David Sibá kakë unibë bana ñuikë bana
16
Kuania David 'ain bashi inubiani urira kikiankëbë ka Sibá kakë uni an Mefi-bóset ñu mëëxunkë uni ax abë mëranani kuankëxa. Kuankin ka burro rabë́ doscientos pán 'imainun cien pán 'akësokin chookin uvas bimi ëskakë akëñun cien ñu bimi 'aímai pëkë́kë aín unikaman bërí bikë akëñun achúshi ñuina xakánu 'arukë uvas baka aribi buánkëxa. 2 Buania mërakin ka 'apun ñukákëxa:—¿Uisoti kara minmi bëkë ñukama ënëx 'ik? Kixun ñukákëxun ka Sibánën kakëxa:
—Burrokama ënëx ka anúan 'apu min xanu min bakë bëchikëkamax kuanti 'ikën; 'ianan ka pán 'imainun ñu bimi pëkë́këkama ënëx ka min suntárukaman piti 'ikë, 'imainun ka ñuina xakánu bëkë uvas baka ënëx uix kara anu uni 'ikëma menuax shimaia an xëati bëkë 'ikën.
3 —¿Uinu kara Saúlnën xuta ax bërúax? —Kixun ka 'apun ñukákëxa.
—Ñukákëxun ka ax ka Jerusalénnu bëruaxa —kixun Sibánën kakëxa—, an ka Israel unikaman 'ain xuta Saúl 'asa okin 'apu 'imitisa sinánkëxa.
4 —Asabi ka —kixun ka 'apun kakëxa—, usa 'ain kana an usakin sinánkëbëtan mi Mefi-bóset aín me 'ia kamabi mi 'inánti 'ain.
—¡Usa 'ain kana bërími 'akësokinbi 'ë 'apu 'ixun 'akinti kuëënin! —kixun kai ka Sibá ami ñanati 'apumi 'iakëxa. 5 Usa 'ain ka 'apu Bahurim kakë ëma anu bëbakëxa, bëbakëbi ka anuax Saúlnën aintsi achúshi chikíakëxa. Ax ka Guerar kakë unin bakë bëchikë Simí kakin anëkë 'iakëxa, an ka kuania ami nishkin 'ichakin, 6 maxá ami pukin David 'imainun 'ain suntárunën kushikama 'akëxa, abë kuankë unikama 'imainun an bërúankë suntárukamabë kuaniabi ka, 7 Simí kakë an 'atimokin 'ichakin kakëxa:
—¡Ënuax kamina 'ura kuanti 'ain, mix kamina an uni 'akë 'aish 'atima uni 'ain! 8 ¡Diosan ka mi tëmëramiti 'ikën, min kamina Saúl 'imainun aín bëchikë bëbukama a chikimainun mixira 'apu 'ikatsi kixun ax 'apu 'ikëbi atu rëtëakën! ¡Usa 'ain ka Diosan min bakë bëchikë Absalón mix chikimainun ax 'apu 'inun 'imiti 'ikën, min uni 'akë kupínbi kamina usai 'in, usa 'aish kamina mix an uni 'akë 'ain!
9 Ësai kikëbëtan ka Abisai Seruiánën tuá an 'apu kakëxa:
—¿Uisati kara uni ñuumaratsunën mix 'apu 'ikëbi usakin mi kain? ¡'Ën bëríbi tëbískatanun kamina 'ë kati 'ain! 10 Kakëxunbi ka 'apun kakëxa:
—Ënëx ka mitsun isti ñuma 'ikën, 'ëx kana mitsun usakin 'aisa tankë a kuëëniman kixun ka Seruiánën tuá a kakëxa. An 'ë 'atimokin sinánkin 'ichákë ax ka Diosan usakin 'anun 'amikëxun 'ë 'akë 'ikën. Usa 'ain kara, ¿Uin kara usakin 'axuma ka 'at kixun kati 'ik? 11 Kai ami kikin ka Abisai 'imainun aín suntárunën kushikama kakëxa:
—'Ën bëchikënënbi ka 'ë 'aisatania, ¡Usa 'ain kara Benjamínën aintsikaman ax bëtsi unikama 'ixun 'ë 'aisaira tanima 'iti 'ik! ¡'Ëa 'atimokin sinánxunia kamina uisabi otima 'ain, Diosanbi sapi ka usakin 'ë 'anun sinánmiaxa! 12 Usa 'ain ka Diosan tëmërakin 'atimokin sinania okin 'ë upíokin sinánxunti 'ikën, usa 'aínbi kana bërí 'atimokin ñuikin 'ë 'ichákëxun kuatin.
13 Kikiani ka David 'imainun abë kuankë unikama kuankëxa, kuanmainun ka Simí aín bashi tanarati kuankin ka David 'atimai banakin 'ichábiani kuankin ami maxá pukin meribi kupútanun ami puakëxa. 14 Pukían 'akëx kuanx ka 'apu 'imainun abëa kuankë unikama Jordán kakë baka kuëbí bëbakëxa, bëbax ka 'aisamaira kuanbaiti atsánkë 'aish anu tanti bukubukankëxa.
Absalón Jerusalénnu atsían ñuikë bana
15 Usai 'imainun ka Absalón Jerusalénnu atsíankëxa, abëa nikë Israel unikama raíri 'imainun Ahitófel kakë uni abë. 16 Atsínkëbë ka arquita uni Husai Davidtan 'unánkë ax munuma banakiani Absalón abë mëranani kushin banai kiakëxa:
—¡Nukamax kananuna 'axa nun 'apu 'iti kuëënin ax ka 'apu 'iti 'ikën! 17 Ësai kia ka Absalónnën ñukákëxa:
—¿Uisakin kaina min 'unánkë uni nuibakin rabikin kain? ¿Uisati kaina abë kuankëma 'ain? 18 Kakëxun ka —Abë kana kuanima —kixun Husainën kakëxa—, 'Ëx kana kuanima mix kamina Diosan Israel unikaman 'apu 'iti kaískë a 'ain, mibëbi kana 'ëx bërúti 'ain kixun ka kakëxa. 19 'Imainun kana, uinu 'ikë uni karana ñu mëëxunin ax ka 'ën 'unánkë unin bëchikë bakë 'iti 'ikën. Usa 'ain kana mixmi 'apu 'ikë min papa 'axuansaribi okin mi ñu mëëxunti 'ain.
20 Usa 'ain ka Absalónnën Ahitófel ñukákëxa:
—Min papa an ñu 'axunkë xanu kamabë kamina aín nami 'ai abë 'i 'uxti 'ain, an ka anua 'ikë 'apun xubu bërúanxunun atu ëbianxa. Usaími 'ikë ka kamabi Israel unikaman kuati 'ikën, min kamina min papa nishmikin usakin ñu 'a kixun, usa 'ain ka an mi nuikë unikama an kuati kuëënti 'ikën. 22 Usakian kan ka aín unikaman chupa xubusa okin 'akë a xubu manámi anu Absalón pëninxuankëxa, usokin 'axunkëx ka Absalón aín papa an ñu 'axunkë xanukama abë 'uxkin 'ain nami 'akëxa. Usakin 'akë ka kamabi Israel unikaman kuakëxa; 23 a nëtëkaman ka Ahitófelnën bana ñukákë ax Diosbë banakësa 'iakëxa. Ahitófel a pain ka David 'imainun Absalónnën añu kara 'aisatania a 'anuxun ñukákëxa.