David unikama 'atankëx Dios rabi kanta ñuikë bana
(Sal 18)
22
Ësai ka David Dios rabi ami kantakëxa, Saúl 'imainun axa ami nishkë unikaman 'ati 'ikëbia Diosan ië́mikë 'aish ka.2 Ësai kiakëxa: Diosan ka 'ë bërúankin 'akianxa, ax ka ami 'ëx katamëkë a 'ikën, usa 'ixun ka ax 'ëmi nishkë unikaman 'aisa taniabi 'ë 'akianxa,
3 mix kamina 'ën Dios 'ain, usa 'aish kamina ami 'ëx katamëkë 'aish mapara chaiira usaribi 'ain, 'imainun kamina axa 'ëmi nishkë unikaman 'ati rabanan ami 'ëx katamëkë manë pará usaribi 'ain, usa 'ixun kamina mix kushiira 'ixun 'ë 'iëmiakën 'imainun kamina ñu chaiirasa 'ëx ami unëtisabi 'ain, 'ianan kamina mix ami 'ëx katamëkë 'ain, usa 'ixun kamina mix chaiira 'ixun 'ë 'iëmiakën ax 'ëmi nishkë unikaman 'ati 'ikëbi. ¡Uni axa 'akanantishi sinánkë unikaman 'aisataniabi kamina 'ë ië́miakën!
4 Mix Dios 'ikë mishi rabiti ka asábi 'ikën: ax 'ëmi nishkë unikaman 'aisatankëxun min 'akinun ñukákëxun kamina asérabi 'ë 'akinkin ië́mian.
5 Axa 'ëmi nishkë unikaman 'anuxun bëarabuinkëxun kana uníxa parúmpapa bëchunkin aín bëchunan bikëxun unin kana bamai kixun sinánkësaribi okin sinani atumi rakuëakën; rakuë́kin kana baka kushin ka 'ë bërí bakamioia kixun unin sinánkësaribi okin sinánkën.
6 Unian ñuina rënuxun nëakësa usaribi tani kana uisax karana bamatinuax ië́ti 'ai kixun sinánkën; ¡'ianan kana unían ñuina anu pakëminuxun ñu nanxunkë usoxunribia axa 'ëmi nishkë unikaman biti sinani rakuëakën!
7 Usai rakuë́ti bënëti atsanxun kana Dios 'ë 'akinun kixun ñukákën, usakin 'akëxun ka Diosan naínuxunbi 'ën bana kuakin 'akiankëxa 'imainun ka; ¡munuma banakin ñukákëxun 'ën bana kuakëxa!
8 Usa 'ain ka ax Dios kushiira 'ixun me kushiira shaíkinun 'imiakëxa: 'imikëbë ka aín tapúmiax naíkamë 'ëo shaíkikëbë aín bashikamaxribi aín tapúmiaxbi shaíkiakëxa; usakin ka Dios ax kushiira 'ixun shaíkinun 'imiakëxa.
9 Aín rëkinuax ka kuinsa 'inun chikíakëxa, aín kuëbitan ka an ñu këñukin xaroti tsi ëxkusa usaribi chikíakëxa; ¡usai 'ika aín kuëbínuax tsísa ax xunkakëx 'ikësai abisi tsuákiakëxa!
10 An ka naíkamë 'ëo panarabënun 'imiakëxa. ¡Usai 'ikëbë ka kuin këxtuira 'uí 'ibunuxa túnania 'ikësa a mëu ubúakëxa!
11 Usai 'ika achúshi ángel pëchiñu anu papiax bënëtishi 'ë 'akinux uakëxa; usai ka achúshi 'isakaxa aín pëchi ñashi 'aish suñun bënëtishi nuankiani kuankësa usai 'inun 'iakëxa.
12 Mix kamina 'uñe 'ibunuxa kuin timë́ti tunankuatsinkësa mëu 'iakën, usai 'ika anu 'itia chupa këxtú xubusa okin 'akë usa mëu 'iankën.
13 Anua ax 'ikë anuaxa kaná kamë 'ëo banaruaia 'ikësai 'ikëbë ka naínuax 'aisamaira 'uñe 'ibúkësari 'i tsi ëxku rërëkibuakëxa.
14 Usai 'ikëbëtan ka naínuaxa kanákamë 'ëo banakësari munuma banakin aín bana kuanun Diosan nu kuamiakëxa:
15 an ka unían aín pia ñu 'akin nikësokinshi 'akin kaná banakësa 'itánun banakin axa 'ëmi nishkë unikama ratuti abátanun 'imiakëxa.
16 Aín banáinshi ka Diosan xunkakësa okinshi axa 'ëmi nishkë unikama 'aisatankëxa, min kamina parúmpapa 'ukëmëu 'ikë ñukama 'imainun uinu kara naí sënë́ankëxa, axbia istisa 'itánun 'imiakën, axa usai banakëbëishi 'ianan ka aín kushia usai 'inun 'imiakëxa.
17 Diosan ka 'ë 'akinkin naínuxunbi aín mëkënan birukësa okin anua bitima parúmpapa nëbë́tsinua 'ë ië́miakëxa.
18 An ka axa 'ëmi nishkë uni kushiirabu an 'ati 'ikëbi 'ë ië́miakëxa, atun ka 'ë istisama tankëxa usa 'aish ka 'ësama kushiirabu 'iakëxa.
19 Atux ka 'ëbë 'akanankëxa 'ëx 'aisama ñu inuti tëmërakëbëbi. 'Aínbi ka Diosan usakin atu 'aiabi 'ë nuibakin 'akiankëxa:
20 an ka 'ë ië́mikin upíokin 'akiankëxa; ¡usa 'ixun ka an 'ë nuibakëxa!
21 Diosan ka 'ë upíokin 'akinkin 'itsaira 'akianxa 'ën kana añu kara an iskëx asábi 'ikë ashi 'an. Usa 'ixun ka unían nun ñu 'inankësa usaribi okin 'ë upíokin ñu 'aia 'akianxa,
22 'ën kana añu 'anun kara 'ë kaia ashi 'axunkin aín bana kuakëmasa 'ixun ñu 'atima 'akin aín bana kikësama okin 'axunkinma kana ¡uínsaranbi 'ën Diosan bana ënkëma 'ain!
23 'Ën kana kamabi aín bana kuënëokama kikësabiokin 'ain; ¡usa 'ain kana uínsaranbi aín bana 'ati manukin ënkëma 'ain!
24 'Ëx kana Diosan kakësa 'oíshi ñu 'atima 'aíma tsóakën; usai 'ikana 'atima ñu 'atimi rakuëakën.
25 Diosan ka 'ë 'itsaira 'akianxa an kakësokinshi añu kara upí 'ikë a 'aia iskin.
26 Dios mix kamina min kikësabiokin ñu 'anan uin kara min kakësabiokin 'aia aribi usabi okin 'akinin, 'imainun kamina uin kara min kakësama okin 'aima aribi 'ásabiokin 'akinin,
27 Dios min kamina uin kara këmëi banakinma mix kikësokin 'aia ashi 'akianan uix kara këmëirai banaia a bëtsiokin nanin.
28 Min kamina axa 'akinsa unikama ashi ië́nun 'akinin, 'aínbi kamina uix kara këruti banaia a unikaman sinan 'unánkin 'aisama min isin.
29 Dios min kamina 'ëx upitax tsóti kuëënun 'imian; 'ën 'Ibu Dios min kamina axa 'ëmi nishkë unikaman 'ati 'ikëbi achúshi tirísa 'ixun 'ë bërúankën.
30 Minmi 'akinkëxun kana axa 'ëmi nishkë unikama 'akin atun ëmanubi bëbarukin anuan atun ëma bëararakë abi rurupakin amia unë́ti 'aíma 'itánun 'axun sinánkasmaia atu këñuti 'ain.
31 'Ën 'Ibu Dios min akë kamabi ñux ka upíira 'ikën; minmi 'ë 'akinkë an ka 'ë kuëëmia, min kamina uix kara mimi katamëtia a unikama upíokin 'akinin suntárunëxa aín manë pará ami katamëkë usaribi 'itánun.
32 ¿Uix kara Diosaribi 'iti 'ik? ¿Anu kara Diosaribi bëtsi dios an nu 'akinti 'ik?
33 Dios ax ka ami 'ëx katamëkë kushiira a 'ikën, usa 'ixun ka an 'ëx 'akánanti 'unainra 'inun 'imiakëxa ax ka 'ëx upitax tsóti kuëënia,
34 an ka bënëtishi abánun 'ë kushi 'inania achúshi chaxux uni isbiani abákësa usaribiti 'inun, 'imianan bashi manan anuaxbi uisaibi 'iaxma 'inun 'ë 'imia,
35 an ka uisai karana 'akánanti 'ai kixun 'ë 'unánmiakëxa, 'imainun ka anun axa 'ëmi nishkë unikama 'anux 'ën kanti xo bëëkai kushiti kushiñu 'inun 'ë 'imiakëxa.
36 “Min kamina axa 'ëmi nishkë unikaman 'ati 'ikëbi bërúankin 'ë 'akiankën; usa 'ixun kamina mix kushiira 'ixun 'ë bërúanti 'ain.
37 Min kamina axa 'ëmi nishkë unikaman anuxun nuikëx anun abáti bai upí 'inun 'imiakën, usokin 'akinkëxma abatibi rashkikuaianx nipakëtia ka axa 'ëmi nishkë unikaman bitankëxun 'ë 'akë 'itsíanxa.
38 Axa 'ëmi nishkë unikama abatia nuibianxun kana atu nukuxun 'akin këñukin 'akën, usokin 'akin kana achirabi kuaintanuma 'akin këñubëtsini 'ën 'ikënubi uakën.
39 ¡Usokin 'akin kana axa 'ëmi nishkë unikama këñukin 'akën! ¡Këñuxun kana tukapaxun buküankën, usokëx ka an 'ë ubiotëkënti uni 'aíma 'iakëxa: usokin kana 'ën taën amákësa okinshi kupitanuma 'akën!
40 Min kamina 'akanania 'ë kushiokën, usokin kamina a unikamaxa 'ëmi rakuë́nun 'imiakën,
41 'imianan kamina axa 'ëmi nishkë unikama abámikin 'anun 'ë 'amiakën. 'Amikëxun kana achirabi nitánuma a unikama këñukin 'akën.
42 'Akëxun ka uin kara 'akinti 'ikë kixun atun bariakëxa; barikëxunbi ka uínbi 'akianma 'ikën, usokëxun ka an 'akinun kixun Dios ñukákankëxa ñukákëxunbi ka 'akianma 'ikën.
43 ¡Usokin kana atu maërakatia me kupúkë tákikësai 'ia nëtë́tanun 'akën, 'akin kana atu këñukin unían anun nikin me tëi amákëxa chë́kikë usai 'itánun 'akën!
44 Min kamina 'ën kaibunëxbia 'ë 'akatsikiax kikëbëtanbi 'ë 'akiankën, min kamina 'ëx Israel unikaman 'apu 'ianan 'ën uínsaranbi 'unánkëma unikaman 'ë ñu mëëxunun 'amiakën.
45 Usa 'ixun ka bëtsi menu tsókë unikaman 'ëx atun 'apu 'ixun 'akinkëxun añu 'anun karana kai usakinbi 'akankëxa,
46 bëtsi menu tsókë unikamax ka 'ëbë 'akánanti sinaxbi amiribishi rakuë́akëxa, usai 'ika uinu kara unëaxa anuaxbi chikíküatsini rakuë́tan bamai 'ëmi katamëti ukankëxa.
47 Dios ax ka chuámarua bërámabi 'iá 'aish, usabi 'ikën usa 'ixun ka an 'ë 'akinia, 'ën Dios ax ka an 'ë bërúanan asérabi 'akinkë a 'ikën.
48 Ax ka Dios axa 'ëmi nishkë unikama 'anun 'ë 'akinkë a 'ikën, 'imainun ka 'ën raíri ëmakaman 'apu 'ixun atu 'akinun 'imiakëxa.
49 An ka axa 'ëmi nishkë unikama bana kuakëma akaman 'akatsiabi ië́mikin 'ë 'akian a 'ikën ¡Dios min kamina an bënë́kinshi 'akánanti sinánkë unikaman 'akatsiabi 'ë 'akiankën!
50 Usa 'ain kana kamabi menu 'ikë unikaman kuamainun min anë rabi ësai kantati 'ain.
51 Min kamina axa 'ëmi nishkë unikama 'itsokin 'anun 'ë 'amiakën, minbi 'apu 'inun 'ë kaisa 'ixun; kamina 'ë nuibakësaribi okin 'ën rëbúnkikamaribi xënibua 'aínbi nuibati 'ain.”