—¿Uínsaran kaina Saúl sinani mix masá nuitukë a ënti 'ain? 'Ëx kana abia Israel kaman 'apu 'iti kuëënima. Usa 'ain kamina ñuina manchan anu 'aruti 'akë anu xëni 'arubiani kuanti 'ain, Jesé Belénnu 'ikë ain xubunu, 'ën kana 'ain bakë bëchikë achúshi axa 'apu 'inun kaísan.

2 —¿Uisokin karana anu kuanuxun 'ati 'ain? —kixun ka Samuelnën kakëxa—. ¡Saúlnën usakin 'akë 'unánkin ka 'ë 'ati 'ikën! Kakëxunbi ka Nukën 'Ibun kakëxa:

—Vaca bërí kanikë ain xanu bibiania iskin uínbi kara mi ñukákëxun kamina 'ë kamina ñuina xaroxuni kuani kixun kati 'ain. 3 Usa 'ain kamina ain xubunu bëbakin Jesé mia ñuina xaroia 'akinun kati 'ain, 'ën kana añu kaina 'ati 'ai kixun mi kati 'ain. Usa 'ain kamina 'ën ui kaina 'apu 'inun anëti 'ai 'ën mi kamainun aín maxkánu xëni tutukati 'ain.

4 Kakëx ka Nukën 'Ibun kakësabiokin 'ai kuani Samuel kuankëxa. Kuani Belénnu bëbaia bikin ka 'apukaman ami chukúmashi rakuë́kinbi, ñukákankëxa:

—¿Añu 'ai kaina aín añu ñu kara ënu 'ik?

5 Kakëxun ka Samuelnën —usa ka —kixun kakëxa. —Dios ñuina xaroxuni kana aín. Mënioka kuatsini kamina ëbëtan Nukën 'Ibu ñuina xaroxunkin rabianan pi kamina ukanti 'ain.

Usokin raíri katankëxun ka Jesé 'imainun ain bakë bëchikë bëbukama upiti mëníokanun 'imiakëxa, 'imixun ka anuxua ñuina xaroti anuribia ununkixun kakëxa.

6 Usa 'ain ka anuxun ñuina xaroti anu bëbaia Eliab Jesénën bakë bëchikë apan iskin Samuelnën sinánkëxa: Ënë uni sapi ka Nukën 'Ibun 'apu 'iti kaískë a 'ikën. 7 'Aínbi ka Nukën 'Ibun kakëxa: “Uisa kara kixun ñachanan kamina uiti chaxkë́ kara kixun istima 'ain, 'ëx kana ax 'iti kuëëniman. 'Ëx kana unin iskë ñu ñui kikëma 'ain; unin ka uisa kara bëtsi uni 'ikë kixun isia, usa 'aínbi kana 'ën uisakin kara unin sinania a 'unanin.”

8 Kakëxun ka Jesénën aín bakë bëchikë Abinadad kuënbiankin, Samuel ismikin uankëxa; 'aínbi ka Samuelnën kakëxa:

—Ënëribi ka Nukën 'Ibun kaiskëma 'ikën. 9 Kixuan kakëxun ka Jesénën aín bakë bëchikë Samá kakin anëkë aribi buánkëxa; aínbi ka Samuelnën kakëxa:

—Ënëribi ka Diosan kaiskëma 'ikë kixun kakëxa. 10 Katëkënxun ka Jesénën mapai achúshi 'imainun rabë́ ain bakë bëchikë bëbukama Samuel ismiakëxa, 'aínbi ka Samuelnën achúshirabi ka Nukën 'Ibun ënë min bakë bëchikëkama kaiskëma 'ikë kixun kakëxa. 11 Usakin pain 'uran ñukátakëxun ka amiribishi kakëxa:

—¿Min bëchikë itsi kara 'aíma 'ik?

—Kixuan ñukákëxun ka anu ka an ñuina 'arakakë bërúankë aín 'anáka achúshi 'ikë —kixun Jesénën kakëxa.

Kakëxun ka Samuelnën barixua bëtánun kamina —achúshi uni xuti 'ain —kixun kakëxa—, ax ukëmapan 'ain kananuna mesanu nami 'ën xuikë pinux tsóbutima 'ain kixun ka kakëxa.

12 Kakëxun ka Jesénën an ñu mëëxunkë uni achúshi barixua bitánun xuakëxa xukëx kuanxun bitsínkin bëakëxa. A bëná uni ax ka ain bëmanamiax upí 'ianan ranshin uni 'iakëxa. Usa 'ain ka Nukën 'Ibun Samuel kakëxa:

—Ënë kamina axa 'apu 'inun anëti 'ain. 13 Kakëxunshi ka ñuina manchanua 'arukë xëni bikin aín xukë́n apankama ismainunbi David kakë uni bëná aín maxkánu axa 'apu 'inun anëkin xëni tutukaxa. Usokëbëshi ka Nukën 'Ibun bëru ñunshin anu uax 'iruakëxa. Usokin 'abiani ka Samuel kana kuanin kixun atu kabiani Ramánu 'ikë aín xubunu kuantëkëankëxa.

14 Usa 'ain ka Nukën 'Ibun aín bëru ñunshin Saúlnua, chikinnun 'imianan anbi ñunshin 'atima an 'atimonun Nukën 'Ibun anu xuakëxa, an ka ñunshin bakënun 'imiakëxa. 15 'Imikëxa ñunshin bakëia iskin ka an ñu mëëxunkë unikaman kakëxa:

—Minbi kamina 'unanin, Diosan ka mi 'atimonun minu ñunshin 'atima xuaxa an ka mi ubioia. 16 Usa 'ain kamina min an mi ñu mëëxunkë nukama achúshi an arpa 'ati 'unánkë uni achúshi baritanun xuti 'ain, an ka mia ñunshin 'atimanën bikëbëtan a kuatimi chuámarua tani kuëënun arpa 'ati 'ikën.

17 —Asabi ka usa 'ain kamina an arpa upíokin 'ati 'unánkë uni baribëtsinkin 'ë bëxuni kuanti 'ain, —kixun ka Saúlnën kakëxa. 18 Kakëxun ka an ñu mëëxunkë uni achúshitan kakëxa:

—'Ën kana Jesé Belénnu tsókë aín bëchikë achúshinën upíokin arpa 'aia isan; 'imainun ka ax 'akánanti rakuëma 'ianan, asérabi ax kikësabiokin ñu 'aia, usa 'ikë ka Nukën 'Ibun 'akinia.

19 Ësokin kakëxun ka Saúlnën ain unikama Jesé ësokin katánun kamikin xuakëxa: “Min bakë bëchikë David an min ovejakama 'arakakë bërúankë akamina 'ë xuxunti 'ain kixun katánun xuakëxa,” 20 xukëxua kakëxun ka Jesénën aín bakë bëchikë David Saúlnu xuakëxa. Xukin ka an Saúl buánxuntanun burro achúshinu pán xuanan, ñuina xakánu 'arukë uvas bakakëñun achúshi cabra tuá chukúma xuakëxa. 21 Usakin uamikëx a uani kuanx ka David Saúlnën xubunu bëbakëxa, bëbax anu 'ia ka Saúlnën ain ñu mëëti 'axúnun 'imiakëxa, 'imikëxun upíokin ñu mëia 'itsaira nuibakin ka Saúlnën an 'akinun kixun anëakëxa. 22 Anëtankëxun ka achúshi uni abë 'inun kara ain bëchikë David ami ëntima 'ikë ain papa Jesé ñukáxuntanun 'itsaira nuibakin uni xuakëxa. 23 Usa 'ain ka Diosan anu xukëxun ñunshin 'atimanën bikëx bikëx Saúl ñunshin bakëi 'ikëbëtan, Davidtan ain arpa bikin 'akëxa. Usakin 'akëbë ka Saúl 'ásabi tani kuëënun ñunshin 'atima anuax chikíakëxa.