Uisoxun kara bunántisa okin 'akë anua Diosan bana kuënëokë nankë a takuti 'ikë kixun Davidtan sinan ñuikë bana
(1 Cr 13.5-14)
6
Achúshi nëtën ka Davidnën amiribishi bëráma kaískë treinta mil suntárukama a timëtëkëankëxa. 2 Usokin 'abiani ka Baalá 'ikëbia Quirat-jearim kakinribi anëkë axa Judá menu 'ikë anuax aín treinta mil suntárukama buani, uisoxun karaisa bunántisa okin 'akë anua Diosan bana kuënëokë nankë a buánti 'ikë kixun tani kuankëxa, ax ka Israel kaman Dios kamabi kushiñuira 'ianan aín ángel pëchiñukama usamaira ainan 'iakëxa.3 Kuantankëx ka anua Abinadab kakë uni 'ikë bashi manan anua aín xubu 'ikë anu bëbakëxa. Anuxun ka raíri unikama bunántisa okin 'akë anua Diosan banakama kuënëoxun nankë a biakëxa, bitankëxun ka anun ñu nikintia 'akë ióira anu 'aruakëxa. 4 'Arukë ka Abinadab kakë uni aín bakë bëchikë rabë́ Uzá 'imainun Ahió an burron anu ñu 'aruxun nikinti anu 'arukëa nirinbiankëbë Ahió ax rëkuë́nkiankin buánkëbë Uzá ax tsiánkiankin buánkëxa. 5 Usokian buánkëbë ka, a kaxú David 'imainun abëa kuankë unikamax Dios rabi kuëëni aín kushibëbi ransakin atun sharíkati sharikamainun manë parókë 'amainun atun arpa 'anan mëkënan mëëkin banamikë akama kuëënkin 'akankëxa.
6 Usai 'ikiani kuani ka anuxua Nacónnën aín trigo tákati kakë 'ikë 'unánkë, anu nukutibi an bunántisa okin 'akë anu 'arukë a nirinbiankë burro ax ñumi tatíki nipakëisari 'iaka Uzánën mëshpakin nipakëti rabanan tuinkin biakëxa. 7 Usakia bunántisa okin 'akë, aín mëkënan Uzánën tuinkin bikë ka Diosan xuamati nishkin anuxunbi bamanun 'imikëx Uzá bunántisa okin 'akë a tanainbi nipakëti bamakëxa. 8 Usokian Diosan Uzá bamanun 'imia isi ka David 'itsaira masánuituti iankëxa, usakian anuxun 'imikëka a me Peres-uzá kakin anëakëxa, usokinbi ka bërí nëtë kamanbi anëkania. 9 Usakia 'an ka a nëtën David 'itsaira Diosmi rakuë́akëxa, rakuë́ti ka ësai kiakëxa: “¡'Ën kana asérabi bunántisa okin 'akë anua Diosan bana kuënëokë nankë ënë buánti sinaniman!” 10 Usai kitankëxun ka Davidnën amiribishi bunántisa okin 'akë anua Diosan banakama nankë a Jerusalénnu buántisama tankëbëtan ka, achúshi filisteo uni Obed-edom, axa Gat kakë ëmanu 'ikë aín xubunu nankëxa.
11 Usokian Davidnën anu namikëx ka bunántisa okin 'akë anua Diosan banakama kuënëokë nankë ax Obed-edom aín xubunu achúshi 'imainun rabë́ 'uxë 'iakëxa, usakin a unin xubunu nankë 'ain ka Diosan a uni 'itsaira 'akianan aín aintsikamaribi 'akiankëxa.
Davidnën bunántisa okin 'akë anua Diosan bana kuënëokëkama nankë a Jerusalénnu buan ñuikë bana
(1 Cr 15.1–16.6)
12 Usa 'ain ka unikaman 'apu David ñuixunkë 'iakëxa, bunántisa okin 'akë aín xubunu nankë 'ain ka Obed-edom aín aintsikama 'imainun aín ñukama këñunbi atun ñu upí 'inun Diosan 'akinia. Usokian kakëx ka David Obed-edom aín xubunu kuëënkiani kuanxun bunántisa okin 'akë a bibiankin Davidnën ëma kakë Jerusalénnu buánkëxa. 13 Usokin buani kuankia bunántisa okin 'akë anua Diosan bana kuënëokëkama nankë a buani kuania mapai achúshi 'imainun achúshiti nikiani men unikama kuankëbëtan ka Davidnën achúshi vaca bënë 'imainun achúshi carnero xuaira rëxun Dios rabikin xarokëxa. 14 Usa 'ain ka David chupa efod lino 'akë a pañuax kuani 'ain kushibëbi kuëëni ransakiankëxa, 15 usai David 'ikëbë ka abëa kuankë raíri Israel unikamax an bunántisa okin 'akë buánkëkama a rëkuë́nbiania kuankë akamaxribi kuëëni sharákiani kuankin, atun a banoti 'akë banobiankëxa.
16 Usakin bunántisa okin 'akë anua Diosan banakama kuënëokë nankë, a buani anua David 'ikë ëma anu bëbakania ka Saúlnën 'ini bëchikë Micalnën aín xubu xëkuë chukúma manámi 'ikë anun isakëxa; iskëxbi ka aín bënë David ax kuëëni chirinkin ransakia Dios rabikë ax ainan 'aisama 'iakëxa, usa 'ain ka ami 'atimakin sinánkëxa. 17 Usokin buánxun ka anu nantia aín unikama xubusa okin chupa 'amikë a mëu nanun 'amiakëxa. Usokin anu nantankëxun ka Davidnën ñuina rëtankëxun 'aímai këñutanun Dios xaroxuanan anun mëníonanti aribi xarokëxa, 18 usokin ñuina xarokin sënë́ontankëxun ka Davidnën kamabi Israel unikama ësokin kakëxa, kamabi mitsun 'akë ñukamax ka Nukën 'Ibu Dios kamabi kushiñuira an 'akinkëx upí 'iti 'ikën, 19 usai kia David sënë́nkëbëtan ka kamabi israel uni bëbu 'imainun xanukamanribi pán harina akë a 'imainun cha okían batokin 'akë akama këñun nami xuikë tëxëkë akama 'imainun uvas ëskakë akamabi mëtikanankëxa. Usakin 'atankëx ka kamáxbi atun xubunu rikiankëxa.
20 Usai kuankantámainun ka David aín xubunu aín xanu isi kuankëxa; kuankin aín xubunu nukúkin iskëxbi ka aín xanu Mical Saúlnën 'ini bëchikë, ax kuania isbëtsini ukin kakëxa:
—¡Bërí kamina mix Israelkaman 'apu 'aíshbi usai 'iax asábi bërúan, min kamina an 'ë ñu 'axunkë xanukaman ka isia kixun sinanimaishi uni nishkë 'ikësaira rabinima usai 'ian! 21 Kixuan kakëxunbi ka Davidnën kakëxa:
—Asérabi kana 'ëx unin ismainun ransan ax ka 'ëbi usai 'isatani 'ikëma 'ikën. 'Ëx kana Dios an 'ë kaisa a rabi usai 'ian, an ka min papa 'ianan min aintsikama 'akinma Israel kaman 'apu 'inun 'ë 'imiakëxa. Usa 'ain kana a rabi usai ransai 'ian. 22 Usa 'ain kana 'ëx bërí ñuma 'iti 'ain; min kuëënxumi usai 'inun 'ë kakëx, 'aínbi ka a ñuikimi 'ë kakë xanukaman uisa uni karana 'ëx 'ai kixun 'unánkin 'itsaira 'ë nuibati 'ikën. 23 Usa 'ain ka Mical ax Diosan usai 'iti 'imikëx, aín ñuti nëtë 'itámainun tuakëma xanu 'iakëxa.