—Nukamabëtan kamina achúshi ñu mëníoti 'ain, usa 'ain kananuna uisai 'inun kaina nu kai usaibi 'iti aín. 2 Ësokin kakëxun ka Nahas amonita an kakëxa:

—Mitsubëtan kana achúshi ñu mëníoti 'ain, 'aínbi kamina 'ën suntárukaman mitsu achúshi achúshinën bëru mëkeu 'ikë ëchipanun 'amiti aín, usakin 'axun kananuna Israel unikama tëmëramiti 'ain. 3 Usakin kakëxun ka Jabésnu 'ikë 'apukaman kakëxa:

—Nukamina mapai achúshi 'imainun rabë́ nëtë anun kamabi menu tsókë Israel unikama chaniotanun uni xunun 'amiti 'ain kixun kakëxa; usa 'ain kananuna nu 'akini uixi ukëbëtama min kakësabiokin 'ati 'ain.

4 Usokin akama katankëxua xukëx kuanx ka bana chaniotia xukë unikama ax Guilbeá, anua Saúl 'ikë anu bëbakëxa, bëbaxun ka anu 'ikë unikama bana ñuixuankëxa. Usokin a bana ñuixunkëx ka anu 'ikë unikama 'aisamairai nishkankëxa. 5 Usai nishkankëbë ka Saúl ain pastonuax vaca bënë raíri bëi ukinbi usaía inkania iskin ñukákëxa:

—¿Uisai kara unikama 'iax? ¿Uisai 'iax kara kamabi unikama inin? Kia ka Jabésnu 'ikë unikaman kuanxua ñuikë bana a ñuixukin kakëxa. 6 Kakëxun kuakëbëshia Diosan bëru ñunshin anu 'irukëbë ka; 'aisamairai Saúl nishakëxa.

7 Usai nishkin ka vaca bënë rabë́ 'atankëxun tukapaxun, uni raíri an kamabi menu 'ikë Israel kama nami paná 'inantanun xuakëxa. Xukin ka a xukë unikama a kakëxa: Ësokin kana Israel kama axa 'ë 'imainun Samuel 'akanani kuania nuibiankëma ain vaca bënëkama 'ati 'ai kixun katánun kakëxa.” Usakin kamikëxun kuati 'itsaira rakuë́ti ka uixi bërútima Saúl 'imainun Samuelbëtan amia nishkë uni a 'anux timë́ti rikuatsiankëxa. 8 Usa 'ain ka Saúlnën aín unikama tupunkin, Bézec 'ikë anu ka trescientos mil Israel 'imainun treinta mil Judánu 'ikë unikama timë́axa kixun kakëxa.

9 Katankëxun ka axa bana chanioi Jabésnuax kuanx bëbakë unikama an ësokin kakëxa:

—Jabésnu 'ikë unikama kamina kai kuanti 'ain, imë́ishi bari xamarukëbëtan kananuna atu ië́miti aín. Ësokin Saúlnën kakëx kuantëkëxua a unikaman ñuixunkëxun ka Jabésnu tsókë unikaman, 'itsaira kuëënkin. 10 Nahas ësokin kakankëxa:

—Imë́ishi kananuna nukamax minu 'inámëti 'ain, usa aín kamina min uisakin karamina nu 'aisatani usakin nukama 'ati 'ain.

11 Usokin 'akë a pëkarakëbëtan ka Saúlnën ain suntárukama rabë́ 'imainun achúshi okin amo sëtënakëxa, usakin 'axun ka pëkarakëma 'aínshi abë 'akanani ukë bëtsi unikama bëararatanun xuakëxa, xukëxun bëaraxun ka amonita suntárukama bari xamarutamainun 'aisamaira okin kupitanuma 'akëxa. Usokin 'akëx ka axa bamakëmakama ax uinu 'ikë uníxbi rabëtax abátima achúshi achúshi unix anua 'ikë anuax unë́kiani abati amami amami kuankëxa.

12 Usakin 'an ka a ëmanu 'ikë uni raírinën Samuel kakëxa:

—¿Uikamax kara Saúlnëx ka nun 'apu 'iti 'ikë kixun sinántisama tanx? A unikama kamina nun 'anun nu 'inánti 'ain kixun ka kakëxa. 13 'Aínbi ka Saúlnën ësokin atu kakëxa: —Ënë nëtën ka uixi bamatima 'ikën, Nukën 'Ibun ka Israel kama ië́mikin 'akianxa usa 'ain. 14 Kakëbëtan ka Samuelnën kamabi unikama kakëxa:

—Guilgalnu kananuna Saúl 'itabatia 'apu 'inun atsinmi kuanti aín.

15 Usa 'ain ka kamabi uni Gilganu kuankëxa, anuxun ka Nukën 'Ibun ismainunbi ax ka 'apu 'ia kixun timë́kamë 'ëoxun Saúl anëakëxa. Usakin anëtankëxun ka nuibanankin ñuina rëxun xaronan pi 'itsaira israel unikama Saúlbëbi kuëënkankëxa.