—Uisa 'ixun karana 'ën anu 'apu 'iti xubu kunxan tukapaxun upíokin 'akënu 'ixun, Dios bunántisa okin 'axunkë axa chupaishi 'akë xubu 'ukëmëu nankë 'ikë isti 'ain, ax ka 'ën iskëx upíma 'ikën.

3 Kakëxun ka Natánën kakëxa:

—Uisakin 'akatsi kixun kaina sinani usakin kamina 'ati 'ain, 'aia ka Diosan mi 'akinti 'ikën. 4 'Aínbi ka a imë́bi ami mërakin Diosan Natán kakëxa: 5 “Anu kuanxun kamina 'ën uni David abë banakin ësokin kati 'ain, 'ëx Dios 'ixun kana ësakin kan: Mix kamina an, 'ë anuxun Dios rabiti xubu 'axúnti uni ama 'ain. 6 Anun 'ën Egipto menua Israel unibu chikía, a nëtëkamanbi 'iama 'aish kana bëríbi usabi 'aish, uínsarabi anuxun 'ë rabiti xubunu 'ikëma 'ain, usa 'ain kana xubusa okin chupaishi 'akë anu kuanx 'ën unibëshi banakën. 7 Kamabi nëtën anun atubë 'ëx 'ikë anun kana, uisaxunbi 'ën unibu Israelkama 'akinun 'apu anëxun, atun kushi achúshibi 'ë kamina anuxun Dios rabiti xubu achúshi kunxan tukapaxun 'axúnti 'ai kixun káma 'ain. 8 Usa 'ain kamina, 'ën uni David ësokin kati 'ain, 'ëx Dios kamabi kushiñu 'aish kana ësai kin: 'Ën kana anuxun bërúanti 'akë anuxua aín ñuina bëruaiabi a ëmikin chikían 'ën chikixun kana a unikaman 'apu 'inun 'imiakën; 9 'imixun kana uinu kara kuania anubi abë 'ixun bërúan. Bërúanan kana kamabi ami nishkë unikama këñukin 'anun 'amia, 'amianan kana usakin ñu chaiira 'aia iskian, ënë menu 'ikë an ñu upíokin 'akë 'apukama 'akësaribi okin, nuibanan an ñu 'aia isi kuëënun 'imian. 10 Usakin 'anan kana achúshi me anua 'ën unibu Israel 'iti bian, bixun kana atunabi 'ain anu 'inun 'inan, anu 'iaka uínbi ubioima 'imainun an bëtsi ñu 'atima 'akë unikamabi, bëráma 'akansa okin ubiotima 'ikën, 11 axa 'ën uni Israel unikaman 'apu 'inun uni 'imikin kana. 'Ën amia nishkë unikamabë 'akanantëkënima nuibananishi tsónun atu 'imiakën. 'Imainun kana aín rëbúnkikama kana uínbi ubiotima oia tsónun 'iminuxun 'ai kixun 'unámikin kakën, 12 usa 'ain kana anúnmi ñuti nëtë 'ikëbëtan min bakë bëchikë achúshi nëtë́timokin mëramikin axa 'apu 'inun 'imiti 'ain. 13 'Imikëxun ka an anuxun 'ë rabiti xubu achúshi 'ë 'axúnti 'ikën. 'Imainun kana 'ën 'apu 'imikin nëtë́timoia xënibua 'aínbi ax 'apu 'inun 'imiti 'ain. 14 'Ëx aín papasa 'imainun ka, ax 'ën bakë bëchikësa 'iti 'ikën, 'ën kana ñu 'atima 'aia i pëñan bixun anun rishkikin, tëmëramiti 'ain. Kamabi unían aín bakë bëchikë 'atima ñu 'aia 'akësaribi okin, 15 'aínbi kana 'ën nuibakin Saúl 'akinkin ëansa okin a 'atima 'ain, usakin 'axun kana Saúl chikíanan mixmi 'apu 'inun mi 'imiasa okin a 'atima 'ain. 16 Min rëbunki 'imainun mix 'apu 'ikë ax ka 'ën bëruankëx uisaibi 'ikëma 'iti 'ikën, 'imainun ka mix anu tsóti ax anubi 'itiokin nankë 'iti 'ikën.”

17 Usokin ka Natánnën kamabi ënë banakama David ñuixuankëxa, upíokin ka an namákian kuakësabi okin ñuiakëxa. 18 Usakian ñuixunkë anu atsíanx abë banati 'akë anu atsíanx abë banakin ka, Davidtan Dios kakëxa: 'Ën 'Ibu Dios kushiira, ¿ui karana 'ëx 'ain, 'ën aintsi 'ibukamaribi ka ñuma 'ikë unin isia, usa 'aínbi kaina uisaxun 'ë 'apu 'inun 'imian? 19 ¡'Imainun ka min ñuikë banaxa chamara 'aínbi min 'ati ñukama chaiira 'ikën, 'Ën 'Ibu Dios 'ëx kana min uni 'ain, min kamina 'ën aintsi 'ibukaman rëbúnki ñui usakin ismina 'apu 'iminuxun 'ai kiakën! ¡Uinu 'ikë achúshi unixi ka mix Dios 'ixun upíokin sinani kikësai banati 'aíma 'ikën! 20 ¿'Ën 'Ibu Dios min uni 'ixun karana uisa banaribi mi kati 'ain? 21 Kamabi a 'akatsi mi kia ñu a kamina asérabi, bëtsi ñukamasamaira 'itánun, upíokin min 'ain 'ën aintsikaman isti kuëënkin, 'ën 'unánun; 22 usa 'ain kana mishi rabikin kai 'Ën 'Ibu Dios, ¡min 'akë ñukama ka chaiira 'ikën! Usa 'ain ka bëtsi uni misaribi 'aíma 'ikën, 'imainun ka uinubi bëtsi ñukama a unin rabikë misaribi 'aíma 'ikën. 23 Min uni Israel unibu ñuikin kana mi kain, ¡bëtsi menu 'ikë ëmanu 'ikë unikama atusaribi ka 'aíma 'ikën, atux ka ënë menu 'ikë bëtsi unikabëtan sënë́nma 'ikën! 'Ën 'Ibu Dios min kamina min uni 'inun atu chikiankën. 'Imainun kamina 'aisamaira 'ixun bana sinankian upíokin ñu 'anun atu 'amian, min kamina min unikama Egipto menua chikínbëtsinkin atun ismainunbi bëtsi menu 'ikë unikama 'imainun atun rabikë dioskama këñunbi këñuakën, 24 Min kamina Israel unibunëxa xënibua 'aínbi min uni 'iti kuëënxun usakin 'akën, 'anan kamina mix Dios 'ixun usakin 'akë 'aish nun Diosribi 'iti 'ain.

25 “Usa 'ain kamina mix Dios 'ianan dioskaman Dios ira 'ixun min uni 'ikëmi 'ë kakë banakama, manukinma sinánkin 'ën rëbúnkinën babakama, mixmi kiásabiokin 'akinti 'ain. 26 ¡'Ën kana usakinmi kakëxa atux mi sinani mimi katamëti ënima xënibua 'aínbi mi rabianan min anë ñui kamabi menu 'ikë unikaman kuatanun, min kamina upíokin ñu 'ai kixun ñuiti kuëënin, 'imainun kana min uni David 'ën rëbúkinkama upíokin sinánkë unibu 'ikëmi, min upíokin 'akinti kuëënin! 27 Dios min kamina mix kamabi kushiñu 'ixun uisakin kaina 'ën rëbúnkinën babakama xënibua 'ain, 'ati 'ai kixun 'unámikin 'ë kan; usa 'ain kana 'ën min uni 'ixunbi sinánkimaishi mi kain. 28 Mix kamina Dios 'ianan dioskaman Dios ira 'ain, mix kamina asérabi këmëima banain. 'Imainun kamina min uni 'ikë 'itsaira nuibakin mimi katamëtia 'ë ënkëma 'ain, 29 usa 'ain kamina, kuëënkin upíokin sinánxunkin, 'ëx min uni 'ain xënibua 'aínbi 'ën rëbúnkikama bërúanti 'ain. Nun 'Ibu Dios min kamina kan, min upíokin sinánxunkëx ka 'ën rëbúnkikama atux xënibua 'aínbi upitax tsóti 'ikën.”