Nukën 'Ibun Saúl kuëënkima tima ñuikë bana
15
Achúshi nëtën ka Samuelnën Saúl kakëxa:—Nukën 'Ibun ka 'ën mi utankëxun anbia kaisa Israel kaman aín 'apu 'inun, mi anënun kixun 'ë kaxa. Usa 'ain kamina, ësokin mi kanun kikë bana kamainun kuati 'ain. 2 Nukën 'Ibu kamabi kushiñuira an ka mi ësokin kaia: bërí kana amalecita unikamami 'ën 'amikëxun 'anun mi 'amiti 'ain, usa 'aínbi ka atun Israel unikama Egipto menuaxa aia atubë 'akanankin 'akëxa. 3 Usa 'ain kamina, min suntárukama buani kuantankëxun; atu 'akin añu ñuñu kara atux 'ikë akamabi masókin 'anan atu nuibakinma kamabi uni 'imainun xanukamaribi 'anan tuá bërunankë akama 'anan bëría bakënkë akamabi 'ati 'ain, 'anan kamina vaca bënë atun oveja camello 'imainun atun burrokama këñukin 'ati 'ain.
4 Usakia kakëxun ka Saúlnën Israel suntárukama an Telaim kakë ëmanu timënun kixun xuakëxa, anu timë́kë ka atun anën kuënkin kamabi suntáru tupuankëxa, tupúnkëx ka doscientos mil suntáru axa men kuani 'akanankë 'iakëxa, 'imainun ka Judánën rëbúnki kamax diez mil suntáru 'iakëxa. 5 Usakin 'abiani ka Saúl aín suntárukama buani Amalec kakë aín ëma chaiira anu kuanxun ratukinshi 'anux achúshi xëxanu 'ibuax anu unë́nun 'imiakëxa, 6 usokin 'atankëxun ka Saúlnën quenita unikama ësokin kamiakëxa:
—¡Kamikëx kuanxun ka ësokin kakëxa! ¡Anumi Amalecita unikamabë tsókë ënuax kamina chikínkanti 'ain ënë unikama 'akin kananuna atukëñunbi mitsuribi 'ati 'ain; mitsun kamina Egipto menuaxa chikíküatsini aia israel unikama uisabi okinma nuibakën!
Usokian kakëx ka quenita unikamax amalecita unikamanuax chikikankëxa. 7 Usa 'ain ka Saúlnën aín suntárukamabëtan 'akin amalecitakama anua Havilá me 'ikë anuxunbi pëuxun nuibiankin au bari kuabúkë Egipto me sënënakëkë anubi bëbarukin 'akëxa; 8 'akin ka atun 'apu Agag kakë ashi ñatankankëxa, ñatanan ka atun manë xëtokën aín suntárukama 'akankëxa. 9 'Anan ka Saúlnën aín suntárukamabëtan, Agag a uisabi oima 'ianan atun 'arakakë ñuina upíbu oveja, vaca, bënë, carnerokama xuairabu akama bianan ñu upíbu akamaribi 'aisama okinma, ñu kupíkëma kamaishi 'atima okëxa.
10 Usokia 'akë 'ain ka Nukën 'Ibu abë banakin Samuel kakëxa:
11 —'Ënbi upí 'iisa sinánkin Saúl 'apu 'inun 'imikëxunbi ka, 'ën 'anun kakësokin 'akinma an kuëënkësokin 'axa. Ësokin kakëx ka Samuel masá nuituti 'itsaira nishakëxa, usai 'iax ka a imë́ Nukën 'Ibubë bananëakëxa.
12 Usai 'inëti ka Samuel pëkarakëma 'aínshi nirukiani Saúl bari kuankëxa, kuaniabi ka abë mëranankëmabi kakankëxa, Saúl ka Carmel kakë menu kuanxun anu achúshi mapara chaxkë́ a iskin ami unin sinántisa kixun nitsintankëx, ami achúshi oi kuainakëkiani Guilgal kakë ëmanu kuanxa kixun ñuixuankëxa.
13 Usakian kakëx ka Samuel uimi kara Saúl kuanxa anuabi bari kuankëxa, kuankian nukukëxun ka kakëxa:
—Nukën 'Ibun ka mi 'akinti 'ikën. 'Ën kana kamabi Nukën 'Ibun 'anun kakëkama 'an. 14 Kiabi ka Samuelnën kakëxa:
—¿Uinan kara ovejakama bana maínun vaca bënëkama mankiabatia 'ën kuakë ax 'ik? Kixun ka Samuelnën ñukákëxa.
15 —'Ën kana a ñuinakama bëkëma 'ain Amalec menua ka suntárukaman bëaxa —kixun ka Saúlnën kakëxa—, atun ka min 'Ibu Dios rabikin xaroti bëkanxa. 'Aínbi kananuna raíri ñuinakama achúshirabi nitsinkinma kamabi këñuan. 16 Usokian kakëx ami nishkin ka Samuelnën Saúl kakëxa
—¡Nëtë́xun kamina usokin mi kanun 'ë kakë mi kamainun kuati 'ain, Nukën 'Ibun ënë imë́ 'ë kakë kana mi kati 'ain! Ësokin kakin ka kiabi nëtë́miakëxa. —Asabi ka kamina 'ë kati 'ain —skixun ka an kakëxa. 17 Usa 'ain ka Samuelnën kakëxa:
—Minbi kamina 'apu 'isama 'ixun 'ëx kana añubi 'isama 'ai kixun sinánkën, 'aínbi kamina bërí israel unibunën 'apu 'ain, usaími 'inun ka Nukën 'Ibun mi 'imiaxa. 18 Usa 'ikë ka Nukën 'Ibun, minmi Amalecita 'uchañu unibu abë 'akanankin aín suntárukama këñukinshi 'anun mi kaxa. 19 'Aínbi kaina ¿Uisa kupí an mi kakësokinshi 'akinma atu 'axun Nukën 'Ibun ismainun, axa mimi nishkë unikaman ñu usokin 'an? 20 Kixuan kakëxun ka Saúlnën kakëxa:
—'Ën kana añu 'anun kara Nukën 'Ibun 'ë kaxa a kamabi 'axuan: 'Akin kana Amalecita unikama këñukin 'anan atun 'apu Agag ashi 'akinma bitsínkin usabi bëan. 21 'Aínbi ka suntárukamainshi atun 'arakakë ñuina aín upíirabu a kamabi këñutia Dios kikë akama bëaxa, a ka Dios Guilgal kakë ëma anuxun xaroxunti bëaxa. 22 Usokin kakëxunbi ka Samuelnën kakëxa:
Nukën 'Ibun ka kuëënia ax kikësokinshi 'axúnti, usa 'ain ka ñuina xaroxuntishi kuëënima; ax kikësabi okinshi 'ati ax ka ñuina xaroxuanan carnero aín xëni xaroxunkë usamaira 'ikën.
23 Usa 'aish ka uin kara ax kikësokin 'aima ax ami 'uchai an ñu tankë unikamasa 'iti 'ikën; usa 'aish ka ñu tankin 'axun rabikë unikamasa 'ixun Diosan kakësokin 'aima ami 'uchaia. Usa 'aínbi kamina min an kikësokin 'akëma 'ain, an kakësokin kamina 'aisama tanin, usa 'ikë ka 'apu 'ikëbi mi 'akintima 'ikën.
24 Ësokian kakëxun ka Saúlnën Samuel kakëxa:
—'Ën kana Nukën 'Ibun kakësama okin 'ai 'uchan 'imainun kana min kakësokiribi 'akëma 'ain, usa 'ain kana atumi rakuë́kin añu 'anun kara 'ë kaia usakinbi atu 'axuan. 25 'Aínbi kamina usai 'uchakë 'ikëbi 'ë mëníoti 'ain, 'ianan kana 'ëbë mix Nukën 'Ibu rabi kuanti kuëënin.
26 —Kixun kakëxunbi ka usama ka, mibë kana kuanima —kixun Samuelnën kakëxa—, min kamina Nukën 'Ibu 'anun kakësokin 'akëma 'ain, usa 'ain ka mixmi Israel unibunën 'apu 'iti kuëënima.
27 Ësokin katankëxa Samuel kuani anua 'ikë anuax kuainakëtiabi ka Saúlnën aín pañukë tari a munuma bikin kuënáraskakëxa. 28 Usokin 'akëxun ka Samuelnën Saúl kakëxa:
—Minmi 'ën tari tukakin bikë ësaribiokin ka Nukën 'Ibun ka mix Israel kaman 'apu 'ikëbi. Mi 'imikinma bëtsi uni kaístakëxun, an Israel unikama min 'akësamaira okin atu 'akinun 'imiti 'ikën. 29 Nukën 'Ibu Dios an ka Israel kama upí 'inun 'imiti 'ikën, ax ka paránani këmëi banaima, 'ianan ka uni 'ikësai ñu 'akatsi kiax kana 'aíma kiax kítëkënima.
30 —'Ëx kana 'uchan —kiax ka Saúl amiribishi kítëkëankëxa—. Usa 'aínbi kana mi amiribishi katëkënin Israel kaman kushi 'imainun kamabi unikaman, ax ka asérabi nun 'apu 'ikë kixun mi sinánun kamina 'ëbë kuanti 'ain. Usa 'ain kamina 'ëbë kuantëkëntankëxun Nukën 'Ibu rabi kuanti 'ain kixun ka katëkëankëxa.
31 Usai kanankiani ka Samuel 'imainun Saúl anua 'ikë anuax kuankëxa, kuanxun ka Dios rabiakëxa. 32 Usokin 'atankëxun ka Samuelnën kakëxa:
—'Ë kamina Amalecita unikaman 'apu Agag bëxúnti 'ain. Kakëxun bëkëx ka Agag aín bamatisa inúaxa kiax upitaxëshi kuantankëx Samuel bëmánanu nirakëakëxa, uisabi isa okanima a 'atimisa manukanxa kixun sinani. 33 'Aínbi ka Samuelnën kakëxa:
—Min kamina min manë xëtokën 'akin 'ën aintsi xanun tuákama këñukin 'an. Usaribiti ka min titax tuáñuma bërúti 'ikën. Ësokin kakinshi ka Samuelnën aín manë xëtokë bikinshi anun 'akëxa, Guigal kakë ëma anuxun Nukën 'Ibun kakësabiokin 'axun ka Agag aín nami chánkapakëxa.
34 Usokin 'atankëx ka Samuel Ramá kakë ëmanu kuankëxa. Kuantamainun ka Saúl axribi anua 'ikë aín xubu Guilgal kakë ëma anu kuankëxa. 35 Usai 'itankëxun ka Samuelnën uínsaranbi amiribishi Saúl istëkëama 'ikën, a sinani 'itsaira masá nuitukinbi, 'imainun ka Dios anbi Israel kaman 'apu Saúl 'imiaxbi kuëanma 'ikën.