—Mitsun kamina isin añu 'axúnun kaina 'ë kai a kana mitsu 'axuan, 'ianan kana achúshi 'apu anëxunun kia mitsu anëxuan. 2 Ënu ka 'apu an mitsu bërí 'akinti anëkë a 'ikën. Bëná 'aíshbi mitsun 'apu 'ia 'ixun kana bërí nëtënbi mitsu 'akinin. Usa 'ain kana bërí kaniakëkë 'aish 'itsaira 'ën bu uxua 'irua, 'imainun kamina 'ën bakë bëchikëkamaribi mitsubë tsotia uisa uni kara kixun 'unánkan, 3 ënu kana bërí mitsubë 'ain: Usa 'ain kamina uisai karana 'ia 'ë kakanti 'ain, bëtsin 'arakakë vaca 'anan karana aín burro 'ënamabi mëkamaxun 'ibuanan, karana ami kuaikin 'ën kuëënkësa okin an a unikaman ka bëríbi Nukën 'Ibun ismainun kanan anbia kaískë mitsun 'apu ënën kuamainunbi 'ë kati 'ikën, bërí kana ui karana ribini a kupíoti 'ain. 4 Ësokian kakëxunbi ka timë́kë unikaman kakëxa:

—Uínsaranbi kamina nun ñu mëkamanan nu paránan usokinbi 'akin këmënuxun nun kuríki bianan uisokinbi nu 'akëma 'ain. 5 Usai kia ka Samuelnën atu kakëxa —Nukën 'Ibu 'imainun anbia kaískë mitsun 'apu an ka mitsux mi kikë bana 'unánxa, usa 'ain kamina 'atimai banakin 'ë 'ucha okankëma 'ain —kixun ka Samuelnën unikama kakëxa.

—Asérabi ka usa 'ikë —kixun atúnribi kakëxa.

6 Kakëxun ka Samuelnën kamabi Israel kama kakëxa:

—Nukën 'Ibu an ka kamabi ñu 'anun Moisés këñun ain xukë́n Aarón a rabë́ 'amiakëxa, usakin 'amikin ka nun chaitiokëkama Egipto menua chikínbëtsinkin bëakëxa. 7 Usa 'ain kamina bërí mëníokakanti 'ain, 'ën kana Nukën 'Ibun ismainunbi mitsu uisakin kara an mitsu 'akianxa kanan, uisakin kara nun chaitiokë 'akiankëxa akama mitsu ñuixunti 'ain. 8 Jacob 'imainun aín aintsikamaxa Egipto menu tsóti kuankë ka a menuxun egipcio unikaman nun chaitiokëma 'aisamaira okin ñu mëëmikëx Diosan 'akinun kiax kikankëxa, usai 'ikëbëtan ka Nukën 'Ibun Moisés 'imainun Aarón an atu Egipto menua chikínun kixun 'amiakëxa, usakin 'akëx ka utankëx anunu bërí nux tsókë ënë menu atux pain tsókankëxa. 9 Usokin 'akinkëxbi ka Nukën 'Ibu Diosmi atux manúkankëxa, usai 'ia okin ka ax atumi nishkë unikaman abë 'akanankin kupimikinma 'anun Hasor ëmanu 'ikë 'apu Jabín aín suntárunën kushi Sísaranën an bërúankë suntárukamabëtan 'anun 'amiakëxa, 'aia ka filisteo unikama 'imainun Moabnu 'ikë 'apu anribi atubë 'akanankin 'akëxa. 10 Usokian 'akëx ka atúxbi sinanati Nukën 'Ibumi 'uchakin kananuna ami manutankëxun bëtsi unikaman rabikë Baal 'imainun Astarté tankin 'akë atun dios a rabi 'ucha kixun ñukákin, axa numi nishkë unikaman mëkënua kamina, mi rabikin añu 'anun kaina nu kai ashi mi 'axúnun chikínti 'ai kixun kakëxa. 11 Usakin ñukákëxun ka Nukën 'Ibun Jerubaal, Barac, Jefté 'imainun ka Samuel mitsu 'akinun kixun xuakëxa, xukëxun kananuna axa mitsumi nishkë unikaman 'ibuakë 'ikëbi mitsu 'akiankën upitaxmi bukukanun. 12 'Aínbi kamina Nahas amonitakaman 'apu axa mitsu 'anux kuankëbëtan atumi rakuë́kin achúshi 'apu an mitsu 'akinti anëxunun kiax kikankën Diosmi katamëti sinanima.

13 Ënu ka bërí mitsun kaiskankë 'apu a 'ikën; Nukën 'Ibu Diosan ka mitsun mi kuëënkë 'apu a mikama 'inánxa. 14 Bërí kamina mitsun añu 'anun kara Nukën 'Ibun mitsu kaia a 'anan ashi rabikin ax kikësabiokin 'akin aín bana kikë sama oi kamina 'itëkënkantima 'ain, usai 'ima kamina mikamax an mitsu 'akinkë 'apu abëbi Nukën 'Ibu kikësabi 'oíshi 'ikanti 'ain, usai 'ikëbë ka mitsun 'akë ñukamaxribi upí 'iti 'ikën. 15 Usai 'ikinma ax kikë bana kiásabiokin 'akëbëtan ka an mitsun 'apu këñunbi uisa kara oisatania usokin 'ati 'ikën.

16 “Usa 'ain kamina anumi bukukë anuax kuainkima pain uni itsin 'akëma ñu Nukën 'Ibun mitsun ismainun 'aia iskanti 'ain. 17 Mitsúnbi kamina 'unan bërí ka anun trigo bimi biti 'uxë 'ikën, 'aínbi ka 'uñe 'ibutíma, ¿asérabi kara usa 'ik? Usa 'aínbi ka 'ën ñukákëxun Nukën 'Ibun ka kaná banamianan uñeribi 'ibúnun 'imiti 'ikën, usokin 'akëbëtan kamina mitsun sinanakin 'unánti 'ain, nun kananuna Nukën 'Ibu kuëënkëma ñu 'akin achúshi 'apu nu 'inánun ñukákën kixun.” 18 Usakin atu katankënxun ka Samuelnën Nukën 'Ibu ñukákëxa, ñukákëxun ka an bënë́kinshi uñe 'ibúmianan kanáribi banarunun 'imiakëxa; usai 'ia isi ka kamabi uni timë́kë atux 'itsaira Nukën 'Ibumi rakuëanan Samuel mi ribi rakuëkankëxa.

19 Usai 'ikin ka kamabi unikaman Samuel kakëxa:

—Min kamina Dios ñukáti 'ain, an mi ñu mëëxunti unikama nu kupí, an ka nu këñunun 'imitima 'ikën; nun kananuna ami 'aisamairai 'uchakë 'ixunbi amiribishi achúshi 'apu nu 'inánun kixunribi ñukan.

20 Kikania ka Samuelnën atu kakëxa:

—Kamina rakuë́kantima 'ain. Ax ka asérabi 'ikën mitsúnbi kamina 'aisama ñuira 'an; usa 'ain kamina bërí an kakësokin 'aisamatankinma asérabi ashi min nuitunënbi sinánkin Nukën 'Ibu rabikanti 'ain. 21 Usa 'ain kamina bërí unin diosmabi rabikë ñukama a ënti 'ain, an ka mitsu uisa ñu kara inutiabi 'akianan uisakinbi ië́mitima 'ikën, ax ka unin këmëkinshi 'akë 'ikën. 22 Nukën 'Ibu an ka asérabi nukama kaisakëxa. Usa 'ixun ka uínsaranbi nukama ënuxunma 'aia, anbi ka mitsu aín uni 'iti kaisakëxa. 23 'Ën kana mitsu Nukën 'Ibu ñukaxunkin ëntima 'ain, mitsu ñukáxunima kana ami 'uchakë 'iti 'ain. 'Ianan kana uisai kaina mitsux an kuëënkësabi 'oíshi tsóti 'ain akama 'unánmiti 'ain. 24 Mitsun kamina Nukën 'Ibun kakësokinshi 'akin asérabi kuëënkin ashi rabikanti 'ain, an ka nu upíokin 'itsaira 'akinia kixun ami sinánkin. 25 Usokin 'akinkëxunbi mitsun amiribishi 'aisama ñu 'akin ismikëxun ka mitsun 'apu këñunbi axa mitsumi nishkë unikaman këñukin 'anun 'amiti 'ikën.