálsamo kakë i nikë anu bëbakin 'ati 'ain. 24 Anu bëbakin kamina anun nikiani kuankëbëa bálsamo i pëi chushirukë banaia kuati 'ain; ax ka rëkuë́nkiani kuankësa 'iti 'ikën, usai 'ikëbë kuankin kamina min suntárukamabëtan, filisteo suntárukama 'ati 'ain.
25 Usakin kakëxun ka Davidnën uisakin 'anun kara Diosan kaxa usakinbi 'akëxa, 'akin ka filisteo unikama Gabaón kakë ëmanuxunbi 'abianxun Guézer kakë ëmanu bëbakin 'akëxa.