4 Anua filisteo suntárukama timë́kë anu ka achúshi uni 'akánanti 'unáira 'iakëxa, ax ka achúshi 'imainun rabë́ metro chaxkë́sa 'iakëxa. Aín anëx Goliat kakë 'iakëxa usa 'aish ka Gat kakë ëmanu tsókë uni 'iakëxa. 5 Aín maitinëx ka manëbia 'akë 'imainun ka aín shikan bëpantia pañukë axribi manë 'akë 'iakëxa, aín 'iëx ka cincuenta 'imainun cinco kilo 'iakëxa. 6 'Imainun ka a manëbia 'akë anun aín kisi rabë́ bëpankë a 'imainun an pañukë axribi manë 'akë 'iakëxa. 7 Aín manë xëtokë anun tuinti aín taxu ax chaiira 'iakëxa, 'imainun ka aín xëta ax manëbia 'akë 'iakëxa, usa 'aish ka ain 'iëx mapai achúshi 'imainun achúshi kilo 'iakëxa. Usa 'ikë ka an 'akinkë uni an rëkuë́nkiani kuankin 'akiankëxa.

8 Usa 'ixun ka Goliatnën atu 'ukëmanan nikianxun munuma banakin israel suntárukama kakëxa:

—¿Mitsux kaina nubë 'akanankatsikiax ënu rikuatsian? 'Ëx kana filisteo uni achúshi 'ain mitsux kamina Saúlnën suntárukama 'ain, usa 'ixun kamina achúshi uni mitsun kaístankëxun 'ëbëa 'akanani unun xuti 'ain. 9 Ax 'akánanti 'unánkë 'ixuan 'ë 'akin kanankëbë ka filisteo unikamax mitsun ñu mëmikë unikama 'iti 'ikën; 'aínbi kamina 'ën a uni 'akëbë mitsux nun ñumëmikë unikama 'iti 'ain. 10 Bërí kana 'ëx Israel kaman suntárukamabë 'akanainsairatani: ¡Usa 'ain kamina achúshi uni 'ëbë 'akanani unun xuti 'ain! 11 Usai kia ka Saúl 'imainun aín suntárukaman filisteo uni aín bana küakëxa, kuati ka kananuna atubë 'akanantima 'ai kiax atumi 'itsaira rakuëkankëxa.

12 Jesé ax ka Belén kakë ëma anu tsókë uni 'iakëxa, usa 'ain ka Saúl axa 'apu 'ain a uni kaniakëti uni 'ikësabi apan 'iakëxa. A unix ka ocho bakë bëchikëñu 'iakëxa, aín bakë bëchikë achúshinëx ka David 'iakëxa. 13-14 Aín bakë bëchikë apan achúshi 'imainun rabë́ Eliab, Abinadab, 'imainun Samá akamax ka Saúlbë filisteo unikamabë 'akanani kuankë 'iakëxa. 'Aínbi ka David ax xupain 'aish kuanma 'ikën, 15 ax ka uinu kara Saúl 'ia anu kuantankëxbi anu bërútima amiribishi Belénnu utëkëankëxa, anu uxun ka aín papan ñuina bërúankëxa. 16 Usakia 'amainun ka filisteo uni achúshi an Israel suntárukama pëkarakëbëtan kanan xupibukëbëtan ribi atu 'akatsikixun nëtë tibi cuarenta nëtë sënë́nmikin atu ubíokëxa.

17 Usa 'ain ka achúshi nëtën, Belénnuxun Jesénën aín bakë bëchikë 'anáka David a kakëxa:

—Min xukë́nkama kamina anua 'ikankë anuabi veinte kilo trigo tutush okë këñun mapai rabë́ pán bëríbi buánxunti 'ain. 18 'Imainun kamina mapai rabë́ queso ënë suntárukaman kushi comandante a buánxun 'inánti 'ain. 'Inánan kamina uisa kara min xukë́nkama 'ikë 'ëmi kaiunun isi kuanti 'ain. 19 Usa 'ain ka Saúl 'imainun Davidnën xukënkamax Israel suntárukamabë mësküax anua Elá kakë me sapan sënënakëkë anu filisteo suntárukamabë 'akanantishi 'aish bukukë 'iakëxa.

20 Usokia koónkëxun ka pëkarakëma 'aínshi, niruxun Davidnën ax kuantamainua aín papa Jesé aín ñuina bërúanxunti uni barixun ami ëbiani, aín xukë́nkama 'inántia aín papan 'inánkë piti a buani kuankëxa. Kuantankëx anua 'ikankë anu bëbakin kuakëxbi ka Israel suntárukamax 'akanani kuanux mëníokati sharatia kananuna atu rëtëi kuanti 'ai kiax kikania kuakëxa. 21 Usaia israel suntárukamax atu 'ai kuantishi 'aish sëtërakëan ka filisteo suntárukamaxribi atubë isánani 'ukëmanan sëtë́rakëkë 'iakëxa. 22 Usai 'ikania iskin ka Davidtan an buánkë piti uni an ñukama anua 'akánanti 'imainun pitikama bërúanti anëkë uni an bërúanxunu kixun ëankëxa, usokin 'abiani abákiani kuantankëx anua suntárukamax sëtë́kë anu axribi 'irukin, uisa kara aín xukë́nkama 'ikë kixun ñukákëxa. 23 Ñukati atubë banakin kuakëxunbi ka filisteo uni 'akánanti 'unánkëira Goliat axa Gat kakë ëmanu 'ikë an, anua filisteo suntárukama sëtë́kë anuax ukin amiribishi atu 'akatsikixun Israel suntárukama an 'akësabikin katëkënia ka Davidnën kuakëxa.

24 Usai kia kuatëkëni ka Israel suntárukamax a uni isi ami 'itsaira rakuë́akëxa, rakuë́ti ka anua sëtë́kë anuaxbi tsuáki abákankëxa, 25 abati ka kikankëxa: ¿Uni ax ka amiribishi chikirakëtia ka iskan? ¡Ax ka nu amiribishi 'akatsikixun katëkëni uaxa! Uin kara a uni 'aia aka, nun 'apun 'itsaira ñu kupíkë 'inánan, aín bëchikë xanuribi aín xanu 'inun 'inánti 'ikën, 'imainun ka aín aintsikaman 'apu kupíokë aribi kupíoxunma 'anun 'amitima 'ikën. 26 Usa 'ain ka Davidnën usai kia kuakëma 'ixun a rapasu 'ikë suntárukama ñukákëxa:

—¿Añu kara an filisteo uni axa Israelkama 'akatsikiax xuamati banakë a nëtë́tanun 'aia an 'akë uni a 'inánti 'ik? ¿Ax añuira 'ixun kara a filisteo uni upíma 'ixun an Diosan kaískë unikama usokin 'akatsikixun ñuiti 'ik? 27 Kiaxa kia ka unikaman an Goliat 'aia uni ñu 'inánti ñuia kikë, bana abi David katëkënkankëxa.

28 'Aínbi ka Eliab aín xukë́n apan ax atubëa banaia kuati ami nishkin aín xukë́n 'anáka David a kakëxa:

—¿Añu 'akatsikiax kaina mix ënu utëkëan? ¿Uimi kaina ñuinakama 'itsamara 'ikëbi anu uni 'ikëma menu ëbëtsian? 'Ën kana mi 'unan mix kamina këmëax niti 'unan 'ain, usa 'aish kamina uisai kara 'akanania iskatsikiax uan. 29 Kixuan kakëxunbi ka Davidnën aín xukë́n apan kakëxa:

—¿Añu 'aisama karana 'ën 'an? 'ëxribi kana ñu ñui banati 'ain, usa 'ain kamina banaxma ka nëtët kixun min 'ë katima 'ain Kixun ka Davidnën aín xukë́n kakëxa.

30 Usakin katankëx ka David aín xukë́n ëbuini anuax kuaiankëxa, kuainxun ka raíri suntárukama ñukákëxa, ñukákëxunbi ka rairinëa kakësokinbi katëkënkankëxa. 31 Usa 'ain ka suntáru raírinën David banaia kuabianxun Saúl ñuixuankëxa, ñuixunkëxun ka Saúlnën David anu kuanun kixun kamiakëxa.

32 Kamikëx kuaxun ka Davidnën ñukákëxun Saúl kakëxa:

—Uíxbi ka filisteo uni aín bana kuati ami kana rakuë́ti kiax kitima 'ikën, 'ëx kana mitsun ismainunbi a unibë 'akanani kuanti 'ain.

33 —Kixun kakëxunbi ka miratsushi kamina filisteo uni a 'ai kuantima 'ain, mix kamina xurapain 'ain kanan ka; ax ka xu 'aíshbia 'akanani kanikë 'ikën —kixun kakëxa. 34 Kia ka Davidnën kakëxa:

—'Ën kana 'ën papan 'arakakë ñuinakama bërúankin paru 'inúanën bianan xaë́onnën achúshi ovejakama anua 'ikë anua bixun buaniabi, 35 nuibianxun 'ën ñuina xëñubiankin buaniabi nipamikin rishkixun rëkë 'ain. Usokëx 'ë ribi bikatsikiax aiabi kana, aín kuëshánu bixun rishkikin rëtëkë 'ain. 36 Usokin kana 'ën paru 'inúan 'ananbi xaëón an mi ñu mëëxunti ënën rëtëkë 'ikën. Usaribi okin kana filisteo uni an bëtsi ñu rabikë a 'ati 'ain, usa 'aínbi ka an Diosan kaískë unikama 'akatsikiax ami banaia. 37 Nukën 'Ibu an 'ë paru 'inúan 'imainun xaë́onnën bisa tana nitsiabi 'ë 'akinkë, an ka filisteo uni ënë 'aia 'ë 'akinti 'ikën. Ësai kia kuakin ka Saúlnën kakëxa:

—Asabi ka usa 'ain kamina Nukën 'Ibun mi 'akimainun 'ai kuanti 'ain.

38 Usokin katankëxun ka Saúlnën raíri suntárukaman David an pañukë aín chupa abi pañumianan aín mañukë manë maiti aribi 'amianan aín manë chupa anun aín shikan mapumikin pañuminun kakëxa. 39 Usokin 'amikëxun ka Davidnën manë xëtokë aribi anúan tsitëkërëkikë anu naxkakëxa, usokin 'atankëx ka kuaintisabi karaisa kixun tankatsikiax kuainibi usakin ñu pañukin 'axëkëma 'aish nikasmakëxa. Usai nikasmakin ka Saúl kakëxa:

—'Ën kana ësokin ñu pañukin tankëma 'ain usa 'aish kana nikasmatin kixun ka Davidtan kakëxa, kakëxun ka a pañumikëkama a pëmiakëxa, 40 pëmikëxun ka aín tsati bianan, mapai achúshi maxax bëru chukúma upíbu xëxanua biakëxa, bixun ka abia nikinkë aín ñusutinu puruakëxa, usa obiani ka aín shínkati tuiax filisteo uni Goliat au kikiani kuankëxa. 41 Usai kuankëbë ka Goliat axribi kuania isbëtsini David 'urama obëtsini ami kikuatsini munu uakëxa. Ukëbë ka an 'akinkë uni ax anpan rëkuë́n kuatsini utankëx nirakëakëxa.

42 Usai ukin ka Goliatnën David isakëxa, iskinbi ka xura 'aísha tunanra 'ikë ami rakuë́tisamara iskin ami, 43 kuaikin kakëxa:

—¿Min tsatin mi 'ë rishkinun karana 'ëx achúshi 'uchiti 'ain? Usokin katankëxun ka aín diosan David 'aisama onun ñukákëxa. 44 Usokin 'atankëxun ka ësokinribi kakëxa:

—¡Ënu 'ën mi 'axun rakania ka ñuina pëchiñunën min nami pimainun raëkëma ñuinanënribi mi piti 'ikën! 45 Kixuan kakëxunbi ka Davidnën ribi kakëxa:

—Mix kamina 'ë 'akatsikiax min manë xëtokë bëanan min masibu kamabëi aín, usa 'aínbi kana 'ëx mi 'ai kuani uisa ñubi buaniman 'ën 'Ibu kamabi kushiñuira Israel kaman suntárunën Dios a kamina 'akatsikixun kain. 46 Bërí ka 'ën 'Ibun mi 'ën mëkënanbi 'anun 'ë 'amiti 'ikën, usa 'ain kana mi 'atankëxun min maxká tëbískati 'ain, 'imainun ka filisteo suntárukama bamakë a ñuina pëchiñu kaman 'amainun raëkëma ñuina kamanribi aín nami piti 'ikën. Usokin 'akë ka kamabi menu 'ikë unikaman kuati 'ikën, an Israel kama 'akinkë Dios ax ka asérabi kushiira 'ikë kixun; 47 'ianan ka kamabi uni timë́këkama ënënribi 'unánti 'ikën Nukën 'Ibun ka manë xëtokën 'akananan masibunën 'akanania ië́nun aín unikama ië́mima kixun. Nukën 'Ibun ka uisai karanuna nux mitsubë 'akanani anuabi nu bërúanti 'ikën, usa 'ixun ka kupímikinma mitsu 'anun nu 'amiti 'ikën.

48 Usakin kakëxa Goliat nirukuatsini a 'urama obëtsini ukëbë ka David anuxun 'anux abákiani kuanx a 'urama nirakëakëxa: 49 usai nirakëkinshi ka aín ñusuti nua maxax bikinshi aín shínkatinu 'arukin mañakinshi anun nikin aín bëmánanu Goliat filisteo uni a 'akëxa. Usokin aín bëmanabi pëánkakin 'akëx ka anua nikë anuaxbi aubi bëómëti nipakëakëxa. 50 Usokin ka filisteo uni a Davidnën 'akëxa. Achúshi shínkati 'imainun achúshi maxax anuinshi ka Davidnën a uni rëtëakëxa. Usakin 'aíkuani ka achúshi manë xëtokëbi buanima kuanxun 'akëxa, 51 usakin 'akëxa nipakëkëbë abákiani kuanx filisteo uni Goliat a rapasu nirakëkinshi ka aín manë xëtokë aín xakánua ëchikinshi anunbi tarókëxa. Usokin 'akinshi ka anunbi tëbískakëxa. Usokin 'akëbë ka atux ami katamëkë, axa 'akánanti 'unáinra ax bamakëbë filisteo suntárukamax anua bukukë anuax tsuakirukiani abákankëxa. 52 Usai abákankëbë ka Israel suntáru 'imainun Judánu 'ikë suntárukamax sharati kikankëxa, kananuna a unikama 'ati 'ain, usai kikiani kuankin ka abatiabi nuixun atun ëma Gat 'imainun Ecrón anun atsínti aín, xëkuë anubi bëbarukin 'akëxa. Usokin 'akëx ka anun Saaraim ëmanu kuanti bai anubi 'ianan Gat 'imainun Ecrón akamanubi filisteo suntárukamaxa bamakë 'aisamaira 'iakëxa.

53 Usokin filisteo suntárukama nuibiankin, 'abëtsini uxun ka israel suntárukaman anu 'ikë atun ñu kamabi bikankëxa.

54 Bimainun ka Davidnën filisteo uni Goliat aín maxká 'imainun anúan 'akanankë ñukama a bibiankin Belén anua aín xubu 'ikë anu nankin buánkëxa anuxun ka basikëbëtan Jerusalénnu nankin buánkëxa.

55 Bërámabi ka Saúlnën aín suntárunën kushi comandante Abner a ñukákë 'iakëxa, David axa filisteo uni Goliat a 'anux kuania iskin:

—Abner ¿Uin bëchikë kara uni bëna ux 'ik? 56 Ësokin ñukákëxunbi ka —kana 'unanima —kixun ka Abnernën kakëxa.

—Asabi ka min kamina uin kara 'unánxa a ñukáxun 'ë kati 'ain —kixun ka Saúlnën kakëxa.

57 Usokin rëtankëxun ka aín maxká bëakëxa, bëia ka Abnernën mërakin Saúlnu David buánkëxa, 58 anu kuankë ka Saúlnën ñukákëxa:

—'Ë kamina kati 'ain ¿uin bëchikë kaina mix 'ain? Kixuan ñukákëxun ka Davidnën kakëxa:

—'Ëx kana Jesé an mi ñu 'axúnti Belénnua 'ikë uni ain bëchikë 'ain.