2-4 Achúshi nëtën ka aín xubunu tanti baiti David xupinbukëbë chikíax tëkitsi manámia 'akë anu kuankëxa, kuantankëx anu nikinbi ka achúshi xanu upíira upí 'ain pëi machabaiëxanx bërí sënë́anx nashia isakëxa. Istánkëxun ka Davidnën aín uni uinu 'ikë xanu karaisa ax 'ikë kixun ñukátanun kixun xuakëxa, xukëx kuanxun ñukábëtsini ukin ka a xukë uni an kakëxa: Ax kaisa Betsabé, Eliam kakë uni aín bëchikë 'ikën, 'imainun kaisa hitita uni Urías aín xanu 'ikën. Usokin ñuixunkëxun ka Davidnën a isa bëxuntanun kixun aín uni xuakëxa, xukëxua bëan ka Davidtan a imë́ aín xubunuax abë 'iakëxa, abë 'ikiani ka a xanu 'ain xubunu kuankëxa.

5 Usai abë 'iax tukin ka xanuxunbi David kana túa kixun an 'unánun kamiakëxa. 6 Usa 'ain ka Davidnën Joab suntárunën kushi a hitita uni Urías axa anu unun kanun kixun kamiakëxa, kamikëxun ka Joabnën uisokin kara kamiaxa usabi okin 'akëxa.

7 Usokin kamikëx uax ka Urías uinu kara David 'ia anu kuankëxa, kuankë ka Davidtan uisa kara Joab 'imainun aín suntáru axa 'akanani kuankë akama 'ikë kixun ñukákëxa. 8 Ñukátankëxun ka tanti aín xubunu kuanuxa aín taë pain chukatankëx aín xubunu tanti kuanun kixun kakëxa. Kakëx ka Urías, anu 'apu 'ikë xubu chaiira anuax chikíkiani kuankëxa, kuania ka Davidnën piti upí na pinun 'inaishikin buámiakëxa.

9 Usai anuax kuanxbi ka Urías aín xubunu kuanima, 'apun xubu chaiira aín xëkuë an bërúankë suntárukamabë imë́ anu 'i bërúakëxa.

10 Usai anu pë́karakë 'ain ka Urías ka aín xubunu kuankëma 'ikë kixun David ñuixunkankëxa, ñuixunkëxun ka Davidnën anua kuantëkënun kixun Urías kamiakëxa, kamikëxa kuankë ka ñukákëxa:

—¿Uisa kupín kaina min xubunu nibaixaxbi tanti kuankëma 'ain? 11 Kixuan ñukákëxun ka Uríasnën kakëxa:

—Bunántisa okin 'akë anu Diosan banakama kuënëoxun nan akama 'imainun Israel suntárukamaxa Judánën rëbúnkikamabë anu atux 'iti mapanatira uisokinbi kara 'atankëx anu 'ikania; usaribiti ka Joab 'ën 'apu a 'imainun min suntárukamabëbi ëmanbi 'uxkania; ¿Usaia atux 'imainun karana 'ëxëshi upitax 'ën xubunu kuantankëxun upíokin pianan xëanan kai 'ianan 'ën xanun nami 'anan usaibu 'iti 'ain? ¡'Ën kana asérabi 'apu ikë mi kain 'ën kana usa ñu 'atima 'ain! 12 Kakëxunbi ka Davidtan kakëxa:

—Ënu kamina bërí bërúti 'ain, imë́ishi kana kuantanun mi xuti 'ain usakian kakëx ka, Urías anu pain 'i Jerusalénnu pëkarakëbë kuanux bërúakëxa. 13 Bërúkë 'ain ka Davidnën abëtan pianan xëakin paëónkëxa. Usokin abëtan xëanëti ka Urías an 'apun xubu bërúankë suntárukamanu 'uxtëkëni kuankëxa, 'aínbi ka aín xubunu kuanima anubi bërútëkëankëxa.

14 A pë́karakë 'ain ka Davidtan achúshi kirika Joab kuënëoxun Urías kuania buámiakëxa. 15 A kirikanu ka ësokin kuënëoxuankëxa: “Urías kamina axira paian 'akanani rëkuë́nkiani anpan kuanti suntárukama akëñun xuti 'ain, usokin 'axun kamina abë 'akanankian 'akanun ënti 'ain.”

16 Usokin kuënëoxunkë kirika a istankëxun ka an kakësabiokin Joabnën anua 'akánanti nëtë 'ikëbëtan axa atumi nishkë amonita unikamabë 'akananuxun atun ëma suntárukama bëaramikin, Urías uinu kara suntáru 'akánanti 'unáinrabu 'ikë anu atubë kuanun xuakëxa, 17 usokin 'an ka atubë 'akananux a ëmanu 'ikë unikamax Joabnën suntárukamabë 'akanankëxa, 'akanankin ka Davidnën suntárunën kushikamakëñunbi Urías aribi 'akankëxa.

18 Usai 'akanantankëx sënë́an ka, Joabnën David uisai kara 'akanankënu 'ikanxa kixun kamabi ñuixuntanu uni xuakëxa, 19 xukin ka ësokian katánun kixun a xukë uni kakëxa: “Nun 'apu kamina uisai karanuna 'akanani 'ia akamabi upíokin ñuixunti 'ain, 20 ñuixunkëx nishkin sapi ka mi ñukati 'ikën: ¿Uisa kupín kaina atun ëma 'ai a 'uramaira obiani kuankan? Mitsun kaina 'unaniman atun ka uisa ñubi kara nikin uni anun ëma bëararakë anu nikianxun 'aia kixun, 21 usokinribi 'akin ka Tebés kakë ëma anuxun achúshi xanun Abimélec Jerubaalnën bakë bëchikë a anun ñu rënkë maxax nipakin anun rëkankëxa ¿Uisa kupín kara 'aisamaira anun atun ëma bëararakë a 'urama okin chichabiani kuankan? Kixuan kakëxun kamina min kati 'ain: Urías min suntárunën kushi hitita uni aribi ka 'akanxa kixun kati 'ain.”

22 Ësokin kakëx kuanx anu bëbaxun ka David uisokin kanun kara Joabnën kaxa usabi okin kamabi ñuixuankëxa. Ñuixunkëxun kuati ka David 'aisamaira Joabmi nishakëxa, nishkin ka an bana buánkë uni a kakëxa:

—¿Uisa kupí kaina mitsun 'aisamaira a ëma chichabiani kuankan? ¿Mitsun sapi kamina 'unaniman atun ka uisa ñun kara 'aisatania anun ëma bëararakin kënëara anuxun uni 'aia kixun, usokinribi ka Tebés kakë ëma anuxun achúshi xanun Abimélec Jerubaalnën bakë bëchikë aribi anun ëma bëararakë anuxun anun ñu rënkë maxax nipakin rëa a sinaniman? ¿Uisa kupín kaina, 'aisamaira 'urama kiani kuankin anun atun ëma bëararakë a chichabiani kuankan? 23 Usokin kakëxunbi ka an bana ñuixunkë uni anribi kakëxa:

—Anu 'ikë suntárukamax ka nu 'ai atun ëmanuax chikíkuatsinkin ëmanbi rakankin nu 'axa 'akëxunbi kananuna nunribi atun ëmanu atsínti xëkuë ami kikiantanun kuaintisama okin bëaran. 24 Usokëbëtan anun ëma bëararakë a manámi nikianxun ka atun pia nikin min suntárukama 'axa, usokin 'akin ka 'ain kushi raíri 'anan hitita uni Urías aribi 'akanxa. 25 Usa 'ain ka Davidnën an bana ñuikuankë uni a kakëxa:

—Joab kamina kuantankëxun kai kuanti 'ain, 'itsaira ka 'inúkë ñu a sinani masá nuitutima 'ikën, usaibi ka suntárukama 'akanani kuax bamaia. Usa 'ain kamina min sinánmikin kati 'ain atu 'atankëxuan anua 'ikankë ëma aribi 'aisama okin këñunun kixun.

26 Usokian aín bënë Urías 'akankë ka aín xanun kuakëxa, kuatankëx ka 'itsaira aín bënë sinani masá nuituakëxa; 27 usai 'itankëxa aín masá nuitukë a basikëbë aín sinan bukubutia ka, Davidnën ax anu 'ikë xubu chaiira anu isa buánxunun kixun aín uni xuakëxa, xukëxun buania ka aín xanu 'iti biakëxa, bixun ka ami achúshi okin bëchiakëxa. Usokin 'akë 'aínbi ka Davidtan 'akë ñu ax Diosan iskëx upíma 'iakëxa.