3 Usa 'ain ka Jonatán 'imainun suntáru raírinën filisteo suntárukama Guibeá kakë me anua bukukë anubi bëbakin 'akëxa, 'akë ka filisteo unikama raírinën kuanmainun Saúlnënribi kuakëxa. Kuati ka Saúl kiakëxa, kamabi israel unikaman ka 'unánti 'ikën ësaia 'ikë ënë. Usa 'ain ka aín suntáru raíri uinu 'ikë menu kara israel unikama tsótaxa abu kuainakëkian aín manë banoti, a kuatia timë́kanun banotanun kixun xuakëxa. 4 Usa 'ain ka Saúlnën bakë bëchikë Jonatán an filisteo suntárukama usakin këñukin 'akë a kamabi israel unikaman kuakëxa, usakin 'an ka filisteokamax israel unikama istisama tani ami nishakëxa, usa 'ain ka israel suntárukama Guilgal kakë anu Saúlbë timë́akëxa.

5 Usai 'imainun ka filisteo suntárukamax, israel unikamabë 'akánanti sinanx timëkamë 'ëokëxa. Anuaxa 'akanankë caballonën nirinkë ax treinta mil 'imainun ka axa caballonuax 'akanankë suntárukamax seis mil 'imainun, axa men kuani 'akanankë suntárukama masi bëru iskësaira 'aish tupuntisamaira 'iakëxa. Usa 'aish ka Micmás 'ikë anu atun 'iti xubusa okin 'ai amiaxa bari urukë Bet-avén 'ikë anu timëkamë 'ëokëxa.

6 Usa 'ain ka Israelnën suntárukama 'aisamaira filisteo suntáru 'ain, atun 'atimi rakuë́ti abátankëx aín bashi kininu unëmainun me nankë́kënu 'ianan bëtsi bëtsi maparanu 'imainun bëtsi bëtsi xëxanu 'ikë me rënankëkënu 'imainun me kininuribi unëkankëxa. 7 Usai raíri 'imainun ka ain patsan atux Jordán kakë baka sikarakë kiani Gad 'imainun Galaad anu kuankëxa.

Usaía 'imainun ka Saúl Guilgal kakë ëma anubi pain 'ain, Jonatán aín bakë bëchikë abëa 'ikë aín suntárukama 'itsaira rakuëkankëxa. 8 Anuxun ka mapai achúshi 'imainun rabë́ nëtën, 'ati nëtëa kaínun kakësabiokin Samuel kaíankëxa; 'aínbi ka bënëti Guilgalnu bëbaima Samuel basikëbë ka suntárukama achúshi achúshi abati kuani pëukuakëxa. 9 Usai 'ikëbëtan ka Saúlnën raíri kakëxa:

—'Ë kamina ñuina 'aímai këñutanun xaronan këñutanuma xaronun bëxúnti 'ain. Kakëxua bëxunkëxun ka anbi ñuina 'aímai këñutanun xarokëxa.

10 Xarokian Saúlnën ñuinakama 'aimakin këñumikin sënë́onkëbëshi ka Samuel bëbakëxa. Bëbakëbë ka Saúl aia kuëënkin bitsi chikíakëxa, 11 chikíkin bikin kakëxunbi ka Samuelnën ësakin kakëxa:

—¿Uisa kupí kaina 'atimakin ñu 'an? Kakëxunbi ka Saúlnën kakëxa:

—'Ën suntárukama abáti kuania iskin 'anan kana, mixmi anun ukatsi kikë nëtë 'inunmi panákëbëtan 'an, 'imainun ka filisteo suntárukama 'aisamaira Micmás kakë anu timëkamë 'ëokë 'ain kana 'an, 12 'ën kana sinánkë 'ian atux ukian Guigal ënuabi, Nukën 'Ibu 'akinun ñukákëmabi nukama 'aisa kana sinan; usa 'ain kana 'ënbi nua 'akinun Dios 'aímai këñutanun ñuina xaroxunti sinánxun 'axuan. 13 Kakëxunbi ka Samuelnën kakëxa:

—¡Usakin mi 'akë ax ka ñunshin bakë́kin 'akë 'ikën! 'Ën kana mi kan, 'ëx kana basikëbë pain Guilgalnu mibë timë́ti 'ian, usa 'ain kamina Nukën 'Ibun 'ë kakësokin 'anuxun kaínti 'ian, usa 'ain ka xënibua 'aínbi Diosan mi 'imainun min rëbúnkikama Israel kaman 'apu 'imitsianxa. 14 Usa 'aínbi ka mi 'imainun min rëbúnkikama uínsaranbi 'apu 'inuxuma 'aia. Usa 'ain ka Nukën 'Ibun achúshi uni an kuëënkësabi okin an 'ati barixun aín unikama 'apu 'inun 'imiti 'ikën, min kamina an kakësokin ain bana kuaisama tan.

15 Ësokin kaxun ëbianishi ka Samuel Guilgalnuax kuani kuankëxa. Kuamainun ka suntáru raíribë Saúl anuaxa 'akananux mëníokatinu atúxribi Guilgalnuax kuanx Guibeá Benjamínën ëma kakë anu kuanx bëbakëxa. Anuxun ka Saúlnën aín suntáru abëa 'akanani kuankëkama tupuankëxa, 'aínbi ka seiscientos mil unibëtan sënë́nsa 'iakëxa. 16 Usa 'ain ka Saúl 'imainun ain bakë bëchikë Jonatán abë kuankë ain suntárukamabë Guibeá Benjamín aín ëma kakë anu bërúakëxa, bërúmainun ka filisteo suntárukama Micmás kakë anu atu 'urama obëtsini uakëxa, 17 'aínbi ka achúshi 'imainun rabë́ ñaká filisteo axa 'akanankë unikama ax atun 'ikënuax ñu mëkamati chikíakëxa; usai 'i chikiti ka achúshi timë́kë ax Ofrá kakë ëma 'ikë abu kikiani, Saúlnën me 'ikë anu kuankankëxa, 18 kuantamainun ka bëtsix Bet-horón 'ikë abu kikiani kuankëxa, bëtsix ka anua me sapan 'ianan 'ain bashi chairukë Seboím kakin anëkë anu uni 'ikëma me abu kikiani kuankëxa.

19 Kamabi Israel unikaman menu ka an manë uniokë uni achúshirabi 'aíma 'iakëxa, filisteo unikaman ka sinánkëxa, Israel unikaman manë unioti 'unánmikëxun ka hebreo unikaman manë xëtokin 'anan masibun 'ati 'ikë kixun sinánkin ka manë unioti 'unánmisama tankëxa. 20 Usa 'ain ka israel unikama achúshi achúshi, an manë uniokë filisteo uninu kuanxun anúan me tukakë manë parókë aín xëta kuënuanan manë pará 'anan aín manë ruë 'anan, manë tëntuñu xëtokë akama kuënuakëxa. 21 Kuënuia ka filisteo unikaman manë kuríki 'akë rabë́ manë parókë kuëënia kupíomianan, manë kuríki achúshi manë ruë 'imainun manë sëbía chaxkë́ aín rëbu mëníokin xëtokë aribi kupíonun 'amiakëxa. 22 Usa 'ain ka uinu 'ikë suntáru axa Saúlbë kuankë achúshibi an manë xëtokë tuinkë 'aíma 'iakëxa, usa 'aínbi ka Saúl 'imainun aín bakë bëchikë Jonatán ax kuni ka aín manë xëtokëñu atux 'akánanti nëtë 'itámainun 'iakëxa. A rabëtax kuni ka 'ain manë xëtokë tuinkë 'iakëxa. 23 Usai atux 'imainun ka filisteo suntáru raírikama anua 'ikë anuax Micmás 'ikë ami kikiani kuankëxa.