—'Ën kana bëráma 'ikë ñukama mënion, usa 'ain kamina anu kuanxun 'ën bëchikë Absalón na utëkënun kai kuanti 'ain, 22 Usokian kakëx ka Joab aín bëmánanën me tikai tsóbukin ka upíokin sinánxunkin 'apu kakëxa:

—Bërí kana 'ën bërúnbi mi isin, asérabi kamina min 'ë nuibakin 'ën mi ñukákësabi okin 'ai kixun. 23 Usakin kakëxëshi nirukiani ka Joab Guesur kakë anua Absalón Jerusalénnua kuanun kai kuankëxa. 24 'Aínbi ka 'apux kiakëxa, aín xubunu ka ënu aíma kuanti 'ikën, usai kikëbë ka anu kuanma 'ikën; usai kikëbë ka Absalón aín xubunu kuankëxa, 'apu isi kuanima.

25 Kamabi Israel me kamanu ka Absalón iskësaribi uni aín upíira 'aíma 'iakëxa, 'imainun ka kamabi unin ax ka raíri unikamasamaira 'ikë kixun rabikë 'aíma uni 'iakëxa. Usa 'aish ka aín taënuaxbi aín maxkánu sënën uisaibi 'ikëma aín bëmánan axbi upíira upí 'iakëxa. 26 Usa uni 'ikë ka baritia këñukëtibi aín bu chaxkë́ti 'iëkin masámikëxun tëamiakëxa, usokin tëakëx ka aín bux 'apun tupumikëx rabë́ kilo inúkë 'iakëxa. 27 Absalón ax ka achúshi 'imainun rabë́ bakë bëchikë bëbuñu 'iakëxa, 'imainun ka aín 'ini bëchikë xanu achúshi ñuribi 'iakëxa, aín anëx ka Tamar kakë 'aish aín upíira xanu 'iakëxa.

28 Rabë́ baritia 'imi Jerusalénnu tsókinbi ka Absalónnën aín papa 'isama 'ikën, 29 usa 'ixun ka Absalónnën 'apu isa isuntanun kixun Joab kakëxa; kakëxbi ka Joab kuaisama tankëxa. Usai kuainsama tankë ka amiribishi Absalónnën kuantanun kixun katëkëankëxa, kakëxbi ka kuanma 'ikën.

30 Usai 'ikëbëtan ka Absalónnën aín uni kakëxa:

—Ka kuat, Joabnën ka 'ën kakësokin 'aisama tania, usa 'ain kamina aín naë ka 'ën naë rapasubi anua cebada 'apákë 'ikën; ¡usa 'ain kamina anu kuantankëxun xarátanun tsi bimi kuanti 'ain!

Usokin Absalónnën kakëx kuanxun ka aín unin Joabnën cebada 'apákë mënútanun tsin bimiakëxa, 31 usakian aín ñu 'apákë 'amikë ka Joabnën kuakëxa; kuabiani ka bënëtishi aín xubunu kuanxun Absalón ñukákëxa:

—¿Uisokin sinánxun kara min unikaman 'ën ñu 'apákë xarátanun tsin bimi bëtsianx? 32 Kixuan kakëxun ka Absalónnën kakëxa:

—'Ën kana ësokinmi 'ë ñuikin 'apu kaxuntanun kixun kanuxun mi kamian, uisa kupín kara istisama tankinbi 'ë Guesur ëmanuax unun kixun kamiaxa; usa 'ain kana anubi tsóti bërúti 'ian. 'Ëx kana abë banatisa tanin, an iskëx 'aisama uni 'ikë ka 'ë 'atankëxun rakanti 'ikën.

33 Usakian kakëx ka Joab anu kuanxun 'apu Absalónnën usakian a ñuikin kanun kakë bana ñuikin kakëxa, kakëxun ka 'apun anua kuanun kixun kamiakëxa, kamikëx kuani ka, Absalón 'apu 'ikë a 'urama 'oíshi aín bëmánanën me tikai tsóbuakëxa. Usai 'ia ka 'apun bëtsuku kakin 'ikúkin biakëxa.