Jonatán 'imainun David 'unánan ñuikë bana
18
Usa 'ain ka David 'imainun Saúl banatankëx sënë́nkëbë, Jonatán upiti Davidbë 'unánankëxa, usai 'iax ka upiti nuibanairakëxa. 2 Usai 'ia ka Saúlnën a nëtënbi anuxunbia aín ñu mëëti 'axúnun 'amikin ain papan xubunu kuantanun xuisama tankëxa. 3 Anuax ka uínsaranbi ënanantëkënuxma 'unánankatsi kiax Jonatán 'imainun David kanankëxa, usai kanantankëx ka Jonatán 'imainun David 'itsaira bëruanankëxa. 4 Bëruanankin ka an pañukë aín tari Jonatánnën pëxun David 'inánkëxa, 'inánan ka aín manë xëtokë akëñun, ain kanti a 'inánan anúan tsitëkërëkikë aribi 'inánkëxa.5 Usa 'ain ka Saúlnën 'akanantanun xukëtibi Davidnën filisteo suntárukama ainra kanankin kupitanuma 'akëxa, 'aia ka Saúlnën axa 'akanani kuanti suntárukama uanti aín kushi 'inun anëakëxa. Usokin anëkë 'ain ka suntárukama 'imainun ain kushikamaxribi kuëëankëxa.
Saúlnëx Israel unikaman David rabikëbë ami nisha ñuikë bana
6 Usa 'ain ka Israel suntárukama Davidtan filisteo uni Goliat kakë a 'akëbë rikuatsinkëbë, kamabi ëmanuax chikiti Israel xanukamax 'apu Saúl ñui kantai ransai 'ikin kuëënkin bitsi manë sharíkati sharíkanan manë pará okë aribi 'akankëxa. 7 'Ai kantakëbë ka ransai kamabi xanukama amiribi amiribi kikankëxa:
“Saúlnën ka mil unishi 'axa,
'amainun ka Davidnën diez mil uni 'axa kiax kiakëxa.”
8 Ësai kia kuatankëx ka Saúl, 'itsaira nishi kiakëxa:
—Davidnën ka diez mil uni 'axa kiax ka kikania, 'ën karana mil uniratsushi rëtëan. ¡Usa 'aish ka 'apu 'imikanti 'uramashi 'ikën! 9 Usaia kikë anuaxëshi ka Saúl David istisama tani ami nishakëxa.
10 A nëtë́an aín xubunuxunbi ñu mëëxuni anubi bërunu koonkë a pëkarakëbëtan Diosan anu xukëxun ñunshin 'atimanën anua 'ikë 'apun xubu a 'ukëmëu 'ikëbia bikëx ñunshin bakëkësa 'iakëxa. 'Ikëbëtan ka an 'akësabi okin arpa Davidtan 'akëxa, 'amainun ka Saúl ain manë xëtokë a rapasu nankë 'iakëxa. 11 Usa 'ain ka Saúlnën kënëkëñunbi amibi takáshkakin 'ati sinánxun aín manë xëtokën 'akëxunbi Davidtan rabë́okin ñanákin 'amiakëxa.
12 'Amian ka Saúl Davidmi Diosan ka 'akinia kixun 'unani rakuë́akëxa, usa 'ain ka Nukën 'Ibun David 'akiankëxa, 'aínbi ka Saúl 'akinti Diosan ënkë 'iakëxa. 13 Usakin 'axun ka a rapasu 'imikima chikíankëxa, chikínxun ka suntárunën 'apu comandante 'inun anëakëxa, anëkëxun ka aín suntárukama 'akanani kuanti 'ain uantankëxun 'akanankuatsinkin bëakëxa. 14 Usa 'ain ka Nukën 'Ibun 'akinkëbë kamabi Davidtan 'akë ñukama asábi 'iakëxa. 15 Usai 'ikëbë ka Saúl Davidmi rakuë́akëxa, an 'akë ñukama upíokin 'aia isi. 16 'Aínbi ka Israel 'imainun Judánu 'ikë unikaman an 'akë ñu upíokin 'aia iskin, David kuëënkankëxa, an ka suntárukama 'akánanti uanxun bërúanxun bëtëkëankëxa. 17 Achúshi nëtën ka Saúlnën David kakëxa:
—'Ën 'ini bëchikë apan Merab kakë a kana min xanu 'inun mi 'inánti 'ain, usa 'ain kamina mix 'akanantimi rakuë́tima Nukën 'Ibu mi 'akinkëx 'akánanti 'ai kixun kakëxa. 'Aínbi ka Saúlnën anbi 'akinma, këmëxun filisteo suntárukama 'amiti sinánxun usakin kakëxa.
18 Kakëxunbi ka Davidtan kakëxa:
—Min kamina 'itsa 'ë nuibatin 'aínbi kana 'ëx añubima 'ain, 'imainun ka 'ën aintsi Israel kaman añubima 'ë isia, usa 'ain kana mix 'apu 'ain min piaka isama 'ëx 'ain. 19 Usakin kakë 'ixun anun Saúlnën ain bëchikë xanu Merab kakin anëkë a aín xanu 'inun David 'inánti nëtën, a 'inankima Adriel kakë uni Meholá kakë ëmanu tsókë uni a 'inánkëxa. 20 'Aínbi ka Mical Saúlnën 'ini bëchikë xanuitsi a Davidtan mërati okë 'iakëxa. Mërati okë ñuikania kuati ka Saúl asábi ka kixun sinani kuëëankëxa, 21 kuëënkin ka David aín xanu 'ixun ka an paránxun filisteo suntárukama 'amiti 'ikë kixun sinánkëxa. Usakin sinánxun ka amiribishi David katëkëankëxa:
—Bëríra kamina 'ën piaka 'inuxun 'ain.
22 Ësokin katankëxun ka Saúlnën an ñu mëëxunkë unikama kakëxa:
—Mitsunribi kamina abë banakin 'apun ka 'itsaira mi kuëënia kixun kati 'ain, usa 'ain kamina mix 'apun piaka 'iti 'ain kixunribi kanan, an ñu mëëxunkë nukamanribi kananuna mi nuibati kixun kati 'ain, usa 'ain kamina mix aín piaka 'iti 'ain kixuan kanun ka kakëxa. 23 Kakëx anu rikianxun ka Saúlnën kakë bana an ñu mëëxunkë unikaman kakëxa, 'aínbi ka Davidtan kakëxa:
—¿Mitsun sinánkëx kara 'apun piaka 'iti ax tëmara 'ianan uni ñuñumara 'ianan, unin kushibëtan sënë́nmara 'ësa unix 'iti 'ik?
24 Kakëx anu kuantëkënxun ka Saúl an ñu mëëxunkë unikaman usakian Davidtan atu kakë bana ñuikin kakëxa. 25 Usakin ñuixunkëxun ka Saúlnën an ñu 'akinkë unikama David filisteo unikama 'amiti sinánkin ësakin kakëxa:
—David kamina 'ën 'ini bëchikë aínan 'iti bikian, añubi 'ë 'inanxuma 'anun kati 'ain, 'ëx kana 'apu 'aish kuëënin 'ëa cien filisteo uni 'axun aín nëtokë ñu rëbu maxaka tëakin bixun bëxunun kati 'ain, usakin 'akëbëtan kana 'ëmi nishkë unikama 'atima oti 'ain. Asérabi ka Saúl filisteo unikaman 'ati kuëëankëxa.
26 Ësokin kakëxun ka an Saúl 'akinkë unikaman ënë bana ñuikin David kakëxa, kakëxun ka Davidtan asérabi kana 'apun piaka 'iti 'ai kixun sinánkëxa.
Usa 'ain ka Saúlnën usakin 'anun kakë bana sinánkin a nëtën bënun kakë a nëtë 'ikëma 'aínbi kana aín nëtokë ñu rëbu a bëxúnti 'ai kixun sinánkëxa. 27 Ësakin sinánkin ka David ain suntárukama uani kuanx abë 'akanankin doscientos filisteo suntáru 'akëxa.
'Atankëxun bibiankin ka filisteo suntárunën nëtokë ñu rëbu maxaka 'apu aín piaka 'isatankin, buánxun 'inánkëxa, 'inánkëxun ka Saúlnën aín 'ini bëchikë Milcá 'ain xanu 'inun 'inánkëxa. 28 Usakin 'inánkëxun ka Saúlnën Nukën 'Ibun ka David 'akinia, usa 'ikë ka 'ën bëchikë Milcánën kuëënia kixun 'unánkëxa, 29 'unani ka bëráma 'ikësamairai ami rakuë́akëxa, rakuë́ti ka abë nuibanantëkënima ami nishakëxa.
30 Usaia 'imainun ka filisteo suntárunën kushikama, Israel suntárubë ënananima abi 'akanani chikíakëxa, usai 'iabi ka Davidtan Saúlnën suntárunën kushikaman 'akësamaira okin 'akëxa, usakin 'akëbë ami rakuë́kin ka Israel kaman uisakinbi David káma 'ikën.