—'Ën kana bërí doce mil uni timëbianxun atubëtan ënë imë́bi min papa David nuikuanti 'ain. 2 Bërí ka asábi 'ikën, nibaitia atsánkë 'ikëishi nukúkin ami 'ikuainkëx, ratúkin ka abëa kuankë unikaman abákin ashi ënkanti 'ikën, usakin ëbiania kananuna atu 'akima 'apu David ashi 'ati 'ain, 3 usokin 'axun kananuna kamabi Israel unikamaxa abë kuankë akamabi uisabi okima mi bëxúnti 'ain, min kamina achúshi unishi 'anuxun barin, usokin nun 'akëbë ka kamabi unikamax nubë upitax tsóti 'ikën. 4 Ësokian Ahitófelnën atu kakë bana ax ka Absalón 'imainun kamabi Israel unibunën kushikaman kuakëx asábi 'iakëxa. 5 Usa 'ain ka an kuakëxa a bana asábi 'aínbi Absalónnën Husai arquita uni a kamiakëxa, uisa kara Ahitófelnën sinánkë bana ax 'ikë kixuan anribi kuati unun kixun.

6 Usakin kamikëxa Husai anu ukë ka Absalónnën usakia Ahitófelnën sinánkë banakama a ñuixunkin kakëxa: Ñuixuntankëxun ka ñukákëxa. ¿Karanuna an sinánkësokin 'ati 'ain, karanuna 'atima 'ain? Kamina mixribi kiti 'ain. 7 Usakian ñukákëxun ka Husainën Absalón kakëxa:

—Bëria Ahitófelnën mi sinánxun kakë bana ax ka upíma 'ikën. 8 Minbi kamina upíokin 'unan min papa 'imainun aín unikama ax ka sinaira unibu 'ikën, usa 'aish sapi ka atun nishkë bukubuisama pain 'ikën, achúshi xaëón raëkëmaxa aín tuá bikuankëx 'ikësaira ka bërí aín sinan 'iti 'ikën. Min papa ax ka 'akánanti 'unainra uni 'ikën usa 'aish sapi ka unin barikëxun 'unánx aín suntárukamabë ñantan 'ima abi 'ia. 9 Bëríbi sapi ka asérabi aín bashi kininu unëaxa, anu 'ima kara amanu ñachatankëx anuribi 'ia. Usa 'ixun ka minmi atu 'anun kixun xutiabi min suntárukama, Davidtan kupímashi 'ati 'ikën, usokin 'akë ka raíri unikaman Davidtan ka min unikama 'axa kixun kuati 'ikën. 10 Usa 'ain ka min suntáru axa 'akanantinuax këruirakë unikamaxbi atumi rakuë́ti paru 'inúan në́kë usa sinanbu 'aíshbi kërutima rakuë́ti abáti 'ikën; minbi kamina kamabi Israel unikamabëtanbi 'unan min papa David 'imainun aín unikama ax ka asérabi këruira unibu 'ikë kixun. 11 Usa 'ain kamina ësokin mi kamainun kuati kamabi Israel suntárukama axa Dan kakë ëmanu 'ikë 'imainun Beerseba kakë ëmanuaribi timë́këx ka 'aisamaira 'aish parúmpapa kuëbiküa masi bëru iskësaira 'iti 'ikën, usa 'ikë kamina minbi a unikama 'akanankin buánti 'ain. 12 Usakiani kuanxun kananuna min papa aín unikama këñunbi uinu kara 'ia anuabi nukuxun 'ati 'ain. Usokin a 'akin kananuna nibitan anu 'ibúkin mekama chabókësa usakinshi kuaintisama okin bëararaxun achúshirabi kuaimikinma abëa 'ikë unikama këñunbi a 'ati 'ain. 13 Anua 'ikë anu 'ima bëtsi ëma upíokin bëararakin kënëkë anubi kuankë 'ain kananuna kamabi Israel suntárukama risi rinbianxun anun ëma bëararakë rurupakin añu ñubi anu bërutanuma kamabi maxáxkama tëkërë kapatankëxun nirinbianxun bakanu puti 'ain, usokin 'akëx ka achúshi maxáxbi ami unë́ti 'aíma 'ain sinánkamaia kananuna min papa 'ati 'ain.

14 Usai kia Absalón 'imainun kamabi Israel unikaman kuakëxbi ka Husainën atu sinánmikë ax asábira 'iakëxa. Ahitófelnëa atu sinánmikin kakë axa atun kuakëx asábiribi 'aínbi. Usai ka Diosan bërámabi Ahitófelnën kakësokin 'akantima kupí Davidnëa tëmaishi Absalón 'anun. 15 Usa 'ain ka Husainën 'apun xubu chaiira anuax chikixun sacerdote Sadoc 'imainun Abiatar kakëxa, Ahitófelnëa Absalón 'imainun Israel unikaman kushibu sinánmikin kaia kana kuan, kuakin kana 'ënribi sinánmikin atu kan, 16 usa 'ain kamina bënëti kuantankëxun David kai kuanti 'ain, aín unikamabëa anu uni 'ikëma me anu ënë imë́ 'itëkëaxma kuantanun kixun kati 'ain, Absalónnëma aín suntárukama buani kuanxun anua nukuxun aín unikama këñunbi 'aia, bënëtishi kuanxa Jordán kakë baka sikarakëkiani kuanun kamina kai kuanti 'ain. 17 Usakin kakëx kuanx ka Jonatán 'imainun Ahimaas ax achúshi xëxá En-roguel kakë anu pain unikaman isma Jerusalénnu atsinia isia kixun sinani bërúakëxa, anuxun ka an ñu 'axunkë xanu David kaxuntanun kixun xuakëxa, xukëx kuanxua kakëbëshi atúxribi bënëtishi anu kuanxun ka David bana ñuixuankëxa. 18 'Aínbi ka achúshi tuá bërunanën usai 'ia kuabianxun Absalón ñuixuankëxa.

Ñuixunia 'unánbiani ka a rabëtaxbi bënëtishi anuax kuantankëx an 'unánkë uni Bahurim ëmanua 'ikë aín xubunu kuankëxa, kuanx ka anuax achúshi kini xubu rapasu 'ikë anu unëti atsíankëxa. 19 Usai 'ikëbëtan ka uni aín xanun achúshi ñu pará bitankëxun anun kini a mapuakëxa, mapuxun ka akamanan aín trigo bimi barionkëxa. Usokin 'akë ka uínbi anu ka uni unëaxa kixun 'unániamabi atun ishi 'unánkëxa.

20 Usokin 'anbi ka Absalónnën xukëx atu nuibiani kuankë suntárukamax anu bëbakin xubu 'ibun xanu a ñukákëxa:

—¿Ënu kara Ahimaas 'imainun Jonatán ukëma 'ik?

—Kixuan ñukákëxunbi ka báko kikiani kuania kana isan —kixun xanun kakëxa.

Usa 'ain ka Absalónnën suntárukama barikinbi 'akasmabiani amiribishi Jerusalénnu rikiantëkëankëxa.

21 Rikian ka Ahimaas 'imainun Jonatán anua unëkë kini anuax bënëtishi chikíkiani kuanxun 'apu David kakëxa; ënuax bënëtishi min unikamabë kuantankëx kamina Jordán baka sikarakëti kuanti 'ain, Ahitófelnën ka mi isa 'axun rakanun kixun Absalón 'ësëaxa.

22 Usakian kakëx ka David abëa kuankë unikamabëbi kuantankëx bënëtishi a imë́bi Jordán baka sikarakëakëxa. Usai 'ian ka a pëkarakëbë ax baka sikarakëti uni 'aíma 'iakëxa.

23 Usa 'ain ka Ahitófelnëx an kakësa okían Absalónnën 'akëma 'ain, aín burro bibiani anua tsókë ëma anu 'ikë aín xubunu kuankëxa kuanx ka anuax aín aintsikamabë banakin uisai kara atux 'iti 'ikë kixun kakëxa, usakin katankëx sënë́anx abi tëtsëkiax. Ñukë ka anua aín papa ñukë maínkan me anubi maínkankëxa.

24 Absalón Israel unikamabë nuibiani kuani, Jordán baka sikarakëmainun ka David aín unikamabë kuantakëx achúshi ëma upiokin bëararakin kënëkë Mahanaim anu bëbakëxa. 25 Absalónnën ka Amasá axa suntárukaman kushi 'inun anëkë 'iakëxa, Joab kakë uni a chikíanan. Amasá ax ka achúshi ismaelita uni Itrá aín bakë bëchikë 'iakëxa, ax ka Abigail Joab aín titan xukën abë birakakë 'iakëxa, Abigail ax ka Nahasnën xanu tuá 'imainun Seruiánën chirabakë xanu 'iakëxa.

26 Usa 'ain ka kuantankëx Absalón aín suntárukamabë Galaad kakë me anu pain 'iakëxa, 27 usaía David atun ëma Mahanain kakë anu bëbakë ka, Sobí kakë uni Nahasnën bakë bëchikë axa Amón kakë menua 'ikë ëma Rabá anu tsókë uni an pain David kuëënkin biakëxa; bitsia ka Amielnën bakë bëchikë Maquir Lodebar kakë ëmanua 'ikë anribi biakëxa; bitsia ka Bazilai kakë uni axa Galaad menua 'ikë ëma Roguelim anu 'ikë uni akamabëtan David biakëxa. 28 Bitankëxun ka anua nukúkë David anúan 'uxi rakúti chupa 'inánan anun mëchukati 'umpax anu nanti a 'inánan kënti me 'akë kama a 'inánan trigo bimi cebada harina putuakë 'imainun ñu bëru tutush okë uvas ëskakë a 'imainun purutusa ñu bimi akamaribi 'inánkankëxa, 29 'inánan ka buna rëpa vaca xuma sëruakin 'anan, ë́skakin oveja xuma 'akë akama abëa kuankë unikamabëtan pinun kixun 'inánkëxa; usakin ka anu uni 'ikëma menuax ai ka panani 'itsaira nitsi atsanxa kixun sinánkin 'akëxa.