19
1-2 Usaia 'apu David aín bëchikë Absalón rëtëkankë ñuikania kuati ka anun a banan 'itsaira masá sinani nitë́xëti inia, ka unikaman kuakëxa kuabiani anu rikianxun ka raíri unikaman Joab kakankëxa. Usakin 'akë 'ain ka, a nëtën 'akanani kuanxa Absalón ñukë 'ain, amia nishkë unikama kupitanuma 'abëtsini ukëbë kuëënti nëtë 'aínbi bamakë a sinani masá nuituti Davidtan suntárukamaxribi nitë́xëakëxa. 3 Usai 'ikiani kuani ka Davidtan suntárukamax Mahanain ami kikiani kuani atun katë́bëshi kuantankëx ëma 'ukëmëu atsíankëxa: Atsínkiani kuani ka 'akanani rikianxbi axa ami nishkë unikaman kupitanuma 'akëx ukësa 'inun katë́kë tibu 'aish ñuitsima rua kuanx atsínkankëxa. 4 Usa 'ain ka chupan mapuax 'aisamaira masá sinani nitë́xëti, uínbi upí sinánmikin kaisama 'itánun 'apu David munuma banai rarumakëxa: Rarumati ka aín bakë bëchikënën anë ñui kiakëxa. “¡'Ën bakë bëchikë, 'ibu Absalón! ¡'Ën bakë bëchikë 'ibu Absalón!”5 Usaia 'ia ka Joabnën anua 'ikë 'apun xubunu kuanxun 'apu David kakëxa:
—Bërí kamina mix 'apu 'ixun kamabi suntárunën kushikama 'imainun min unikamaribi axa mimi kuaikësamaira okin katëmian, usokin 'akin kamina bërí min bëchikë xanukama 'anan bëbukama 'imainun min xanukama, 'ianan an mi ñu mëëxunkë xanukamaribi ië́mian. 6 Bërí kamina mix 'apu 'ixunbi min suntárunën kushikama nuibakinma axa mimi nishkë unikama nuibati 'ai kixun 'unánan, bërí 'apukama këñunbi kamabi nuibatin, 'imainun kamina uikaman kara mi nuibatia atu 'atima 'ain, uikaman kara mi nuibakinma 'atimoia atubëribi 'akananima nuibananin. Bërí kana 'unanin min sinánkëx sapi ka nukamax bamamainun min bëchikë Absalón ax bamatima 'iaxa. 7 Usa 'ain kamina bërí ëmánxun upíokin min suntárukama kuëëntanun kati 'ain, usa 'aínbi kana manukimami sinánun Diosan kuamainunbi 'apu 'ikë mi kain, ënë imë́bi ka uisa min unikama achúshibi ënu mi 'akini bërútima 'ikën. Ësakin min kakëma 'aia min unikamax kuankëbë kamina bëráma bëná 'aíshmi 'iásamaira tëmërati 'ain.
8 Ësokian kakëx ka 'apu David nirukiani kuantankëx anun ëmanu atsínti xëkuënu tsóbuakëxa. Usai anu tsókë kuabiani kuanx ka anua 'apu David tsókë xëkuë a rapasu aín suntárukamax nirakëkankëxa. Usai anu nirakëkin ka kamaxunbi 'apu kakankëxa.
David Jerusalénnu kuantëkëan ñuikë bana
Usai 'imainun ka kamabi Israel suntárukamax atun xubunu abákankë 'iakëxa. 9 Usa 'ain ka kamabi ñakánu 'ikë Israel unikama atux kuëbikanani kikankëxa: “'Apu David an ka numi nishkia filisteo unikaman 'atimoiabi nu 'akinkin ië́miakëxa; usa 'aínbi ka Absalónnëxa ami nishkëx ënë menuax chikíakëxa. 10 Absalón nun 'apu 'itinu anëkë ax ka 'akanankënuax bamaxa. ¿Usa 'ain karanuna ui kainkin David nun 'apun 'inun 'imitima 'ain?”
11 Ësai Israel unikama kikankë ënë bana ka ñuikania aín xubunuxunbi Davidtan kuakëxa. Usa 'ain ka uni sacerdote Sadoc 'imainun Abiatar ësokin atu katánun kixun kakëxa: “Mitsun kamina anu kuanxun Judánu 'ikë unikama aín kushikama abë banakin ñukáti 'ain, uisa kupí kara 'ë 'apu 'imitisa tanibi 'itsaira basia kixun kamina atu ñukati 'ain; 12 ñukákin kamina ësokinribi kati 'ain, atux kara 'ëx atun 'apu 'iti kuëënia 'ëx kana atun 'aintsi 'ibu 'ain kixun kamina atu kati 'ain.” 13 Kanan ka Amasá aribi ësokin katánun kakëxa: “Mix kamina 'ën 'aintsi 'Ibu 'ain, usa 'aish kamina bërí 'ën suntárukaman kushi 'iti 'ain, mix 'imainun ka Joab ax chikíkë 'iti 'ikë kixun ka kamiakëxa. 'Ën mi kakësokin 'aiama ka Diosan uisakin kara 'aisa tania usakin 'ë 'atimoti 'ikën.”
14 Ësokin kamikin ka Judánu 'ikë unikama kuëënia achúshi unin sinánkësa okinshi sinania kuëëntanun kamiakëxa, kamikëx ka kamabi uni asábi ka nun 'apu 'inux ka aín suntárunën kushikamabëbi uti 'ikë kixun atúnribi kamiakëxa.
15 Usakin kamikëx kuanxua kakëx ka 'apu amiribishi kuantëkënkin abëa 'ikë unikamabë kuani Jordán kakë bakanu bëbai kuankëxa. Usai kuanmainun ka Judánu 'ikë unikama atúxribi Guigal ëma anuxun aia bianan, Jordán kakë baka sikatia 'akini kuankankëxa. 16 Kuankëbë ka Simí Gueránën bakë bëchikë Benjamínën rëbúnki Bahurim anu 'ikë axribi bënë́kiani Judánu 'ikë unikama kuankëbë anribi 'apu David aia bitsi kuankëxa. 17 Kuankëbë ka Simí a nuibiani Benjamínën rëbúnki mil uni abë kuankëxa. Kuankëbë ka Sibá an ñu mëëxunkë Saúlnën aintsi axribi aín quince bakë bëchikëkama 'imainun an ñu mëëxunkë veinte unikama abë kuankëxa, kuanx ka 'apu David uisa 'aímabi atux pain Jordán kakë baka 'ikë anu bëbakëxa, 18 bëbai ka baka sikakiani Davidtan aintsikama baka sikatia 'akini kuankëxa, usakin 'ax isa abë upí 'iti 'ikë kixun sinánbiani kuankëxa, Kuankëbëa David Jordán kakë baka shitánux 'ikëbëbi ka a bëtánain ami ñanati 'ikin, 19 Simín kakëxa:
—'Ën kana mi ësokin kain, 'ë kamina uisabi otima 'ain, 'ën kana mi 'atima banan kakën an mi ñu mëëxunti uni 'ixunbi kana a nëtën mi Jerusalénnuax chikíkiani kuankin mi ká bana a kamina sinántima 'ain. 'Imainun kamina 'ë istisama tani 'ëmi nishtima 'ain, 20 'ënbi kana 'atimokin kana usakin ñu 'akë kixun 'unani, usa 'ain ka kamabi Josénën rëbúnkikama bërí kana 'ëx irapain mix 'apu 'ikë aia mi bitsi uan. 21 Ësokin kaia kuati ka Abisai Sarvian tuá ax kiakëxa:
—¿Uisa 'aish kara Simí ax 'atimokin 'ichakin Diosan kaískë 'ikëbi 'apu ká 'aish bamakë 'itima 'ik? 22 Kiabi ka Davidtan kakëxa:
—¡Ënë ñux ka mitsun isti ñuma 'ikën, Seruiánën bakë tuákama, 'ëx kana usakinmi 'aisa tankë a kuëëniman! ¿Uisa 'ixun kaina mitsun 'ën 'akë ñu isti 'ain? Bërí kana upíokin 'unanin 'ëx kana Israel unikaman 'apu 'ain, usa 'ain ka israel uni achúshibi bërí nëtën bamatima 'ikën. 23 Katankëx ami kikin ka Simí, mi kana asérabi uisabi otima 'ai kixun kakëxa.
24 Usakin 'axun ka Mefi-bóset kakë uni Saúlnën xuta aribi aia biakëxa. A nëtëan 'apu David Jerusalénnuax abati kuankë a nëtëkaman ka nitsibi uisaibi 'ikëma asábi utëkëni, aín taë chukaima 'ianan nashimabi 'iakëxa, usai 'ianan ka aín kuëni kuëtërëkianan, ain chupabi chukaxun pañuima David 'ikë ñu a sinanima 'iakëxa. 25 Usa 'ain ka Jerusalénnuax a bitsi kuankë 'apun ñukákëxa:
—Mefi-bóset, ¿Uisakatsi kaina 'ëbë kuankëma 'ain?
26 Kixuan kakëxun ka unin kakëxa:
—'Ën ñu mëmikë unin ka 'ë paránxa. 'Ëx kana 'ën niti bëtsikë uni 'ain, usa 'ixun kana 'ëa burro achúshi anu 'irukiani mibë kuani kuanun 'ë tëkërëkaxunu kan. 27 'Aínbi ka usakin 'axumabi, mi paránkin 'ëx isana 'apu 'isatani kixun mi kakëxa. Usa 'aínbi kamina mix 'apu 'aish Diosan ángelsa 'ixun, uisakin kaina 'aisa tani usakin 'ati 'ain. 28 'Ën aintsi 'ibukamaxa min 'aisa 'aínbi kamina atu 'akima, an ñu mëëxunkë ënë min xubunuxuinsa pinun kixun kakën. ¿Usa 'ain karana 'ën añu ñu mi ñukáti 'ain? 29 Kakëxun ka 'apun kakëxa:
—Asabi ka usa 'ain kamina 'itsa banatima 'ain. 'Ën kana mi 'imainun Sibá bërámabi kan me a kamina bëtsin amoküa bimainun amoküa biti 'ain kixun. 30 Kakëxunbi ka Mefi-bósetnën kakëxa:
—An ka 'ën xuta Saúlnën me 'ia a kamabi biti 'ikën. 'Aínbi ka 'ën iskëx mixmi uisaibi 'ima upí utëkëanx min 'apun xubunu amiribishi 'apu 'itëkëni ukë ax kuni asábi 'ikën.
31 'Imainun ka Barzilai Galaadnu tsókë ax Roguelim kakë ëma anuax uxun 'apu Jordán kakë baka sikáti 'akintankëxun anuxun kuantanun kaxun xuti uaxa. 32 Ax ka kaniakëkë 'aish, ochenta baritia ñu 'iakëxa, an ka 'apu David Mahanaim, kakë ëma anu tsotia kamabi aín piti 'akinkin 'inánkëxa, usa 'aish ka ax ñu ñuira uni 'iakëxa. 33 Usa 'ain ka 'apu Davidtan Barzilai kakëxa:
—'Ëbë kamina Jerusalénnu kuanti 'ain, anuxun kana 'ën mi 'akianan bërúanti 'ain.
34 'Aínbi ka Barzilainën kakëxa:
—'Ëx kana 'itsama baritiashi tsóti 'ain, usa 'ain kana mibë Jerusalénnu kuantima 'ain, 35 'ëx kana bërí ochenta baritiañu 'ain; usa 'ixun kana pianan xëakin uisa kara 'ain nëish 'ikë tanan, kana ax ka nëish 'ikë kianan ax ka nëishma 'ikë kisamabi 'ain; 'imainun kana axa kantakë unikama 'imainun axa kantakë xanukama kantaia kuaisamabi 'ain, usa 'ain kana 'ë bëruain mix atsantima kupí mibë kuantima 'ain. 36 Usa 'ain kana Jordán baka shítatishi mibë kuanti 'ain, ¿usa 'aínbi kaina mix 'apu 'ixun min ñu 'inainshikatsi kixun 'ë kain? 37 Usa 'ain kana 'ën mi kain, mix 'apu 'ixun kamina 'ën ëmanubi ñui kuantanun 'ë xuti 'ain, anuax ñuia ka 'ën papakama anu maían anubi 'ë mainkanti 'ikën. 'Aínbi ka 'apu 'ikë an mi ñu mëëxunti bëtsi uni ënu 'ikën: ax ka 'ën bëchikë Quimham 'ikën, usa 'ain kamina mix 'apu 'ixun uanxun 'ë min 'axuansaribi okin mix kuëënkësabi okin ñu min a 'axúnun 'amiti 'ain. 38 Kakëxun ka 'apun kakëxa:
—'Ëbë ka Quimham ax kuanti 'ikën, 'ën kana minmi 'ë usakin 'axúnun kakësabiokin a 'axúnti 'ain. 'Axuanan kana a minmi 'ë ñukákë ñukama a 'inánti 'ain.
39 Usakin kamainun ka kamabi unikama Jordán kakë baka sikarakëakëxa. Sikákëbëtan ka 'apun Barzilai kana kuantëkëni kixun kakin achúshi okin bëtsuku kakëxa. Usokin 'axun kuantanun ëbiani ka Barzilai anuaxa ukë 'ain xubunubi kuantëkëankëxa. 40 Kuantamainun ka 'apu David Guigal kakë anu Quimham a 'imainun Judánu 'ikë aín suntárukamabë kuani, Israel unikaman suntárukama raíribë kuankëxa.
41 Kuanxa anu 'ain ka kamabi Israel unikaman a isi kuanxun 'apu kakankëxa:
—¿Uisai kara nun aintsi Judánu 'ikë unikamax 'apu 'ikë mi 'ibuaxun bërúanan min aintsi 'ibukamakëñunbi atun suntáru rinbianxun Jordán kakë baka sikatia mi 'akini kuankë ax 'iti 'ik? 42 Ësokin kaiabi ka Judánu 'ikë unikama atun Israel unikama kakëxa:
—'Apux ka nun aintsi 'ibu 'ikën. Usa 'ain ka a kupínnu mitsubë nishananti ñu 'aíma 'ikën. ¿Nukaman karanuna 'apun piti bixun pian, 'imainun karanuna 'ain ñu nunan 'inun bian?
43 Kia ka Israel unikaman atu kakëxa:
—Nukamax kananuna mapai rabë́ ñakánuax ukë a 'ain. 'Aínbi kamina mitsux achúshi ñakáratsushi 'ain, usa 'ain kananuna nukamax mitsun aintsi 'ibubi 'ain. ¿Usa 'aínbi karamina mitsux nukamami nishin? ¿Mitsun kaina nukamanu nun 'apu ka nunubi utëkënti 'ikë kiax kikë a sinaniman? Usakian atun kakëxbi ka Judánu 'ikë unikama atuxira 'atimati banai Israel unikama 'ikësamairai nishi banai kikankëxa.