David chikíntankëx Absalón 'apu 'iisa tan ñuikë bana
15
'Itsama baritia 'inukëbëtan ka Absalónnën anun 'akánanti caballonën nirinkë achúshi anuax 'akánanti 'imainun caballo bianan, cincuenta suntárukama an bërúanxun nikinti anëakëxa. 2 Usa 'aish ka kamabi nëtën pëkarakëma 'aínshi nirutankëx bai rapasu anun ëmanu atsintinu niakëxa, anuxun ka kamabi uni axa 'apun aín nishanankë, mëníoxunun ukë uni kuënxun uinu 'ikë ëmanuax kara 'aia kixun ñukákëxa. Ñukákëxa a uni 'ëx kana Israel kaman ñakánuax aín kia ka, 3 Absalónnën kakëxa: “Asérabi ka a mëníoxunumi ukë ax këmëi kikëma 'ikën, 'aínbi ka 'apun an usa ñukama mëníoti anëkë uni ka 'aíma 'ikën kixun këmëkin kakëxa.” 4 Ësokin kakin ka kakëxa: 'Ëx ënë menu 'apu 'ixun kana, axa 'ë isi ukë unikama atun ñu 'akë istankëxun 'ën upíokin mëníoxuntsian kixun kakëxa. 5 Kanan ka ui unin kara 'urama oia a, Absalónnën tëpatsakin bikin bëtsuku kakëxa. 6 Ësokin ka kamabi israel unikama axa ñu 'atima 'anan nishanankë akamax mëníoxunun 'apubë banai kuankëxa, ësokin 'akin ka Israel unikama raíri ax isa 'apusama 'ikë kixun paránkin 'atima okin sinánun 'imiakëxa.7 Usakin 'akëbëa rabë́ 'imainun rabë́ baritia 'inukëbëtan ka Absolónnën anu kuanxun 'apu kakëxa:
—'Ën kana mi kain mixmi 'apu 'ikë min karamina Hebrónnu kuantankëxun 'ën a 'axunuxun kakë Dios 'axuni kuantanun xutima 'ain. 8 An mi ñu mëëxunti ënëxa Guesur kakë ëma Siria me anu tsókë 'ixun kana Diosan 'ë amiribishi Jerusalénnu kuantëkënun 'imikëxun kana ñuina xarokin mi rabiti 'ain kixun kakën. 9 Kakëxun ka bërúanx kamina kuani kuanti 'ai —Kixun 'apun kakëxa. Kakëx ka Absalón Hebrón ëmanu kuankëxa. 10 'Aínbi ka Hebrónnu kuanuxun Absalónnën uni an Israel unikama kati xukin, ësokin kakë 'iakëxa, uínsaran kara bëtsi unínbi manë banañu banoia kuatia anun ka Absalón ka Hebrónnu 'ikë unikaman atun 'apu 'iti anëaxa, kiax kikanun atu katánun kixun xuakëxa. 11 Xuanan ka doscientas unikama abë kuanti Jerusalénnua tsókë upí sinánñukama ashi kakëxa, 'aínbi ka usakian 'akë a 'unánkama 'ikën. 12 Usakin 'akin ka Absalónnën, an David usakin kamina ñu 'ati 'ai kixun kakë uni achúshi Ahitófel axa Guiló kakë ëmanu tsókë aribi abë kuani unun kixun kamikin ka an ñuina xaroia isa 'akini kuanun kixun kamiakëxa. Usakin 'akin ka an sinánkësa okin anuxun Israel unikama atubë kushinuxun timëakëxa.
David Jerusalénnuax abati kuan ñuikë bana
13 Usai 'ikëbëtan ka achúshi unin anu kuanxun David, kakëxa 'itsaira Israel unikama ka Absalón 'akinux abë timë́kanxa kixun. 14 Ësokin kakëxun ka Davidtan abëa Jerusalénnu 'ikë 'ain suntárunën kushikama kakëxa:
—¡Ënuax kananuna bërí kuanti 'ain! ¡Absalón nu 'ai ukëma 'aínshi kananuna ënuax kuanti 'ain! ¡Usa 'ain kananuna bënë kuatsini aí bëbakin nu 'akiantuma kamabi unikama ëmanu 'ikë kamakëñunbi atun manë xëtokën nu 'aia usa 'ain kuanti 'ain!
15 Kixuan kakëxun ka atun 'apu kakëxa:
—Nukaman kananuna añu 'anun kaina min nu kain usakinbi 'axúnti asábi 'ain. 16 Ësokin atu katankëx abëa 'ain xubunu 'ikë unikamabë chikiti kuankin ka 'apun an ñu mëëxunkë mapai rabë́ xanukama ax anu 'ikë xubua bërúanun ëbiankëxa. 17 Ëbiani ka abëa kuankë unikamabë kuantankëx ëma sënënákëkënu 'ikë xubu achúshi a tanain 'apu nirakëakëxa. 18 Anuxun ka a rapasubia 'inun kixun 'ain suntárunën kushikama kakëxa, kamainun ka kamabi quereteo 'imainun peleteo an bërúankë suntárukama 'imainun seiscientos geteo an Gat kakë ëma anuxunbi nuibiani marachankiani kuankë akamax a inubiani atux pain rëkuë́nkankëxa. 19 Usai 'ikëbëtan ka 'apun Itai Gatnu 'ikë uni a kakëxa:
—¿Uisakin sinax kaina mixribi nukamabë kuankatsikiax uan? Mix kamina kuantëkëntankëx 'apu bërí atsínkë abë bërúti kuanti 'ain, mix kamina bëtsi menu 'ikë uni 'aish min menubi tsókëma uni 'ain. 20 Mix kamina bëríra Jerusalénnu bëbón, ¿uisaxun karana nubë kamina kuanti 'ain kixun 'ën mi kati 'ain, 'ënbi kana uinu karana kuanin kixun 'unaniman? Usa 'ain kamina amiribishi kuantëkënkin min 'aintsikama uanti 'ain. ¡Usa 'ain ka Diosan mi 'upiokin sinánxunkin 'akinti 'ikën! 21 Kakëxun ka Itainën 'apu kakëxa:
—Asérabi kana Diosan kuamainun kianan ashikin sinánti okin mi kain, uinu karamina mix kuanin uinu kaina mix bamain anubi ka an mi ñu mëëxunti uni ënëx bamati 'iti 'ikën. 22 Kakëxun ka —Nubë kamina kuani uti 'ai —kixun Davidtan kakëxa. Ësokin kakëx ka Itai Davidbë kuani an bërúankë aín unikama 'imainun abë kuankë unikamabë kuankëxa.
23 Kuani ka David 'imainun abëa kuankë unikama 'aisamaira nishi inkiani kuankankëxa. Usai kuani ka kamabi uni Cedrón kakë xëxá a shitakankëxa; usai 'ikëbëa 'apuxribi kuankëbë ka kamabi uni axa kuankëkama ax anu uni 'ikëma me ami kikiani bain rëkuë́nkiani kuankankëxa.
24 Atubë ka achúshi uni Sadoc kakë 'imainun kamabi levita kuankin atun bunántisa okin 'akë anua Diosan mëníokë ñu 'akë buánkëxa, uanxun ka Abiatar kakë anu kamabi unia ëmanuax chikitamainun an bërúanun anu ëankëxa. 25 Usa 'ain ka kamabi uni ëmanuax chikíkëbëtan 'apu Sadoc kakëxa:
—Amiribishi kamina bunántisa okin 'akë anua Diosan mëníokë ñu 'arukë a buántëkënti 'ain, Diosan 'ëx anu kuantëkënti kuëënkëbë Jerusalénnu kuankin kana anua nantinua nankë isti 'ain. 26 'Aínbi ka ax 'ëx kuanti kuëënkima; ënu kana 'ai usa 'ain, uisakin kara 'ë 'aisatania usakin 'ë 'ati 'ikën.
27 Ësokinribi ka 'apun sacerdote Sadoc kakëxa:
—Mi 'imainun Abiatar mix kamina upitax min bakë bëchikë rabëbë Jerusalén ëmanu kuanti 'ain. Kuankin kamina min bakë bëchikë Ahimaas a buánti 'ain buámainun ka Abiatarnën 'ain bakë bëchikë Jonatán aribi buánti 'ikën. 28 Usa 'ain kana anu uni 'ikëma me ënu 'ëx bërútin, bërúmainun kamina uisa kaina mitsux anu 'ai a 'ë utëkënxun ñuixuni uti 'ain.
29 Usokin kakëxun ka Sadoc 'imainun Abiatarnën levita unikaman bunántisa okin 'akë anua Diosan mëníokë ñu 'ikë a Jerusalénnu buántëkënkënbë atubë kuanx anu bërukankëxa.
30 Usai kuantamainun ka David aín bashi Olivos kakë mapërakëti; ain taxaka ëchiax taëinshi kuani 'itsaira masánuituti nitë́xëkiani kuani chupan matëkërëkiax kuankëxa. Usaia 'ikëbë ka abë kuankë unikama atúxribi 'ain maxkánu chupan matëkërë kiax kuani atúxribi inkiani kuankankëxa. 31 Usa 'ain ka inkiani kuaniabi David ñuixunkin kakëxa, Ahitófel an mi bana ñuixunkë aín kushi an ka usakinsa mi 'anun kixun Absalón 'ësëkin kaia kixun, kakëxun ka Davidtan Ahitófel an usakinsa 'anun kaiabisa Absalónnën kakë bana kuamixuma 'anun kixun Dios ñukákëxa. 32 David aín bashi manámi anuxun Dios rabiti anu kuankëbëbi ka abë mëranani Husai kakë uni arquita ax kuani aín chupa tukibukë 'imainun 'ain maxkánu me kupúkënën matakakiax kuankëxa. 33 Kuania ka Davidtan kakëxa:
—Mix 'ëbë kuankëbë mimi mëkatia ka Absalónnën 'ë 'ati 'ikën; 34 usa 'ain kamina mix amiribishi Jerusalénnu kuantankëxun Absalón kai kuanti 'ain, an mi ñu mëëxunti ënën ka min papa 'axunkësabi okin mi ñu mëëxunti 'ikën, usakin kakëxun an mi ñu mëëxunti 'imikëxun kamina Ahitófelnën usakin kamina 'ati 'ain, kaiabi ka usakin 'atima ka, kixun min kati 'ain, 35 anu ka sacerdote Sadoc 'imainun Abiatar 'ikë an ka uisai kara anuax 'ia a 'ë kati 'ikën. Usa 'ain kamina uisai kara 'apun xubunuax kikania kuatankëxun 'ë kai uti 'ain. 36 Anu ka ain bakë bëchikë Ahimaas 'imainun Jonatánribi 'ikën, usa 'ain kamina uisai kara 'apun xubunuax kikania 'unánun 'ë ribia kaminun atu kati 'ain.
37 Usakin kakëx ka Husai Davidtan 'unánkë uni ax kuanx Jerusalénnu bëbakëxa, bëbai atsini kuankëbëbi ka Absalón axribi ëmanu atsini uakëxa.