—Achúshi ëmanu ka rabë́ uni 'iakëxa. Achúshinëxa ñuñuira 'imainun ka bëtsix ñuñuma uni 'iakëxa. 2 Ñuñuira uni an ka 'itsaira carneroñu 'ianan vaca 'arakakëñu 'iakëxa, 3 'aínbi ka uni ñuñuma an oveja 'itsama achúshiira maruxun 'arakakë 'iakëxa. Usakin 'arakakëxa kania ka carnero tuára a abëbi 'inun 'ikikin aín bakë bëchikëkamabëbia 'inun bërúankëxa; bërúanan ka aín pikë ñubi pimikin, anúan xëakë ñumibi xëamikin aín 'uxti anubi 'uxmiakëxa. ¡Usakin 'akin ka a unin aín ini bëchikë achushira 'akësaribi okin kuëëankëxa! 4 Kuëënkian kaniokëbëbi ka achúshi nëtën 'ura kuani nikë uni ñuñuira uni a isi kuanx anu bëbakëxa; bëbakë 'aínbi ka ñuñuira uni an aín carnero 'aisamatankin aín vacabi rëxun a uni pikinsama tankin, ñuñuma uni carnero bakë bixun rëxun piti 'axun a isia kuankë uni pikiankëxa.

5 Ësakian unin 'akë a ñuixunkëxun a bana kuakin ka an usakin 'akë uni a sinani aín nuitu xuama tani nishkin Davidnën Natán kakëxa:

—¡Min manukinma 'ën kakë bana sinanatëkëntima okin Diosan ismainun mi kain a unix ka bamakë 'iti 'ikën! 6 ¡Usa 'ain ka an usakin aín carnero tuá 'akë an ñuñuma uni a rabë́ 'imainun rabë́ribi okin kupíoti 'ikën, sinan ñumasa 'ixun ka a nuibati sinánkima usakin 'axa!

7 Ësokin kakëxun ka Natánën kakëxa:

—¡Mix kamina a uni 'ain! Ësai ka Israel unibunën Dios ax mi ñui, kiáxa: 'Ën kana a Israel unibunën 'apu 'inun mi kaisakën: 'Imainun kana Saúlnën 'ati 'ikëbi bërúankin 'akiankën; 8 mi kana anu 'apu 'ikë xubu 'inánan 'apun xanu akamaribi min xanu 'inun mi 'inan, mixmi Israel unibu 'imainun Judánën 'apu inun mi 'imian. Usa 'ixun kana a ñukamaxa chamara 'aínbi, 'itsaira ñu 'ën mi 'inánkë 'itsían kiax ka kiakëxa. 9 ¿Uisa 'ixun kaina 'ën kakësabiokin 'akinma 'ën kuëënkëma ñu 'an? Min kamina hitita uni Urías a amonita suntárukama këmëxun 'amiakën, 'axun kamina aín xanu 'ikëbi min xanu 'inun biakën. 10 Usa 'ixun kamina min 'ën kakëxunbi 'ën bana kuaisama tankin hitita uni Urías 'amixun aín xanu min xanu 'iti bian, usa 'ain ka uínsarabi mix ñukëma pain 'ain min bakë bëchikëkama atuxi 'atimati bukui upitax tsótima 'ikën. 11 Ësai kana 'ëx Dios ira 'aish kin: 'Ënbi kana min aintsi 'ibunbia 'aisamaira okin masókin mi tëmëraminun 'amiti 'ain, 'imainun kana min aintsi 'ibunbia min xanu mi ëmikin binun 'amiti 'ain 'anan kana, ëma xabanuxunbi aín nami 'anun 'inánti 'ain usai 'iaka bëtsi menu tsókë unikaman kuati 'ikën. 12 Min kamina kanankinma unëxun ñu 'akën, 'aínbi kana 'ën unëxun 'akima kamabi Israel unibunën ismainunbi, nëtë xabanuxunbi 'ain kiax ka Dios kiaxa kixun ka kakëxa.

13 Ësakian Dios kikë bana ñuikin kakëxun ka. Aín 'uchakë ñuixunkin Davidtan Natán kakëxa:

—Asérabi kana 'ëx Diosmi 'uchan. Kakëxun ka Natánën amiribishi katëkëankëxa: Diosan ka 'uchakë 'ikëbi 'atimonan tëmëramikin mi bamamitima 'ikën. 14 'Aínbi kamina minbi 'aisamaira oí ami kuaikin Diosan kakëxun kuaisama tankin aín bana parëkin an kuëënkëma ñu 'an, usa 'ain ka min bakë bëchikë bërí náchikikë ax chamara 'aíshbi ñuti 'ikën.

15 Ësakin kabiania Natán anua 'ikë aín xubunu kuan ka, Diosanbi Davidnën bakë bëchikë Uríasnën xanumia bëchikë a 'aisamaira okin kushiira 'insínmiakëxa. 16 Usai 'ikëbë ka David aín bakë bëchikë chamara anun rabanan Diosbë banakin añubi piama 'ikën. 'Imainun ka a imë́kama usai Diosbë banai anua 'uxkë anu 'uxima men 'uxnë́akëxa. 17 Usai 'ia ka anu rikianxun 'apu anu 'ikë xubunua abë 'ikë aín kushikaman menuira rakama kamina niruti 'ai kixun kakëxbi ka nirutisama tankëxa, usai 'ikin ka atun bana parëakëxa. 'Imainun ka atubëtanbi usai 'ikin piama 'ikën.

18 Usaia 'ian ka mapai achúshi 'imainun rabë́ nëtë 'ikëbë aín bakë bëchikë ñukë, 'ain ka Davidtan suntárunën 'apukaman ësokin sinánkëxa: “Aín bakë bëchikë ñukëma 'aínbi ka nukaman kakëxunbi nun bana parëaxa, ¿Usa 'ain karanuna bërí aín bakë bëchikë ñukë 'ain uisakin anu kuanxun kati 'ain? ¡Anu kuanxun nun kakëxunbi sapi ka nishkin uisakin kara 'aisatania usakin nu 'ati 'ikën!”

19 Usai kanania aín suntárunën kushikaman atúnbi aín bakë bëchikë ñukë unë́xun ñuia kuakin 'unánkin ka Davidnën. Ñukákin kakëxa:

—¿'Ën bëchikë kara ñuax? —Kixun ñukákëxun —atun ka ñuaxa kixun kakëxa.

20 Usakian kakëx ratuti ka anua rakákë menuax, nirutankëx nashixun aín chupa pañutankëx David ro sanuira anun 'iakëxa, usai ro sanuiran 'itankëx ka anua abë banati 'akë xubunu Dios rabi atsíankëxa. Atsíanx anuax chikíkiani aín xubunu kuanxun ka anuxun, pananxun piti an ñu 'axunkëkama ñukákëxa, ñukákëxuan 'inánkëxun ka piti piakëxa. 21 Usakian 'aia ka aín suntárunën kushikaman ñukákin kakëxa:

—¿Uisa 'ixun kaina mix nun 'apu 'ixunbi usakin 'ain? Min bakë bëchikë ñukëma 'ain kamina, mix 'apu 'aínbi samáti anun rabanan 'ianan usaibu 'ikëma 'ain; bërí ka min bakë bëchikë ñukë 'ikën. ¡Usa 'ain kamina mix nun 'apu 'aíshbi bëríra pi nirua!

22 Kixuan kakëxun ka Davidnën kakëxa:

—'Ën kana 'ën bakë bëchikë ñukëma 'aínbi pima samáti 'ian, 'ën sinánkëx ka 'iaxa Diosanbia 'ë nuibakin 'ëbëbia 'inun 'ë pëxkuxuinsa kana sinan. 23 'Aínbi ka 'ën bakë bëchikë bërí ñukë 'ikën. ¿Añunën rabanan karana 'ëx axa tsókëbëtama pima samáti 'ain? ¡'Ëx kana ñukiani 'ën rara itsi aín rara itsibë biranani kuanti 'ain, 'aínbi ka ax 'ëbë biranantima 'ikën!

24 Usaia 'ikë 'ain ka David aín xanu Betsabé, nitë́xëti masá nuitukë a upíokin sinánmikin nitë́xëaxma 'inun kixun kakëxa. Ësakin kax abë 'ikian aín nami 'akëx tutankëx ka achúshi bëbu tuá bakë́ankëxa, bakënkë 'ikë ka Davidnën Salomón kakin anëakëxa. Usakin anëkë 'ikë ka Diosan a tuára nuibakëxa, 25 'imainun ka usakin bërúankëbëtan an uni 'ain bana ñuixunkë Natánën Nukën 'Ibun ka ënë tuá bërúaia kixun David kakëxa. Usakin kakëxun ka Diosan ka ënë tuá bërúaia kixun 'unánkin Jedidías kakin Davidtan anëakëxa. “Ënë banax ka Diosan ka a nuibatia ki kikë bana 'ikën.”