David anuishi sënëni banai kia
23
Ënë ka anuishi sënënia David kanta bana 'ikën:'Ëx kana David Jesé kakë uni aín bakë bëchikë 'ain, aka Diosan uni sinánñuira 'inun 'imiakëxa,
a ka Israel kaman 'apu 'inun aín xuta Jacobnën rabia Dios anbi kaisakëxa,
ax ka Israel kaman Diosmi upiti sinani kantairakë uni 'ikëa Israel kaman 'unánkë a 'ain. Usa 'aish kana ësai banai kin.
2 Ësai 'ëx banakë ax ka 'ënbi sinanx 'ikëma 'ikën ax ka Diosan bëru ñunshin an 'ë sinánmikëx banakë 'ikën, uisai kinun kara 'ë sinánmia usaibi ki kana kantain.
3 Israel kaman Dios ax ka ësai kiaxa:
An Israel kama 'akinkë Dios an ka 'ë ësokin kakëxa:
An unikama aín 'apu 'ixun 'akinti ax ka uisa ñu 'atimabi 'akëma 'iti 'ikën,
usa 'ixun ka Diosan kuëënkësabi okin unikama 'akinti 'ikën,
4 'akinkëx ka pë́karakëma 'aínshi nëtë upíira iskësa usaribi 'ianan,
barin urukin pë́kabëtsinkëbëa naínu kuin 'aíma 'ikë usaribi 'ianan,
'uñe 'ibúkin me chabókëbëa ñu bërukama kookë usaribiti 'iti 'ikën.
5 Usa 'ain ka 'ën rëbúnkikamax Diosanbi bërúankë unibu 'iti 'ikën, an ka ëbëtan achúshi ñu sinántëkëntima okin 'akëxa, anbi ka usokin 'ati sinánkëxa usa 'ixun ka an kikësokinbi 'ati 'ikën. 'Akin ka axa 'ëmi nishkë unikamabë 'akanankin 'ën 'anun 'ë 'amiti 'ikën, 'amianan ka kamabi 'ën 'aisatankë ñukamaribi 'anun 'ë 'amiti 'ikën.
6 'Aínbi ka kamabi unían 'atima ñu 'atishi kuëënkë unikama ax muxañu i usaribi 'ikë anuaxa këñunun amo bukúnkë usaribi a unikamax 'iti 'ikën
usa 'ikë ka unin mëkënan mëëkinmabi isëshikësa usaribi 'iti 'ikën.
7 Usa 'ikë ka muxa a mëkënan mëëkinma anun biti manë xëtokë 'akë anun bixun anuxun xaroti anu timëtankëxun 'aimaia këñutanun xaroti 'ikën.