2 Kia ka bëtsi unin kakëxa, anu ka an mi ñu mëëxunti uni achúshi Saúlnën aintsi Sibá kakë 'ikën, kakëxun ka anu 'ikënua unun Davidnën kamiakëxa. Kamikëxa aia ka Sibá kakë a 'apun ñukákëxa:

—¿Mix karamina Sibá kakë uni a 'ain?

—'Ëx kana an mi ñu 'axúnti a 'ain —kixun ka kakëxa.

3 Kakëxun ka 'apun ñukákin kakëxa:

—¿Anu kara Saúlnën aintsi 'ën nuibakin Diosan anën ñu 'axúntisa 'itima 'ik? Kakëxun ka Sibánën kakëxa:

—Anu ka Jonatánnën bëchikë achúshi aín taë amorabë́bi 'atimakë 'aish nikëma ax 'ikën. 4 Kakëxun ka —¿Uinu kara ax 'ik?

—Kixun 'apun ñukákëxa. Ñukákëxun ka kakëxa, —ax ka Lodebar ëmanu 'ikë Maquir Amiel kakë uni aín bëchikënën xubunu 'ia —kixun ka Sibánën kakëxa.

5 Ësakin kakëxun ka Davidtan anua 'ikënua bitánun bëtsi uni xunun kixun kakëxa; 6 kakëxuan kamikëx ka Mefi-bóset Jonatánnën bëchikë Saúlnën xuta uakëxa, 'ai ka Davidnën 'ikënu bëbakuatsini ami ñanati 'ain bëmánanën me tikai 'iakëxa.

¡'Ikëbë ka munuma banai Mefi-bóset kai! —David kiakëxa. Kia ka Mefi-bósetnën David kakëxa:

—Añu mi 'axúnti kaina kuëënin a kana mi 'axúnti 'ai kixun kakëxa.

7 Kakëxun ka Davidtan kakëxa:

—Rakuëama kamina 'iti 'ain, 'ën kana mi upíokin 'akinti 'ain, min papa Jonatánnën ka bana a sinánkin. Usa 'ain kana kamabi me min xuta Saúlnan 'ia a mi 'inántëkënun 'amiti 'ain, 'imainun kamina 'ën xubunuxunbi pinun mi 'imiti 'ain. 8 Ësokin kakëx Mefi-bósetnën ami ñanati 'ikin kakëxa:

—'Ëx kana an mi ñu 'axúnti 'ain, 'aínbi kana 'ëx añubima 'ain, usa 'ain kana 'ëx mix 'apu 'ixun usakin kaisama 'ain, 'ëx kana achúshi kamun bamakësa 'ain.

9 Usa 'ain ka 'apun Sibá ax irapaian Saúlnën ñu bërúankë 'ia a kuënxun kakëxa:

—'Ën kana 'unan ami ñu mëëxuan Saúl aín xutan ñukama a kana kamabi 'unan 'imainun kana aín aintsikamanan 'ia aribi 'unan. 10 Usa 'ain kamina min bakë bëchikë bëbukama 'imainun an mi ñu mëëxunkë unikamabëtan aín menu ñu 'apákëxa bimia bitankëxun bukunxunti 'ain, usakin 'axunkëx ka a piti 'ain aintsikaman 'iti 'ikën, 'aínbi ka Mefi-bóset aín xuta 'ën xubunuxunbi pi 'inuxun 'aia. Kakëxun ka Sibá quince bëchikëñu 'imainun veinte uni an ñu mëëxunkëñu, 11 an 'apu kakëxa:

—Kamabi min kakë ñukama ka an mi ñu mëëxunti uni ënën 'ati 'ikën. Usa 'ain ka Mefi-bósetnën Davidtan bëchikësa 'ixun 'apun xubunuxunbi pi anubi 'iakëxa. 12 'Imainun ka achúshi bëchikë chukúma Micaías kakin anëkëñu 'iakëxa, usa 'ain ka kamabi unikama Sibá aín xubunu 'ikë atux Mefi-bóset ñu mëëxuni 'iakëxa. 13 'Aínbi ka Mefi-bóset ax amorabë́bi 'ain taë 'atimakë 'aish Jerusalén ëmanu tsóakëxa, usa 'ixun ka 'apun xubunuxun pi anubi 'iakëxa.