—Baka shitákiani kuanxun kananuna 'ukëmanan filisteo unikama ka uaxa abë 'akanankin 'ai kuanti 'ain. 'Aínbi ka Jonatánnën ënë ñuikin aín papa usai kana 'inuxun 'ai kixunbi káma 'ikën, 2 anuxua anu tëkë unin trigo tákanan mëníokë, menu nikë in papa chaiira granado kakë a tëmú ka anu uax seiscientos aín suntárukamabë buküakëxa. 3 Siló kakë menu 'ikë sacerdote Ahías ax ka anbia usakin 'akë 'ixun lino 'akë chupa efod kakë a uankë 'iakëxa.

Ax ka Ahitud aín bakë bëchikë Icabodnën piaka 'iakëxa, 'imainun ka Fineesnën bakë bëchikë Elí, Nukën 'Ibun sacerdote Silónu 'ikë aín baba 'iakëxa. Usa 'aínbi ka aín unibë ka Jonatán kuanxa kixun unin 'unánma 'ikën. 4 Usakian unin 'unanima 'imainun ka a rabëtax anua filisteo unibunën suntárukama uax bukukë anu bëbakatsi bënëakëxa. Usai bënë́kiani kuani ka anua xaxun papa chaiira rabë́, 'ikë bëtsi Bosés kanan bëtsiribi Sene kakë anun kuankëxa, 5 bëtsix ami baka kuabúkë aín tsipumi Micmás; abu 'imainun ka bëtsix amia bari kuabúkë Guibeá bëmánon ami 'iakëxa. 6 Anuxun ka Jonatánnën abëa kuankë aín uni kakëxa:

—'Ukëmanan kananuna kuanti 'ain, uinua karanuna uni 'aisama kamanuaxa ukë suntárukama a mërai anuishi kananuna bërúti 'ain. Nux anun 'akamati ñu ka 'aíma 'ikën, usa 'ain ka Nukën 'Ibun 'itsa unibëtanmabi, 'itsamara 'ixunbi 'anun nu 'amiti 'ikën.

7 —Ësakin kakëxun ka abëa 'ikë unin usakin 'atimi sinánkë usabi okin kamina 'ati 'ain, 'ëx kana minmi 'aia mi 'akini uan —kixun ka abëa kuankë aín unin kakëxa. 8 Ësakin kakëxun ka Jonatánnën ësaki kakëxa:

—Ka kuat, 'ukëmanan anua unikama 'ikë anu kananuna kuanti 'ain. Anu kuanxun kananuna anu ka kixuan nu istánun mëramiti 'ain. 9 Mëramikëxua anuxunbi kamina nux kuamainun kaínti 'ain, kakëx kananuna anua bukukë anu kuantima 'ain. 10 'Aínbia atun kuanun nu kakëxpain kananuna atunu kuanti 'ain, usakin kakëx anu kuanxun nun atu 'akëx sapika nua Nukën 'Ibun atu usakin 'anun 'amikëxun 'akë 'iti 'ikën.

11 Usa 'ain ka a rabëtax, anua 'ikë anuxubia filisteo unikaman iskanun usai 'iakëxa. 'Imainun ka usai 'ia isi filisteo unikama kánani kikankëxa: Ka kuat, hebreos unikama ka numi kuai anua unëkë bashi kini tëmúnuax chikirabatia kiax kiakëxa. 12 Usai 'imainun ka usai 'ia mërakin Jonatán këñun abëa nikë aín uni kuënkëonkin kakëxa:

—¡Nuxnu anu 'ikë ënu kamina uti 'ain! Ësai kikëbëtan ka Jonatánnën an 'akinkë aín uni kakëxa:

—'Ë kamina nuibëtsinti 'ain, Nukën 'Ibun ka israel unibu ax numi nishkë unikama 'anun nu 'amiti 'ikën.

13 Ësai kikiani Jonatán aín taëbëtan aín mëkënan mëxukiani kuankëbë ka aín uni an 'akinkë axribi a katíkabiani kuankëxa. Kuankin ka Jonatánnën 'amainun 'akian tëtsikin 'akëxa bamatisa menu rakákë akama an 'akinkë unin tënankin tënankin 'anan kupitanuma këñukin 'akëxa. 14 Ësai 'akanantabati atubë 'akanankin ka Jonatánnën an 'akinkë unibëtan basikinma bënë́kinshi mapai rabë́këñun mapai rabë́ribi filisteo unikaman suntáru 'akëxa.

15 Usakin 'an ka aín xubunu 'ikë unikama 'imainun suntáru ëmanu 'ikë filisteokama rakuë́akëxa. Rakuë́mainun ka aín patsan axa 'akanani mëkó unikama a kamaxribi rakuë́akëxa. 'Aínbi ka Diosan 'imikëx 'aisamairai me shaíkikëbë 'itsaira unikama rakuëaxa. 16 Guibeá anuxun an bërúanti Saúlnën, nankë suntárukama an Benjamínën menu 'ixun filisteo suntárukama, amo amotan upiti kuanima 'ukëmanan shítarabatia isakëxa. 17 Usai 'ia iskëbëtan ka Saúlnën aín suntáru abëa 'ikë akama kakëxa:

—Uikama kara nunu 'aíma 'ikë isti kamina timë́ti 'ain. Kakëxa timëtia iskinbi ka an 'akinkë unibë Jonatán 'aíma okëxa. 18 'Imainun ka a nëtën lino 'akë chupa efod kakë Diosnan an uankë sacerdote Ahías ax anua Israelnën suntárukama 'ikë anubi 'iakëxa, anu 'ikë ka Saúlnën kakëxa:

—Ënu kamina efod kakë chupa Diosnan a bëti 'ain kixun kakëxa. 19 'Aínbi ka Saúl sacerdote Ahíasbë banamainun, filisteo suntárukama tsuákiruax 'atimonani masákëxa. Usaia filisteo unikama 'ia iskin ka usai 'iashi 'akatsi kixun Saúlnën sinánkëxa. Sinánkin ka sacerdote Ahías kakëxa:

—Efod kakë chupa a kamina bëtima 'ain.

20 Usakin kakin ka Saúlnën aín unikama kamabi timë́akëxa, timëbiankin ka anuax 'akanantinu buankëxa. Usakin uania isi ratuti ka filisteo suntárukama isima 'ikësai, atuxi 'akanani këñuanankëxa. 21 Usai 'ikëbë rakuë́ti ka, filisteo unikamanu kuanxa atubë basi 'ia, aín suntárubëtan israel unikama 'ati filisteonën uankë hebreo unikama ax atu ëni, Saúlbëtan Jonatánnën uankë unikama 'urama atubë biranani rikiankëxa. 22 'Imainun ka Israel unibu axa Efraínën menu abákë atúnribi filisteo unikama ka abatia kixun ñuia kuakëxa, kuabiani nuibiani kuanxun ka abatiabi nukuxun Israel suntárukaman 'akanankiankëxa. 23 'Akëxa kuania 'akanankinkin ka Bet-avén, anubi bëbarukin 'akëxa, ësakian 'anun 'amikin ka a nëtëkaman Nukën 'Ibun, Israelkama atuxia upiti tsónun 'imikin ië́miakëxa.

24 'Aínbi ka israel suntárukama a nëtë́an, añu ñubi pima panankë 'aish atun nami kushima 'aish bënainsabu 'iakëxa, ësakian Saúlnën manukinma a sinánun kikë 'ain: Uin kara bari xupibukëbëtan 'ën 'ëmi nishkë unikama 'akin pëukë 'aímabi ñu pia ax ka 'atima okë 'iti 'ikë, kiaxa Saúl kikë 'ain ka a nëtën ñu pikëma 'aish Israel unikama usai 'iakëxa.

25 Usai 'ika Israelnën suntárukama achúshi ni anua menu buna rëpa 'ikë anu bëbakëxa. 26 Bëbax ninu atsínkibi ka suntárukaman, aín banua 'umpax iskësaira buna rëpa 'ikë mërakëxa; 'aínbi ka uínbi bixun xëakin tainsa 'ixunbi, 'apu Saúlnëa kakë bana a sinánkin bixun xëama 'ikën. 27 'Aínbi ka Jonatánnën atun 'akëmabi, manuxunma a sinánua aín papa Saúlnën aín suntárukama kakë bana a kuakëma 'ixun, tuinxuan buánkë tsati rëbun, aín ba pëánkaxun a buna rëpa xëakëxa, xëaxun ka anunbi upí tani kushiakëkin tankëxa. 28 Usakin 'akë 'ikëbi ka Israel kama suntáru achúshinën kakëxa:

—Min papan ka a sinánun suntárukama kaxa uin kara bëtsi ñubi pia ax ka 'atima okë 'iti 'ikën. Usa 'ain ka unikaman 'akëñuma panankë 'aish atun nami bamabu kuainkë 'ikën kixun ka kakëxa.

29 Ësakin kakëxun ka Jonatánnën kakëxa:

—'Ën papan ka nun me ënë 'aisama 'itánun 'atimoxa. Ka kuat, 'ëx kana buna rëpa chamara uisa kara tankin xëax kushiira 'ain, 30 abënu 'akanankë unikaman piti 'imainun ain, ñuinakaman ñu bixun piax kuni kananuna kushibu 'itsían. ¡'Usa 'ixun kananuna kushiirabu 'ixun filisteo unikama bënë́kinshi këñukin 'akë 'itsían! 31 A nëtën ka Israel suntárukaman, Micmás ëma 'ikë anuxun abë 'akanankin 'abianxun Aialón ëma 'ikë anu bëbakin filisteo unikama 'akëxa.

'Aínbi ka Israelnën suntárukamax 'akëñuma 'aish pananx atun nami bamax bënainsabu 'iakëxa, 32 usa tankin ka kamaxunbi ami nishkë unikamabë 'akanankin bikë ain ñukama a piakëxa. 'Imainun ka usakin 'anan oveja, vaca 'imainun aín bënábu akama bixun rëxun aín imikëñunbi piakëxa.

33 'Aínbi ka usakin 'aia isiani anu kuanxun Israel suntáru raírinën Saúl kakëxa:

—Unikama ka nami paxa aín imikëñun pi Diosmi 'uchaia, kakëxun ka Saúlnën kakëxa:

—¡Mitsux kamina ax kikësabi oí 'ima ami kuai Nukën 'Ibu Diosmi 'uchakanin! Usa 'ain kamina xaxun papa taranbëtsinkin 'ë bëxúnti 'ain. 34 Bëtankëxun kamina abë banakin achúshi achúshi unían 'ë atun vacakama, bënë achúshi bëisama 'ain, ain ovejakama achúshi ënu 'ë bëxunun kati 'ain, a kamina mikaman aín imi këñun pimi Nukën 'Ibumi 'uchakë 'itima kupín, aín imi 'ibúmikin ënuxun 'ati 'ain.

A 'imë́bi ka achúshi achúshixun uankë vaca bënë a kamaxunbi anuxun rëakëxa. 35 Usakin atun 'amainun ka Saúlnën suntárukaman 'itánun, abi 'atabakin anuxun Nukën 'Ibu rabiti 'akëxa. 36 Usakin 'atankëx ka Saúl ësai kiakëxa:

—Ënë imë́ kananuna filisteo unikama pëkarakuatsintamainun, achúshirabi bërutanuma 'ai kuanti 'ain.

Kia ka kamaxunbi kakankëxa:

—Uisakin kaina 'aisatani usakin kamina 'ati 'ain. 'Aínbi ka usai kiabi sacerdote Ahíasnën atu kakëxa:

—Añu karanuna 'aisatani a 'anux kananuna Diosbëpan banati 'ain. 37 Usakin kai sënë́ntankëx ka Saúl Diosbë banakëxa:

—¿Filisteo suntárukama karana 'akanankinti 'ain? ¿israel suntárukaman 'aia kaina na 'anun 'amiti 'ain? 'Aínbi ka Nukën 'Ibun a nëtën ësakian ñukákëxunbi kuakëmasa okin káma 'ikën. 38 Usa 'ain ka Saúl ësakin aín suntárukama kai kiakëxa:

—Ënu kamina kamabi suntáru 'apukamax uti 'ain, uxun kamina uix kara bërí 'uchaxa isti 'ain kixun kakëxa. 39 ¡'Ëx kana manutima okin sinánun an ira Israelkama 'ikë nukama ië́mikë Nukën 'Ibun kuamainunbi kin, 'ën bakë bëchikë Jonatánnëx 'uchakë 'ain ka ax 'akë 'iti 'ikën! Ësai kia kuakin ka suntárukaman uisa bananbi káma 'ikën; 40 usakin kakëxuma ka kamabi Israel unikama Saúlnën kakëxa:

—Nëkëmanan 'ikë raíri 'imainun, raíri 'ukëmanan 'ikë mikamax kamina 'ën bakë bëchikë Jonatánnën mitsu uamainun kuanti 'ain.

—Kia ka uisakin kaina nu 'aisatani usakin 'ati 'ai —kixun unikaman kakëxa. 41 Ësakin kakëxun ka Saúlnën kuënkëni kushin banakin Dios kakëxa:

—Israel kaman Dios, ¿Uisa 'ixun kaina bërí min uni 'ikëbi 'ë kaisama tan? 'Ëx 'uchakëma 'ain, kara 'ën bakë bëchikë Jonatán 'uchakë 'iti 'ikën, usa 'ain ka ñuratsukun tankëxa axa 'uchakë mërakëbëtan Urim bëti 'ikën; 'aínbi ka bëtsi Israel ñuratsukun tankëx 'uchakë mërakëbëtan Tumim a bëti 'ikën. Usakin kakëxun tankëxbia Saúl 'imainun aín bakë bëchikë Jonatán 'uchakë 'ain ka Israel kama 'uchakëma upí 'iakëxa.

42 Usakin 'akë 'aínbi ka Saúl kiakëxa:

—'Ë këñunbi kamina 'ën bakë bëchikë tanti 'ain. Kikëbëtan tankinbi ka Jonatán 'uchakë mërakëxa, 43 mëran ka a ñuikin Saúlnën Jonatán kakëxa:

—'Ëmi kamina min 'akë ñu a chikínati 'ain. Kixuan kakëxun ka Jonatánnën aín 'uchakë a ñuixunkin kakëxa:

—'Atsínxumabi kana buna rëpa chamara 'ën tuinbiankë tsati rëbun aín ba pëánkakin bixun 'an. Usa 'ain kana 'ëx, 'akë 'iti 'ain. 44 Usakian ñuixunkëx ka Saúl ratuti kuënkëni kushin banai kiakëxa:

—¡Diosan ka uisakin kara 'aisatania usakin 'aisamaira okin Jonatán bamakëbëtan 'ë tëmëramiti 'ikën! 45 'Aínbi ka usai kiabi kamabi uni kaman Saúl kakëxa:

—¡Uisai 'iax kara Jonatán bamati 'ikën, an ka Israel kama nunnu filisteo unibu 'anun nu 'amiaxa! ¡Usakin 'akë a kupíma! ¡Nukën 'Ibu ka ax ñukëma 'aish tsóxun isia, usa 'ain ka Jonatán menu pakëanan. Aín bu achúshirabi nipakëtima 'ikën! Usakian bërí 'akë ax ka Diosan 'akinkëxun 'akë 'iaxa. Ësakin 'akin ka Israel kama raírinën Jonatán 'akë 'iti 'ikëbi ië́miakëxa. 46 Ësakin 'axun ka Saúlnën, atubë 'akanantëkënkinma aín menubia rikiantanun filisteo, unikama ëankëxa.

47 Ësakin pain 'atankëx ka, Saúl Israel kaman 'apu 'iakëxa. 'Imainun ka 'apu 'i anëtankëxun kamabi menu 'ikë ami nishkë unikama atubë 'akanankin 'akëxa, akamax ka, Moab, Amón, Edom, Sobá ëmanu 'ikë 'apu, a 'imainun filisteo uni akamaishi 'iakëxa. 'Imainun ka uinu kara kuania anuabi atubë, 'akanankin uni 'akëxa. 48 Usa 'ixun ka aín suntárukama timëxun atubëtan Amalec unibu kupitanuma 'akëxa, usakin 'axun ka Israel kaman ñu an mëkamakë unikama abámiakëxa.

49 Saúlnën bakë bëchikëkama ka 'iakëxa: Jonatán, Isví, 'imainun Malquisúa akama. 'Imainun ka aín 'ini xanukama 'iakëxa: Merab, aín apan 'imainun Mical, aín 'anáka ashi. 50 'Imainun ka Saúlnën xanun anë 'iakëxa Ahinóam kakë, usa 'ain ka Ahimaasnën bëchikë xanu 'iakëxa. Saúlnën suntárukaman 'apu general aín anë ka 'iakëxa Abner Nernën bakë bëchikë, Nernëx ka 'iakëxa Saúlnën paitsi. 51 Quisnëx, ka 'iakëxa, Saúlnën papa 'imainun ka Ner 'iakëxa, Abnernën papa. Quis 'imainun Ner a rabë́ ka 'iakëxa, Abielnën bakë bëchikë.

52 Anua filisteo unikamabë 'akanankë a bari kaman ka Saúlnën tëira tankëxa; usa 'ain ka Saúlnën aín suntáru 'inun timëkin uni kushibukëñun ax 'akanainsa aín sinan kushibu kamaishi kaísun biakëxa.