—'Ën papa Saúlnën ka uisoxun kara mi 'ati 'ikë kixun sinánkin baria. Usa 'ain kamina imë́ishibi pëkarakëma 'aínshi kuantankëx uínbi anua mi mëratinuma unëti kuanti 'ain. 3 'Ëx kana 'ën papabë uinu kaina unëa anu kuanti 'ain. Anuxun kana abë banakin uisai kara kia kuanuxun mi ñuikin kati 'ain. Usokin katankëxun kana uisai kara kiaxa kixun mi 'unánun mi ñuixunti 'ain.

4 Usa 'ain ka Jonatánnën ain papa Saúl, David ñuikin kakëxa:

—Papa ësokin kana mi kain, David kamina 'aisama otima 'ain, an ka mixmi 'apu 'ikë mi uisabi oti sinanima, usa 'ain kamina mix 'apu 'ixun upíokin sinánti 'ain; 5 an ka filisteo uni achúshi axa 'akánanti 'unánkë 'ikëbi 'akëmasa okinshi Goliat an ira 'aisa 'ixunbi 'axa, usakin ka Israel unikama 'akinun Nukën 'Ibun 'amiaxa, 'aia kamina minbi isan isi kamina 'itsaira kuëan. ¿Usa 'ain kamina ñu 'aisama ka 'akëma 'ikë David 'ati sinántima 'ain? 6 Ësokian aín bakë bëchikë Jonatánnën kakëxun kuati sinanati ka Saúl munuma kuënkëni kiakëxa:

—Asábi ka kana Nukën 'Ibun kuamainun kin David kana uisabi otima 'ain, asérabi ka añu ñu 'aisama 'akëma 'ikën. 7 Usai kikiania aín papa kuantamainun ka Jonatánnën anua unëkë anua kuënkë́xa aia, usakian aín papa kakë banakama David ñuixuankëxa.

Usokin ñuixunbiankin ka aín papa Saúlnu buánkëxa, buánkëx ka David bëráma 'ikësaibi a ñu mëëxuni aín xubunu 'iakëxa.

8 Usai anu 'ikëbëbi ka amiribishi filisteo suntárukamax Israel unikamabë 'akanantëkënti sinánkëxa, sinan ka David filisteo unikamabë 'akanani kuankëxa, kuanxun ka Davidnën Israel suntárukamabëtan filisteo unikama raíri abátamainun 'itsa uni 'akëxa. 9 Usakia 'akë 'ain ka Saúl aín xubunu aín manë xëtokë nanx tsókëbi Nukën 'Ibun amiribishi 'atima sinánun 'imiakëxa, 'imimainun ka Davidtan aín arpa 'akësabi okin 'ai tsóakëxa, 10 tsótan ka Saúlnën aín manë xëtokë bikin, David anua tsókë anuabi xubu chikënkë këñunbi 'ati sinánxun 'akëxa. 'Aínbi ka Davidnën meu kikin 'amikëbëtan ka aín xubu chikën ashi 'akëxa, usakin 'akinbi ñankokëx ka David a 'imë́bi abati kuankëxa.

11 Abáti kuakin ka Saúlnën bënë́kinshi aín unikama, aín xubunu kuanxua David kaixun pëkarakëma 'aínshi chikitia 'atanun kixun xuakëxa. 'Aínbi ka aín xanu Micalnën David ësokin sinánmikin kakëxa:

—Ënë 'imë́bi kamina ënuax abáti 'ain, abákëma 'aish kamina imë́ishi bamakë pëkarati 'ain. 12 Usakin katankëxun ka bënë́kinshi Micalnën aín xubu xëkuë chukúma manámia 'akë au bëpaxun abátanun David nanpákëxa. 13 Usakin 'atankëxun ka Micalnën uni tankia 'akë a bixun, anua David 'uxkë anu nankëxa, nanxun ka aín maxkánu cabranën rani bixúan xëokin 'akë a aín maxkánu unin busabi 'itánun nankëxa, nanxun ka a upíokin sabananën mapuakëxa. 14 Saúlnëan 'ain unikama David ñatanti xukëbi ka Micalnën 'ën bënë David ka 'isianxa kixun kakëxa.

15 Usokin kakëx rikianxun a unikaman Saúl kakëxa, David ka 'insínkë 'iaxa, kakëxun ka Saúlnën, amiribishi aín unikama David baritëkëntanun kixun ësokin kaxun xuakëxa:

—¡'Isianxa aín 'uxtinu rakakëbi kamina David 'aminun 'ë bëxúnti 'ain! 16 Kixuan kakëx rikianx ka Saúlnën unikamax Davidnën xubunu atsíankëxa, atsínkinbi ka anua David 'uxkë anua, uni tankia 'akë ñu ashi cabra rani xëokë a aín maxkánu nankë ashi mërakëxa.

17 Usa 'ain ka Saúlnën Mical kakëxa:

—¿Uisa kupín kaina ësokin 'ë paránuxun 'ëx ami nishkë uni abámian? Kixuan kakëxun ka.

Micalnën kakëxa:

—An ka abáti 'akinkëxuma kana asérabi mi 'axun rakanin kixun 'ë kaxa, usa 'ain kana kuantanun kixun kan.

18 Usai ka David aín xubunuax abákëxa. Abáx ka Samuel Ramá kakë ëmanua isi kuankëxa, kuanxun ka anu bëbaxun Saúlnën usokin 'akëkama ñuixuankëxa.

Usai banakiani ka anuax David 'imainun Samuel ëma chukúma Naiot anu tsóti kuankëxa.

19 Anu David kuankëbi ka Saúlnën ka Naiot kakë ëma chukúma Ramá 'urama 'ikë anu kuanxa kixun ñuikania kuakëxa, 20 kuaxun ka Saúlnën amiribishi aín unikama ñatanxua bëtánun kixun xuakëxa. Xukëx kuanx bëbakin, Saúlnën xukë unikaman iskëxbi ka Samuelnën an bana ñuikë unikamabëtan Diosan bana unikama ñuixunia nikë mërakëxa. Usakia isia ka Diosan bëru ñunshinan atúxribi an bana ñuikë unikama 'inun 'imiakëxa, usai 'ikin ka bënë́kinshi bana ñuikankëxa.

21 Usaia a unikama 'ikë kuaxun ka Saúlnën raíri unikamaribi David bitánun kixun xuakëxa, xukëx kuanxbi ka atúxribi raíri 'ikësaribiti bënëtishi an Diosan bana ñuikë uni 'iakëxa. Usai 'ian ka amiribishi Saúlnën aín unikama xutëkëankëxa, xukëx kuanxbi ka atúxribi usaribiti 'ikankëxa.

22 Usaia an xukë unikamax 'ikëbë ka Saúl axbi Ramá kakë ëmanu kuankëxa, kuantankëx ka anua 'umpax nunkurukë Secú kakë ëmanu bëbakin, uinu karaisa Samuel 'imainun David 'ia kixun ñukákëxa. Ñukatia ka achúshi unin ñuixuankëxa. Ax ka Naiot, Ramá kakë ëma 'urama anu 'ia kixun ka kakëxa, 23 usakin kakëx ka Saúl anu kuankëxa. Kuantankëxa bëbaiabi ka aribi Diosan bëru ñunshinan an ribia bana ñuikë uni 'inun 'imiakëxa, 'imikëx ka Saúl axribi kuëëni ransakiani bain kuanx Ramá kakë ëma 'urama 'ikë Naiot ëma chukúma anu bëbakëxa; 24 usai 'ika uinu kara Samuel 'ikë anu nukuxun aín chupa pëtankëxun a nëtënbi pëuxun 'abaikin a imë́ribi Diosan bana ñuiakëxa. Anuax ka ësai kiakëxa. “¿Saúl axribi kara an Dios kikë bana uni ñuixunkëkama achúshi 'ik?”