—'Ëxribi karana 'akanani kuanti 'ain.

3 Ësokin kakëxunbi ka suntárukaman kakëxa:

—Usama ka min kamina nu nuibiantima 'ain mix 'apu 'aish kamina usai 'itima 'ain, axa numi nishkë unikaman nun raíri 'axunbi ka kana atu a kixun sinántima 'ikën 'ianan ka kananuna abámikin atu 'a kiaxbi kitima 'ikën, usa 'ain kamina mix nun 'apu 'aish diez mil suntárubë sënë́nsa 'ain. Usa 'ain kamina mix 'apu 'aish ëmanubi bërutankëxun anun 'akanantikama nu xuxunti 'ain.

4 Ësokin kakëxun ka —uisakin 'axúnti kaina kuëëni usakinbi kana mitsu 'axúnti 'ai —kixun Davidtan kakëxa, usakin kakëxun ka basi basi kikëma 'aínshi anun ëmanu atsínti xëkuë anu nikianxun mil suntáru anuaxbia cien suntárukamaribi sënë́nbi chikitia isakëxa.

5 Usakin 'anan ka 'apu Davidnën Joab Abisai 'imainun Itai akama usakian asérabi a nuibakin bëná uni Absalón a bërúanun kixun, kaia kamabi suntárunën kushikaman kuakë 'iakëxa.

6 Usakin 'axuan xukëx ka suntárukama anuaxa Israelnën suntárukamabë 'akanantinu kuankëxa. Anuax kuanx ka niñu Efraínën rëbúnkinën me amia bari kuabúkë anuax 'akanankëxa, 7 Usai atubë 'akanankin ka Davidtan suntárukaman kupitanuma Israelnën suntárukama 'akëxa. 'Akëx ka a nëtën 'aisamaira uni veinte mil suntáru bamakëxa. 8 Usai anuax 'akanankin ka kamabi me abi tsitsirukankëxa. 'Imainun ka raíri Israelnën suntárukamax amami amami kuankian axa ami nishkë unikaman aín paka pian 'akëx 'iananbi kuanx kuanx ninubi bamakëxa. 9 Usai 'akanankëbë aín caballonu 'iruax anu tsótax kuankinbi ka Absalónnën Davidtan suntárukama raíribë mëranankëxa. Mëranani ka anuaxbi kuainakëkian amotan kuankëxa, kuaníbi ka aín caballonëx i pëñanakëkë au atsínkiankëxa, usai 'ikëbë ka Absalón i pëñami, aín bu tëkërëkirukëbë anu bëntamëti bërúmainun ka aín caballo axëshi 'uri abati rëkuë́nkianx nirakëakëxa. 10 Usai 'ikë isiani kuanxun ka Israel suntárunën Joab anu kuanxun kakëxa:

—'Ën kana i pëñanua bë́ëkë Absalón isëtsinin. 11 Kakëxun ka Joadnën kakëxa:

—¿Uisa 'ixun kaina usai manan bamax bëntamëkë iskinbi anuashi 'akëma 'ain? Minmi mërakin anuabi 'abëtsinkë 'ikë kana 'ën mi 'itsaira kuëënkin mapai rabë́ kuríki manë 'akë 'inánan anua suntárunën kushikama tsitëkërë kikë cintura ami 'inántsian. 12 Ësakin kakëxun ka an isëtsinkë suntárunën Joab kakëxa:

—'Ë mi mil kuríki manë 'akë 'inánkëxunbi kana 'ën 'apun bëchikë usakinra 'atima 'ain; nun kananuna 'apux mikëñunbi Abisai, 'imainun Itai kai ësai kia kuakën uni bëna Absalón a kamina bërúankin uisabi otima 'ain. 13 Usakin 'ën 'akëbi ka 'apun uin kara 'axa kixun barimitankëxun ñankabi 'ë rëtëmitsianxa an 'unántisama ñu ka 'aimama 'ikën. Min kamina 'ë 'aia 'axuma ka 'at kixun 'ënun rabanan në́kin 'apu kakëma 'itsían. 14 —Ësakin kakëxun ka usama ka mibë kana ñankabi ësai banai —kixun Joadnën kakëxa; kakin rabë́ 'imainun achúshi pia chukúma anun mëkënan tuíanx 'akánanti 'akë a bibiani anu kuanxun ka i pëñanu bë́ëkë mërakin anun Joabnën bamakëma 'ikëbi shitúkakin Absalón tarókëxa. 15 Usakin 'aia ka aín suntárukama mapai rabë́ Joadnën uankë akaman tënankin Absalón 'akankëxa. 16 Usakin 'amixun ka Joadnën aín suntárunën aín manë banañu banonun 'amiakëxa, a kuatia an Israelnën suntárukama 'anuxun nuibiankë a kamaxa rikuatsinun kixun usakin ka Joabnën atu ënun ëmiakëxa. 17 Usa 'ain ka suntárukama raírinën Absalón ñukë a buánxun atúnbi ninua 'ikë kini chaiira anu nipakankëxa, anu nipaxun ka a manámi 'aisamaira chaiorukin aín chabukëñunbi maxá bukunruakëxa. Usakin 'amainun ka Israelnën suntáru bamakëmakama atux nuibianxuan ënkëx abati rikianx atun xubunu rikiankëxa.

18 Usa 'ain ka tsókë pain 'ixun Absalónnën anubia 'inun chaiorukin maxá ñu tankin 'amia 'iakëxa, ax ka 'apukaman me kakë anubi 'iakëxa, usokin 'atankëxun ka aín anënbia anëa 'iakëxa, 'aínbi ka ax ñukëbëtan an bërúanti aín bakë bëchikëbi achúshi 'aíma 'iakëxa, usa 'ain ka aín anën 'amikë 'iakëxa. Usakin ain anën 'a 'ikë ka ax ka Absalónnëa maxá uni tankin 'amia 'ikë kixun unikaman 'unánkëxa.

19 Usakin 'akë 'ain ka Ahimaas Sadocnën bakë bëchikë an Joab kakëxa:

—'Ën kana mi kain abákiani kuanxun kamina 'ën 'apu Diosan ka ax kushiira 'ixun upíokin ñu 'akin axa numi nishkë, unikamanua nu 'akianxa kixun katánun 'ë xuti 'ai kixun kakëxa. 20 Kakëxunbi ka Joadnën kakëxa:

—Mix kamina an 'apu bërí anu kuanxun usai ka ñu 'iaxa kixun kai kuanti uni ama 'ain. Usa 'ain kamina bëríma bëtsi nëtën kuni kati 'ain, aín bakë bëchikë ka bamaxa usa 'ain. 21 Usokin a xuisama tankin kaxunbi ka Joadnën bëtsi uni etíope suntáru achúshi a kakëxa:

—Anu kuanxun kamina 'apu ami iskë ñukama ñuixunkin kai kuanti 'ain. Usakian kakëx Joadmi aín chitëxkënu sënën tëtúbuti 'ikiani ka etíope uni ax abákiani kuani chikíakëxa. 22 Usai kuankëbëtan ka Ahimaasnën amiribishi Joab katëkëankëxa:

—'Ëxribi kana etíope uni kuankëbë a nuibiani abákiani a kaxú kuainsatanin. Ësakin kakëxun ka Joabnën katëkëankëxa:

—¿Añu 'ai kaina mixribi kuainsatani 'ën bakë bëchikë mix kaina bana ñuixuntankëxun kananxun bikësa okin ñu binuxmabi kuanti 'ain?

23 Ësakin kakëxunbi ka —Usama ka kana abákiani kuanti 'ai —kixun Ahimaasnën kakëxa.

Kakëxun ka —¡abákiani ka kuantan! —Kixun Joabnën kakëxa. Ësakin kakëx abákiani kuani baitsin patsinkiani Jordán kakë baka 'ikë me sapan abu kuanx anpan etíopia uni bëpë́skabiani kuanx rëkuë́ankëxa. 24 Usaia kuanmainun ka David anun ëmanu 'ukë mëu atsínkianti xëkuë rabë́ mëu anu tsókë 'iakëxa, usai anu tsótan ka, an bërúanti nankë uni ax ami xëputi 'akë manámi anu bërúain kuarukë 'iakëxa. Anuxun bërúain tsóxun iskëxbi ka uni achúshi abákuatsini ëmami kikuatsini aia isakëxa, 25 usai aia iskin ka 'apu munuma kushin banakin kakëxa. Kakëx ka 'apu kiakëxa:

—Usa kuatsinia ukë ax ka bana upí bëia ukë 'iti 'ikën, ësaia ax kuania isi kimainun ka uni ukë ax 'urama kuatsini uakëxa, 26 usaía ukëbëtanbi ka an manánxun bërúankë bëtsi uniribi abákiani kuania iskin an xëkuënu nixun bërúankë uni kuënkë́nkin kakëxa:

—¡Bëtsi uniribi ka abákuatsini aia! —Usakin kaia kuakin ka anribi sapi ka 'ë upí bana bëxuni ukë 'ikë —kixun 'apun kakëxa.

27 Ësai kia kuati ka an xëkuë bërúankë uni ax kiakëxa:

—Ax paian rëkuë́n kuatsini ukë ax ka Aimaas Sadocnën bakë bëchikë ax abákësa kuatsini aia.

—Kia ka ax ka achúshi uni upí sinánñu 'ikë usa 'ixun ka 'ë upí bana bëxuni uti 'ikë —kixun sinánkin ka 'apun kakëxa.

28 Usa 'ain ka anu nukúkin a 'urama oi ami ñanati memi bëtiki 'ikin Ahimaasnën 'apu uisa kaina 'ai kixun pain kakëxa:

—Min 'Ibu Dios ka upíokin rabikë 'iti 'ikën ax min Dios 'ixun ka. Axa mimi nishkë unikama min suntárukaman 'anun 'amiaxa.

29 Kixuan kakëxun ka. —¿Bëná uni Absalón ax kara asábi 'it? —Kixun 'apun ñukákëxa. Ñukákëxun ka Ahimaasnën ësokin kakëxa:

—'Ën kana an mi ñu mëëxunkë Joab an xukëxun suntárukama 'itsaira sharati kia kuan, 'aínbi kana uisai 'i kara usai 'ikania kixun iskëma 'ai kixun ka këmëkin kakëxa. 30 Usa 'ain ka 'apun usaía 'inun kixun kakëxa. Amo nirakëti kamina anubi niti 'ain. Usakian kakëx ka Ahimaas Sadocnën bakë bëchikë ax usaibi 'iakëxa.

31 Usakin kakëbë axribi bëbakuatsini ukin ka etíope unin 'apu kakëxa:

—Mixmi 'apu 'ikë kana uisai kara min suntárukama 'iaxa a bana mi bëxuni aín: mix 'apu 'aia mibë 'akanankatsi kiax ax 'ikë unikama atu ka 'axa kixun ka kakëxa.

32 Usakian kakëxun ka 'apun etíope uni a ñukákin kakëxa:

—Anu kara uni bëna Absalón ax 'it. ¿Asábi kat? Ësakian ñukákëxun ka etíope unin kakëxa:

—'Ëx kana axa mix 'apu 'aínbi mibë 'akanankatsi 'ikë unikama Diosan, atu 'atimokin uni bëna Absalón ax 'ikësaribiti bamanun atu 'atima oti kuëënin. 33 Ësokin kakëx ka 'apu ratuakëxa, ratúkiani ka xubu manámi kuaruax xëkuë manámi anua 'uxkë anu atsíanx anuax iankëxa. Usai masá nuituti ini kuain bëkini nitsi ka kiakëxa: “¡'Ën bakë bëchikë Absalón! ¡'Ën bakë bëchikë Absalón! ¡'Ën bakë bëchikë Absalónnëxma 'ëx pain kana 'ën bakë bëchikë Absalón 'inun 'ëx pain ira bamati 'ian! ¡'Ën bakë bëchikë 'ibu Absalón ax ka 'ën bakë bëchikë 'ikën!” (Ësai ki ka iankëxa.)